ބުރު ބަލިކޮށް މާޒިޔާ އަށް ތިން ވަނަ މޮޅު

މިހާރު ކުރިއަށްދާ ދިރާގު ދިވެހި ޕްރިމިއާ ލީގުގައި އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން އިން ކުޅުނު ތިން ވަނަ މެޗުގައި ބުރު ސްޕޯޓްސް ކުލަބުގެ މައްޗަށް ވެސް ކުރި ހޯދައިފި އެވެ.

އަންގާރަ ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗު މާޒިޔާ އިން ކާމިޔާބު ކުރީ 2-0 އިންނެވެ. މެޗުގެ ފުރަތަމަ ހާފުގައި މާޒިޔާ އިން ދެ ލަނޑު ޖެހިއިރު، ފަހު ހާފުގައި ވަނީ އަނެއް ލަނޑު ޖަހައިފަ އެވެ.

މެޗުގެ ފުރަތަމަ ހާފުގެ 33 ވަނަ މިނެޓުގައި މާޒިޔާ އަށް ލީޑު ނަގައިދިނީ ހަމްޒާ މުޙައްމަދު (ހަމްޕު) އެވެ. އޭގެ ފަހުން ފުރަތަމަ ހާފުގެ ފަހު ވަގުތުގައި މާޒިޔާގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ ނާއިޒް ޙަސަން (ދާދު) އެވެ.

މެޗުގައި ބުރުން ވެސް ވަނީ ލަނޑު ޖަހަން ފުރުސަތު ތަކެއް ތަނަވަސްކޮށްފަ އެވެ. ނަމަވެސް، އެ ޓީމަށް ލިބުނު ފުރުސަތުގެ ބޭނުން ކުރެވޭ ގޮތެއް ނުވި އެވެ. މެޗުގައި މާޒިޔާގެ ތިން ވަނަ ލަނޑު، 59 ވަނަ މިނެޓުގައި ޖެހީ އިބްރާހިމް އައިސަމް އެވެ.

ލީގުގައި މާޒިޔާގެ ފުރަތަމަ މެޗުގައި އެ ޓީމުން ކުލަބު އީގަލްސް ބަލިކުރިއިރު، ދެ ވަނަ މެޗުގައި ވަނީ ޓީސީ ސްޕޯޓްސް ކުލަބުގެ މައްޗަށް ވެސް ކުރި ހޯދައިފަ އެވެ. ތިން ވަނަ މެޗުގައި ބުރު ބަލިކޮށް، ނުވަ ޕޮއިންޓާ އެކު މާޒިޔާ އޮތީ އެއް ވަނައިގަ އެވެ.

ބުރުގެ ފުރަަތަމަ މެޗުގައި ވިކްޓްރީ ސްޕޯޓްސް ކުލަބުގެ އަތުން މޮޅުވީއިރު، ދެ ވަނަ މެޗުގައި ވަނީ ކުލަބު އީގަލްސްއާ އެއްވަރުވެފަ އެވެ. ލީގުގައި ބުރަށް ދެން އޮންނާނީ ކުލަބު ގްރީން ސްޓްރީޓްސްއާ ދެކޮޅަށް ކުޅޭ މެޗެވެ.