ޓެންޑަރ ބޯޑު މަސައްކަތް އެވޯޑްކުރެވޭނެ އަދަދު ކަނޑައަޅާނެ ގޮތުގެ އުސޫލު އާންމުކޮށްފި

ނޭޝަނަލް ޓެންޑަރ ބޯޑު މެދުވެރިކޮށް އިމާރާތްކުރުމުގެ މަސައްކަތްތަކަށް ބީލަން ހުޅުވައިލުމާއި، މަސައްކަތް އެވޯޑް ކުރެވޭނެ އަދަދު ކަނޑައަޅާނެ ގޮތުގެ އުސޫލު އާންމުކޮށްފިއެވެ.

މި އުސޫލަކީ އިމާރާތްކުރުމުގެ އަމަލީ މަސައްކަތްކުރާ ފަރާތްތަކުގެ ގަވާއިދުގައި ބަޔާންކޮށްފައިވާ، ދާއިރާތަކުގެ މަސައްކަތްތައް ބީލަމަށް ހުޅުވާލައި އެވޯޑްކުރުމުގައި، ނޭޝަނަލް ޓެންޑަރ ބޯޑުން އަމަލުކުރަންވީގޮތް ބަޔާންކުރުމުގެ ގޮތުން، ދައުލަތުގެ މާލިއްޔަތުގެ ގަވާއިދުގެ 10.06 ވަނަ މާއްދާގެ ދަށުން އެކުލަވައިލައިފައިވާ އުސޫލެކެވެ.

އެގޮތުން މި އުސޫލުގައި ހިމެނޭ ދާއިރާތަކަކީ ޖެނެރަލް ބިލްޑިންގ ކޮންސްޓްރަކްޝަންގެ މަސައްކަތް، ޖެނެރަލް ސިވިލް ކޮންސްޓްރަކްޝަންގެ މަސައްކަތް، ހާބަރ ކޮންސްޓްރަކްޝަންގެ މަސައްކަތް، ބިންހިއްކުމާއި ޑްރެޖިންގގެ މަސައްކަތް، ގޮނޑުދޮށް ޙިމާޔަތްކުރުމުގެ މަސައްކަތް، ފެނާއި ނަރުދަމާގެ މަސައްކަތް އަދި ކަރަންޓް އަދި ގޭހާ ގުޅުންހުރި މަސައްކަތްތަކެވެ.

މި އުސޫލުގެ މަގުސަދަކީ، ނޭޝަނަލް ޓެންޑަރ ބޯޑުން އެވޯޑްކުރާ މަސައްކަތްތައް ވީހާވެސް ގިނަ ފަރާތްތަކަށް ލިބުމަށް މަގުފަހިކުރުމެވެ. އަދި ނޭޝަނަލް ޓެންޑަރ ބޯޑުން ބީލަންވެރީންނަށް އެވޯޑްކުރާ މަސައްކަތްތައް، ކަނޑައެޅިފައިވާ މުއްދަތަށް ނިންމުމަށް ބާރުއަޅައި ޓެންޑަރ ބޯޑުން ބީލަންވެރިއަކަށް އެއްފަހަރާ ހަވާލުކުރެވޭނެ މަސައްކަތްތަކުގެ އަދަދު ކަނޑައެޅުމެވެ. މީގެ އިތުރުން އުސޫލުގައި ބަޔާންކޮށްފައިވާ ދާއިރާތަކުގެ މަސައްކަތްތަކަށް ކުރިމަތިލެވޭ ފަރާތްތައް ކަނޑައަޅައި މަސައްކަތްތަކުގެ ބީލަންތަކަށް ކުރިމަތިލެވޭ ގްރޭޑްތަކުގެ ވިޔަފާރިތައް ކަނޑައެޅުމަކީ ވެސް މި އުސޫލުގެ މަގުސަދެކެވެ.

