ޓެކްސީ ހިދުމަތް ޑރ. މުއިއްޒުގެ ސަރުކާރުން ދެނީ
ސަރުކާރުން އައު ކާރު އެތެރެކޮށް ސަރުކާރު ހިއްސާވާ ކުންފުޏެއް ލައްވާ އެ ޚިދުމަތް ދިނުމަށް މަސައްކަތް ދަނީ ކުރަމުން
ޓެކްސީ ކިއު - ޓެކްސީ ޑްރައިވަރުުން ވަނީ ސަރުކާރުން ޓެކްސީ ޚިދުމަތުގެ ތެރެއަށް ވަންނާތީ ކަންބޮޑުވުން ފާޅުކޮށް އިހުތިޖާޖު ކޮށްފައި
ޕްރައިވެޓް ސެކްޓަރ އިން މުޅިން ދެމުން އައި ޓެކްސީ ޚިދުމަތުގެ ތެރެއަށް ސަރުކާރުން ވަދެ، އެ ޚިދުމަތް ޑރ. މުއިއްޒުގެ ސަރުކާރުން ދޭން ނިންމައިފި ކަމަށް ޓްރާންސްޕޯޓް މިނިސްޓަރ މުހައްމަދު އަމީން ވިދާޅުވެއްޖެއެވެ.
ޓެކްސީ ޑްރައިވާރސް އެސޯސިއޭޝަނުން ރައްޔިތުންގެ މަޖިލީހަށް ހުށަހެޅި މައްސަލައަކާ ގުޅިގެން މަޖިލީހުގެ އިގްތިސާދީ ކޮމިޓީގައި ވާހަކަ ދައްކަވަމުން އަންގާރަ ދުވަހު އަމީން ވިދާޅުވީ ޓެކްސީ ހިދުމަތް ދިނުން ސަރުކާރު ހިއްސާވާ ކުންފުންޏަކާ ހަވާލު ކުރަން ނިންމާފައިވާ ކަމަށެވެ.
އޭނާ ވިދާޅުވީ ކުރިއަށް އޮތް ދެ ހަފްތާ ތެރޭ ޓެކްސީ ޚިދުމަތް ދިނުމަށް ކުންފުންޏަކާ ހަވާލު ކުރާނެ ކަމަށެވެ.
ޓެކްސީ ޚިދުމަތް ސަރުކާރުން ދިނުމަށް ނިންމާފައިވާ ގޮތުގެ ތަފްސީލް ދެއްވަމުން އަމީން ވިދާޅުވީ، ސަރުކާރުން އައު ކާރު އެތެރެކޮށް ސަރުކާރު ހިއްސާވާ ކުންފުޏެއް ލައްވާ އެ ޚިދުމަތް ދިނުމަށް މަސައްކަތް ކުރަމުންދާ ކަމުގައެވެ.
އަމީން ވިދާޅުވީ، ޓެކްސީ ބަހައްޓާނެ ބިންތައް ކަނޑައެޅުމުގެ މަސައްކަތް ކުރިއަށް ދާ ކަމަށާއި ކުރިއަށް އޮތް ދިހަ ވަރަކަށް ދުވަހުގެ ތެރޭގައި ބިންތައް ހަމަޖެހޭނެ ކަމުގައެވެ.
އަމީންގެ ވާހަކައިގައި ޓެކްސީ ޚިދުމަތް ދިނުމަށް ސަރުކާރުން ހަވާލު ކުރާނީ ކޮން ކުންފުންޏެއް ކަމެއް ކަނޑައެޅިގެން ވިދާޅު ނުވިނަމަވެސް، އެމްޓީސީސީ އާ ހަވާލުކޮށްގެން ޓެކްސީ ޚިދުމަތް ދިނުމަށް ވިސްނަމުންދާ ކަމުގެ އިޝާރާތެއް ވަނީ ކުރައްވާފައެވެ. އޭނާ ވިދާޅުވީ، އާރުޓީއެލް ހިންގާ ގޮތައް އެމްޓީސީސީން ޓެކްސީ ޚިދުމަތް ދެވިދާނެ ކަމުގައެވެ.
ޓެކްސީ ކުރުމުގެ ޚިދުމަތައް ނަގާނީ ފުލްޓައިމް ކޮށް މަސައްކަތް ކުރާ ފަންސާސް އިންސައްތަ ޑްރައިވަރުން ކަމަށާއި ބާކީ ބައި މަސައްކަތް ކުރާނީ ޕާޓް ޓައިމް ޑްރައިވަރުންގެ ގޮތުގައި ކަމުގައެވެ.
ޓެކްސީގެ ޚިދުމަތް ދިނުމަށް ކަނޑައަޅާފައިވާ ގޮތުގެ އިތުރު ތަފްސީލު ދެއްވަމުން އަމީން ވިދާޅުވީ، ޓެކްސީ ކުރާ ކޮންމެ ގަޑީއިރަކަށް 100ރ އަށް ވުރެ ދަށް ނުވާނެ އުޖޫރައެއް ޑްރައިވަރުންނަށް ދިނުމަށް ނިންމާފައިވާ ކަމަށެވެ. އަދި ޑްރައިވަރުންނަށް ހަފްތާއަކު އެއްފަހަރު އުޖޫރަ ދޭ ގޮތައް ހަމަޖައްސާނެ ކަމަށެވެ.
އަމީން ވިދާޅުވީ، ސަރުކާރުން ފަށާ ޓެކްސީގެ ޚިދުމަތަކީ 24 ގަޑީއިރުގެ ޚިދުމަތެއް ކަމަށާއި، ޓެކްސީ ލައިންގައި ދުއްވާ ކާރުގެ 25 އިން ސައްތަ އަކީ އިލެކްޓްރިކް އުޅަނދު ކަމަށް ވާނެ ކަމުގައެވެ.
