މާޒިޔާ އިން ފުރަތަމަ ފަހަރަށް 19 އަހަރުން ދަށުގެ ޔޫތު ޗެމްޕިއަންޝިޕް ކާމިޔާބުކޮށްފި

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން އިންތިޒާމު ކޮށްގެން ކުރިއަށް ގެންދިޔަ، 19 އަހަރުން ދަށުގެ ޔޫތު ޗެމްޕިއަންޝިޕްގެ ޗެމްޕިއަންކަން މާޒިޔާ ސްޕޯޓްސް އެންޑް ރެކްރިއޭޝަން އިން ހޯދައިފި އެވެ.

ހުކުރު ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު ފައިނަލް މެޗު މާޒިޔާ އިން ކާމިޔާބު ކުރީ ކުލަބު އީގަލްސްއާ ވާދަކޮށެވެ. އެ މެޗުގައި އީގަލްސް އިން ލަނޑު ޖަހައި ކުރި ހޯދާފައި ވަނިކޮށް، މާޒިޔާ އިން ވަނީ ފަހަތުން އަރައި ހަ ލަނޑު ޖަހައިގެން މެޗުން މޮޅުވެފަ އެވެ.

މެޗު ފަށައިގެން ފަސް ވަނަ މިނެޓުގައި އީގަލްސް އިން ވަނީ މާޒިޔާ ކޮޅަށް ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ އަޝްހަމް އިބްރާހީމް މުޙައްމަދު އެވެ. އެ ލަނޑާ އެކު މެޗުގެ ފުރަތަމަ ހާފު އީގަލްސް އިން ނިންމާލީ ވެސް ލީޑުގައި އޮވެގެންނެވެ.

ނަމަވެސް މެޗުގެ ދެ ވަނަ ހާފު ފަށައިގެން ހަ ވަނަ މިނެޓުގައި އައިދާން އަޙުމަދު މޫސާ ވަނީ ލަނޑު ޖަހައި މާޒިޔާ އަށް ނަތީޖާ ހަމަހަމަ ކޮށްދީފަ އެވެ. އޭގެ ފަނަރަ މިނެޓު ފަހުން އަނޫފް ޢަބްދުﷲ ޖެހި ލަނޑުން މާޒިޔާ ލީޑު ނެގި އެވެ. އަދި މެޗުގެ 83 ވަނަ މިނެޓުގައި އަނޫފް ވަނީ މާޒިޔާގެ ތިން ވަނަ ލަނޑު ވެސް ޖަހައިފަ އެވެ.

އޭގެ ފަހުން މެޗުގެ ފުރިހަމަ ވަގުތު ހަމަވާން ހަތަރު މިނެޓަށް ވެފައި ވަނިކޮށް، ނަސާޙް އިބްރާހީމް ނާޞިރު ވަނީ މާޒިޔާގެ ހަތަރު ވަނަ ލަނޑު ޖަހައިފަ އެވެ. މާޒިޔާގެ ފަސް ވަނަ ލަނޑު މުޙައްމަދު އިލާން އިމްރާން ޖެހިއިރު، މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި އިލާން ވަނީ މާޒިޔާގެ ހަ ވަނަ ލަނޑު ވެސް ޖަހައިފަ އެވެ.

މިއީ މާޒިޔާ އިން 19 އަހަރުން ދަށުގެ ޔޫތު ޗެމްޕިއަންޝިޕް ކާމިޔާބު ކުރި ފުރަތަމަ ފަހަރެވެ. މިއަހަރުގެ 19 އަހަރުން ދަށުގެ ޔޫތު ޗެމްޕިއަންޝިޕް މާޒިޔާ އިން ކާމިޔާބު ކުރީ ކުޅުނު ހުރިހާ މެޗަކުން ވެސް މޮޅުވެގެންނެވެ.