ޚާއްސަ އެހީއަށް ބޭނުންވާ މީހުން, 60 އަހަރުވުމުން ކާރު ނުދުއްވޭގޮތަށް ވަކި ލައިސަންސެއް ނަގަންޖެހޭ ގޮތް ހަދައިިފި

ޚާއްސަ އެހީއަށް ބޭނުންވާ މީހުން, އުމުރުން 60 އަހަރުވުމުން ކާރުފަދަ ހަތަރުފުރޮޅުލީ އުޅަނދު ނުދުއްވޭ ގޮތަށް ވަކި ލައިސެންސެއް ނަގަން ޖެހޭ ގޮތަށް ހަމަޖައްސައިފި އެވެ.

އެ ގޮތަށް ހަމަޖައްސާފައި ވަނީ އާދިއްތަ ދުވަހު އެއްގަމު އުޅަނދުފަހަރުގެ ލައިސަަންސް ދޫކުރުމާ ބެހޭ ގަވައިދަށް ޓްރާންސްޕޯޓު މިނިސްޓްރީން ގެނައި އިސްލާހުގައެވެ. އެ މިނިސްޓްރީން ވަނީ މި އިސްލާހު ގެޒެޓްކޮށްފައެވެ.

އެ އިސްލާހުގައި ބުނެފައި ވަނީ އެ ލައިސަންސް ދޫކުރާނީ ޚާއްސަ ތަމްރީން ޕްރޮގްރާމެއް ފުރިހަމަކުރުމުން ކަމަށެވެ. އެގޮތުން ދޫކުރާ ލައިސަންސްގެ ދަށުން އުޅަނދު ދުއްވުމުގެ ހުއްދަ ދޫކުރެވޭނީ ވަކި އުޅަނދުތަކަކަށް ކަމަށް އެ އިސްލާހުގައި ވަނީ ބުނެފައެވެ. އެ އިސްލާހުގައި ބުނާގޮތުން، އެ ލައިސަންސް ދެވޭނީ 60 ސީސީއިން ދަށުގެ މޮޓޯސައިކަލާއި އޮޓޯ ސައިކަލާއި ރަށުޕިކަޕް ފަދަ އުޅަނދުތައް ދުއްވުމަށް އެކަންޏެވެ.

ހަމައެހެންމެ އެ ލައިސަންސްގެ ދަށުން އުޅަނދު ދުއްވޭނީ ލައިސަންސް ދޫކުރި އިދާރާ ހުންނަ ރަށުގައި އެކަންޏެވެ. އަދި ގަޑިއަކު 30 ކިލޯމީޓަރަށްވުރެ ބާރަށް ދުއްވުން ހުއްދަ މަގުތަކުގައި މި ލައިސަންސްގެ ދަށުން ނުދުއްވޭނެއެވެ.

މީގެ އިތުރުން އުޅަނދު ދުއްވާ މީހާ އެއް ފަހަރަށްވުރެ ގިނަ ފަހަރު ޓްރެފިކް ގަވާއިދުތަކާ ޚިލާފުވެއްޖެ ނަމަ އެ މީހެއްގެ ލައިސެންސް ބާތިލް ކުރުމުގެ އިޚްތިޔާރު އެ ލައިސަންސް ދޫކުރި އިދާރާ އަށް މި އިސްލާހުގައި ވަނީ ދީފައެވެ.