ޓްރާންސްޕޯޓު މިނިސްޓަރު މުހައްމަދު އަމީންގެ އިތުބާރު ނެތްކަމުގެ މައްސަލަ ބުރާސްފަތި ދުވަހުގެ ރައްޔިތުން މަޖިލީހުގެ ޖަލްސާއަށް އެޖެންޑާ ކޮށްފިއެވެ.

އޭޕްރީލް މަހުގެ 18 ވަނަ ދުވަހުގެ ރޭ ހ. ފެންޓެނޯއީ ގޭގެ ނުވަ ވަނަ ފަންގިފިލާއިން ފުރާޅެއްގެ މައްޗަށް ވެއްޓިފައި އޮއްވާ ފެނުނު އުމުުރުން 21 އަހަރުގެ ހައްވާ ޔުމްނު ރަޝީދު ވެއްޓުނު މައްސަލައާ ގުޅިގެން މިނިސްޓަރު މުހައްމަދު އަމީން ވަކިކުރަން މަޖިލީހަށް ހުށަހެޅީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)އިންނެއެވެ.

މި ޖަލްސާ އެޖެންޑާ ކޮށްފައިވަނީ ބުރާސްފަތި ދުވަހުގެ މެންދުރުފަހު 1:30ށެވެ.

މިނިސްޓަރު އަމީންގެ އިތުބާރު ނެތްކަމުގެ މައްސަލަ މަޖިލީހަށް ވެއްދިީ އެމްޑީޕީގެ 12 މެންބަރުންގެ ސޮޔާއެކު އެވެ. އެ މައްސަލައިގެ ނޯޓިސް އަމީންއަށް ފޮނުވާފައިވަނީ 1 މެއި 2025 ގައެވެ.

މި މައްސަލައާ ގުޅިގެން އެމްޑީޕީގެ ޕާލިމެންޓަރީ ގްރޫޕްގެ ލީޑަރު އަދި ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވިދާޅުވީ މިނިސްޓަރު އަމީންއަށް އާއްމު ރައްޔިތުންގެ އިތުބާރު ނެތް ކަމަށާއި، މި މައްސަލަ މަޖިލީހަށް ވެއްދީ ޒުވާނުން ކުރަމުންދާ މުޒާހަރާތަކާއި ނޫސްވެރިންގެ ގެނެސްދޭ ވާހަކަތަކާއެކުމ، އިތުރަށް ޕާޓީން ހޯދި މައުލޫމާތުތަކަށް ބެލުމަށްފަހު ކަމަށެވެ.

ޔުމްނު ފުރާޅަށް ވެއްޓުނު މައްސަލާގެ ތަހުގީގަށް މިނިސްޓަރު އަމީން ވަރަށް ބޮޑަށް ނުފޫޒު ފޯރުވާފައިވާ ކަމަށް ގިނަ އަދަދެއްގެ އާއްމު ރައްޔިތުން ދަނީ ތުހުމަތު ކުރަމުންނެވެ. އަދި މިމައްސަލާގެ އަސްލު ފޮރުވައި، ވަރަށް ބޮޑަށް ޔުމްނު ކުށްވެރިވާ ގޮތަށް މުޅި ކޭސް ބަދަލު ކުރުމަށް މަސައްކަތް ކޮށްފައިވާ ކަމަށް ގިނަ ބަޔަކު ބުނެއެވެ.

މީގެ އިތުރުން މި މައްސަލައާ ގުޅިގެން ފުލުހުން އާއްމުކޮށް ހުޅުވާލައިގެން ކުރިއަށް ގެންދިޔަ ނޫސްވެރިންގެ ބައްދަލުވުން ކުރިއަށް ދިޔަ ވަގުތު މިނިސްޓަރު އަމީން އޭރު ހުންނެވި ކޮމިޝަނަރ އޮފް ޕޮލިސް އަލީ ޝުޖާއުއަށް ގުޅުއްވިކަން ވެސް ވަނީ ހާމަވެގެން ގޮސްފައެވެ.

މީގެ އިތުރުން ޔުމްނުއަށް އިންސާފު ހޯދައިދިނުމަށް ގޮވާލާ ކުރިއަށް ގެންދާ ޒުވާނުންގެ މުޒާހަރާގައި ވެސް މިނިސްޓަރު އަމީންގެ އިސްތިއުފާއަށް ދަނީ ތަކުރާރުކޮށް ގޮވާލަމުންނެވެ.

ނަމަވެސް ބައެއް މީޑިއާތަކަށް މިނިސްޓަރު އަމީން ވިދާޅުވީ އިސްތިއުފާ ދިނުމަށް ނުވިސްނާ ކަމަށެވެ.