މި އުސޫލުގެ ދަށުން، ބީލަމަކަށް ކުރިމަތިލާ ފަރާތަކީ، ބީލަމަށް ކުރިމަތިލާއިރު، ޢިމާރާތްކުރުމުގެ އަމަލީ މަސައްކަތްކުރާ ފަރާތްތަކުގެ ގަވާއިދުގެ ދަށުން ރަޖިސްޓަރީ ކޮށްފައިވާ ފަރާތަކަށް ވާންޖެހެއެވެ. ނަމަވެސް، ގަވާއިދުގެ ދަށުން ރަޖިސްޓަރީ ކޮށްފައި ނުވާ ބިދޭސީ ފަރާތެއް ނަމަ، ނުވަތަ ޖޮއިންޓް ވެންޗަރ ގޮތުގައި ބީލަމަށް ކުރިމަތިލާ ފަރާތެއް ނަމަ، ބީލަމަށް ކުރިމަތިލުމުގެ ކުރިން، ކުރިމަތިލާން ބޭނުންވާ ދާއިރާގެ ގިންތިއަށް ޝަރުތު ހަމަވާކަމަށް ބަޔާންކޮށްފައިވާ ގަވާއިދުގެ ދަށުން ލިޔުން ދޫކޮށްފައިވާނަމަ، އެ ފަރާތަކަށް ބީލަމަށް ކުރިމަތިލެވޭނެއެވެ. އަދި މި އުސޫލުގެ 1 ވަނަ މާއްދާގެ (ހ) ގައި ބަޔާންކޮށްފައިވާ ޖެނެރަލް ބިލްޑިންގ ކޮންސްޓްރަކްޝަންގެ މަސައްކަތްތަކަށް ބީލަމަށް ހުޅުވައިލަންވާނީ، ސަރުކާރުގެ ހިއްސާ އޮންނަ ވިޔަފާރިއަކަށް ބައިވެރި ނުވެވޭ ގޮތަށެވެ.

މި އުސޫލުގެދަށުން ބީލަމަށް ހުޅުވޭނީ އުސޫލުގެ 1 ވަނަ މާއްދާގެ (ހ) އާއި (ށ) ގައިވާ މަސައްކަތްތަކަށް، އިމާރާތްކުރުމުގެ އަމަލީ މަސައްކަތްކުރާ ފަރާތްތަކުގެ ގަވާއިދުގެ ދަށުން ދަރަޖަ 1 އިން ފެށިގެން ދަރަޖަ 5 ގެ ނިޔަލަށް ރަޖިސްޓަރީވެފައިވާ ކުންފުނިތަކަށް އެކަންޏެވެ. އަދި އުސޫލުގެ 1 ވަނަ މާއްދާގެ (ނ) އިން ފެށިގެން (އ) ގެ ނިޔަލަށް ބަޔާންކޮށްފައިވާ މަސައްކަތްތަކަށް، އިމާރާތްކުރުމުގެ އަމަލީ މަސައްކަތްކުރާ ފަރާތްތަކުގެ ގަވާއިދުގެ ދަށުން ބީލަމަށް ހުޅުވާލެވޭނީ ދަރަޖަ 1 އިން ފެށިގެން ދަރަޖަ 4 ގެ ނިޔަލަށް ރަޖިސްޓަރީވެފައިވާ ކުންފުނިތަކަށް އެކަންޏެވެ.

މި އުސޫލުގެ ދަށުން މަސައްކަތް އެވޯޑްކުރުމުގައި އެންމެ ގިނަވެގެން ހަވާލުކުރެވޭނެ މިންވަރު ނުވަތަ އަދަދު ކަނޑައެޅުމުގައި އަމަލުކުރާނެ ތާވަލު އުސޫލުގައި ހިމަނާފައިވާ އިރު، ޖުމުލަ އަގު ހިސާބުކުރުމުގައި ބަލާނީ، މަސައްކަތްތައް އެވޯޑުކޮށްފައިވާ އަގުތަކަށެވެ.

ނޭޝަނަލް ޓެންޑަރ ބޯޑު މެދުވެރިކޮށް އިމާރާތްކުރުމުގެ މަސައްކަތްތަކަށް ބީލަން ހުޅުވައިލުމާއި، މަސައްކަތް އެވޯޑް ކުރެވޭނެ އަދަދު ކަނޑައަޅާނެ ގޮތުގެ އުސޫލު އާންމުކޮށް އަމަލުކުރަން ފަށާފައި ވަނީ މަރޗް 16 ވަނަ ދުވަހުއެވެ.