އީގަލްސް ބަލިކޮށް މާޒިޔާ އިން ޗެރިޓީ ޝީލްޑް ކާމިޔާބު ކޮށްފި

ރާއްޖޭގެ ފުޓުބޯޅަ ސީޒަން ފަށަން ކުޅޭ ޗެރިޓީ ޝީލްޑް މެޗުގައި ކުލަބު އީގަލްސްގެ މައްޗަށް ކުރި ހޯދައި، މާޒިޔާ ސްޕޯޓްސް އެންޑް ރެކްރިއޭޝަން އިން ޗެރިޓީ ޝީލްޑް ކާމިޔާބު ކޮށްފި އެވެ.

ހޯމަ ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗު މާޒިޔާ އިން ކާމިޔާބު ކުރީ 2-0 އިންނެވެ. މެޗުގެ ފުރަތަމަ ހާފުގައި މާޒިޔާ އިން އެއް ލަނޑު ޖެހިއިރު، އަނެއް ލަނޑު އެ ޓީމުން ޖެހީ ދެ ވަނަ ހާފުގަ އެވެ.

މެޗު ފަށައިގެން ދެ ޓީމުން ވެސް ވަނީ ލަނޑު ޖަހަން ފުރުސަތު ތަކެއް ތަނަވަސް ކުރަން މަސައްކަތް ކޮށްފަ އެވެ. މެޗުގެ ފުރަތަމަ ހާފުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި މާޒިޔާ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު މާޒިޔާ އަށް ޖަހައިދިނީ އަޙުމަދު އައިހަމް އެވެ.

މެޗުގެ ދެ ވަނަ ހާފުގައި އީގަލްސް އިން ވަނީ ނަތީޖާ ހަމަހަމަ ކުރުމަށް ވަރަށް ބޮޑަށް މަސައްކަތް ކޮށްފަ އެވެ. އެގޮތުން އީގަލްސް އިން ލަނޑު ޖަހަން ފުރުސަތު ތަކެއް ތަނަވަސް ކުރި ނަމަވެސް، އެކަން ކާމިޔާބު ކުރެވޭ ގޮތެއް ނުވި އެވެ.

ދެ ވަނަ ހާފުގައި މާޒިޔާ އިން ވަނީ ދެ ވަނަ ލަނޑެއް ޖަހައި ލީޑު ފުޅާ ކޮށްފަ އެވެ. މެޗުގެ 67 ވަނަ މިނެޓުގައި މާޒިޔާ އަށް އެ ލަނޑު ޖަހައިދިނީ ނާއިޒް ޙަސަން (ދާދު) އެވެ. އެއީ އައިހަމް ތަނަވަސްކޮށްދިން ފުރުސަތެއްގައި ލިބުނު ބޯޅަ އަކުން ދާދު ޖެހި ލަނޑެކެވެ.

މިއީ މާޒިޔާ އިން ސީޒަން ފެށުމުގެ ގޮތުން ކުޅޭ ޗެރިޓީ ޝީލްޑް ކާމިޔާބު ކުރި ހަ ވަނަ ފަހަރެވެ. މީގެ ކުރިން އެންމެ ފަހުން ޗެރިޓީ ޝީލްޑް މެޗު ކުޅުނީ 2023 ވަނަ އަހަރުގެ ފުޓުބޯޅަ ސީޒަން ފެށުމަށެވެ. އެ ފަހަރުގެ ޗެރިޓީ ޝީލްޑް ވެސް ކާމިޔާބު ކޮށްފައި ވަނީ މާޒިޔާ އިންނެވެ. އޭގެ އިތުރުން 2015، 2016، 2017 އަދި 2021 ވަނަ އަހަރު ވެސް މާޒިޔާ އިން ވަނީ ޗެރިޓީ ޝީލްޑް ކާމިޔާބު ކޮށްފަ އެވެ.

ޗެރިޓީ ޝީލްޑް ކާމިޔާބު ކުރުމުން މާޒިޔާ އަށް އިނާމު ފައިސާގެ ގޮތުގައި 100،000 (އެއް ލައްކަ) ރުފިޔާ ލިބޭނެ އެވެ. އެ ފައިސާގެ ތެރެއިން ވަކި އިންސައްތައެއް މާޒިޔާ އިން ހަދިޔާ ކުރަނީ ބްލައިންޑް އެންޑް ވިޒުއަލީ އިމްޕެއާޑް ސޮސައިޓީ އޮފް މޯލްޑިވްސް އަށެވެ.

މާޒިޔާ އިން ޗެރިޓީ ޝީލްޑް ކާމިޔާބު ކޮށްފައިވާއިރު، އެންމެ ފަހުން އޮތް ދިވެހި ޕްރިމިއާ ލީގު ކާމިޔާބު ކުރީ ވެސް ކުލަބުންނެވެ. އޭގެ ފަހުން ރާއްޖޭގެ ފުޓުބޯޅަ ސީޒަން ހުއްޓިފައި އޮންނަތާ އަހަރަކަށް ވުރެ ގިނަ ދުވަސް ފަހުން، ބުރާސްފަތި ދުވަހުގެ ރޭ ދިވެހި ޕްރިމިއާ ލީގުގެ ކުޅުން ފަށާނެ އެވެ.