ސްޕެނިޝް ލީގުގައި ވާދަކުރަމުން އަންނަ ރެއާލް ބެޓިސްގެ ސްކޮޑުގައި މީގެ ކުރިން ހިމެނުނު ސްޕެއިނުގެ ޑިފެންޑަރު ހެސޫސް ޕޯޒޯ ބްލާންކޯ މާޒިޔާ ސްޕޯޓްސް އެންޑް ރެކްރިއޭޝަނަށް ބަދަލުވެއްޖެއެވެ.
މާޒިޔާއިން އައު ޑިފެންޑަރެއް ގެނައީ ކުރިއަށް އޮތް އޭއެފްސީ ކަޕަށް ޓީމު އިތުރަށް ވަރުގަދަކުރުމުގެ ގޮތުންނެވެ. އެގޮތުން މި ފަހަރު އެ ޓީމަށް ގެނައި އުމުރުން 25 އަހަރުގެ ޕޯޒޯ އަކީ 2013-2014 ވަނަ އަހަރުގެ ސީޒަނުގައި ރެއާލް ބެޓިސް ސްކޮޑުގައި ހިމެނުނު ކުޅުންތެރިއެކެވެ. އެކަމަކު ބެޓިސްގެ ސީނިއާ ޓީމަށް ޕޯޒޯ މެޗެއް ކުޅެދީފައި ނުވި ނަމަވެސް، އޭގެ ފަހުން ދެ އަހަރު އޭނާ ވަނީ ރެއާލް ބެޓިސް ބީ ޓީމަށް ކުޅެފައެވެ. އަދި 2017-2018 ވަނަ އަހަރުގެ ސީޒަނުގައި އޭނާ ވަނީ ބެޓިސް ޑިޕޯޓިވޯ ޓީމަށްވެސް ކުޅެފައެވެ.
މިދިޔަ ހޯމަ ދުވަހު ރާއްޖޭގެ ޓްރާންސްފާ ބާޒާރު ބަންދުވިއިރު، ޕޯޒޯއަކީ މި ޓްރާންސްފާގައި މާޒިޔާއާ ގުޅުނު ބިދޭސީ ތިންވަނަ ކުޅުންތެރިޔާއެވެ. އެގޮތުން މީގެ ކުރިން މާޒިޔާއިން ވަނީ ސީރިއާގެ ގޯލްކީޕަރު މަހުމޫދު އަލް-ޔޫސުފާއި، ފިލިޕީންސް ލީގުގައި ކުޅެފައިވާ ޖަޕާނުގެ މިޑްފީލްޑަރެއް ކަމަށްވާ ޓަކާޝީ އޮޑަވާރާގެ ސޮއި ހޯދާފައެވެ. އަދި އެ ޓީމުން ވަނީ ސާބިއާގެ ގޯލްކީޕަރު ނިކޮލާ ވުޔަނަޗާއި، އެ ގައުމުގެ ޑިފެންޑަރު ޕީޓަ ޕްލަނިޗް ދޫކޮށްލާފައެވެ. އެހެންކަމުން އަލަށް މާޒިޔާއާ ގުޅުނު ބިދޭސީ ތިން ކުޅުންތެރިންނާއެކު، ދެން އެ ޓީމުގައި ހިމެނޭ ބިދޭސީ ކުޅުންތެރިއަކީ ސެއިންޓް ވިންސެންޓުގެ ފޯވާޑް ކޮނޭލިއަސް ސްޓެވާޓެވެ.
މީގެ އިތުރުން މާޒިޔާއިން ވަނީ ޓްރާންސްފާ ބާޒާރު ބަންދުވުމުގެ ކުރިން މި ސީޒަނުގައި ވެލެންސިއާ ޓީމާއެކު ފެށި އަދި މީގެ ކުރިންވެސް މާޒިޔާއަށް ކުޅެފައިވާ މުޙައްމަދު ސާމިރުވެސް ގެނެސްފައެވެ.
މާޒިޔާއިން ކުރިއަށް އޮތް އޭއެފްސީ ކަޕަށް ޓީމު ވަރުގަދަކުރިއިރު، އޭއެފްސީ ކަޕުގެ ދެކުނު އޭޝިއާގެ ޓީމުތަކުގެ ގްރޫޕް ސްޓޭޖުގެ ސީދާ ޖާގައެއް ލިބިފައިވަނީ މާޒިޔާއަށެވެ. މާޒިޔާގެ އިތުރުން ދެން ގްރޫޕް ސްޓޭޖުގެ ޖާގައެއް ކަށަވަރުކޮށްފައިވަނީ އިންޑިއާގެ މޯހަން ބަގާން އަދި ބަންގްލަދޭޝްގެ ޗެމްޕިއަން ބަޝުންދަރާ ކިންގްސްއެވެ.
މި އަހަރުގެ އޭއެފްސީ ކަޕް ގްރޫޕް ސްޓޭޖް މެޗުތައް ސެންޓްރަލައިޒްކޮށްގެން ރާއްޖޭގައި ބާއްވާއިރު، ޕްރިލިމިނަރީ ބުރާއި ޕްލޭ-އޮފް ބުރަށްފަހު ގްރޫޕް ސްޓޭޖުގެ މެޗުތައް ކުޅޭނީ މެއި މަހުގެ 14 ވަނަ ދުވަހުން ފެށިގެން 20 ވަނަ ދުވަހުގެ ނިޔަލަށެވެ.
