ޓެންޑަރ ބޯޑަށް އެހެން ފަރާތެއްގެ ނުފޫޒު ފޯރުވުމުގެ ފުރުސަތެއް ނޯވޭ، ވަކިގޮތަކަށް ކަންކަން ނިންމުމަށް އަންގާފައެއް ނުވޭ: ޒަރިޔަންދު

ނޭޝަނަލް ޓެންޑަރ ބޯޑަށް އެހެން ފަރާތެއްގެ ނުފޫޒު އައުމުގެ ފުރުސަތެއް ނިޒާމު ހަމަޖެހިފައި އޮންނަ ގޮތުން ނޯންނަކަމަށާއި، ނުފޫޒަކާއެކު އަންނަ މެމްބަރަކަށް ވެސް ނުފޫޒާ އެއްގޮތަށް މަސައްކަތްކުރުމުގެ ބާރެއް ނޯންނަ ކަމަށް ޓެންޑަރ ބޯޑުގެ ކުރީގެ ޗެއަރމަން އިސްމާއީލް ޒަރިޔަންދު ވިދާޅުވެއްޖެއެވެ.

ނޭޝަަނަލް ޓެންޑަރ ބޯޑުގެ ޗެއަރމަންކަން މިދިޔަ އަހަރު ކުރެއްވުމަށްފަހު ޑިސެމްބަރ މަހުގެ 31 ވަނަ ދުވަހު ޒަރިޔަންދު ވަނީ ބޯޑުން އިސްތިއުފާ ދެއްވާފައެވެ. އޭގެފަހުން ޒަރިޔަންދު ވަނީ ބޭކާރު ޚަރަދާއި ކޮރަޕްޝަން ހުއްޓުވުމުގައި ޓެންޑަރ ބޯޑުގެ ދައުރާ ގުޅޭގޮތުން ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވާފައެވެ. ޕްރޮގްރާމްގައި ވާހަކަދައްކަވަމުން ޒަރިޔަންދު ވިދާޅުވީ ޓެންޑަރ ބޯޑުގެ މައްޗަށް އެއްވެސް ފަރާތަކަށް ވަކި ކަމެއް ވަކިގޮތަކަށް ކުރުމަށް ނޭންގޭނެކަމަށެވެ. މިހާރު މާލިއްޔަތު ގަވާއިދު އޮތްގޮތުން ކޯޓު ހުކުމަކުން ވަކިކަމެއް ކުރަން އެންގިކަމުގައި ވީނަމަވެސް ބޯޑަށް ވަކިގޮތަކަށް ކަންކަން ނުކުރެވޭނެ ކަމަށް ޒަރިޔަންދު ވިދާޅުވިއެވެ.

އެއީ މިހާރު ރިވިއު ކޮމިޓީއެއް އުފެދިފައި އޮންނާތީ ކަމަށާއި، ޓެންޑަރ ބޯޑާ ހަމައަށް އައުމުގެ ކުރިން ކަންކަން ރިވިއު ކޮމިޓީން ބަލާނެކަމަށް ޒަރިޔަންދު ވިދާޅުވިއެވެ. އަދި ރިވިއު ކޮމިޓީން އެންގިނަމަވެސް ޓެކްނިކަލް ޓީމުން އެކަންކަން ބަލާނެކަމަށް ޒަރިޔަންދު ވިދާޅުވިއެވެ.

ޒަރިޔަންދު ވިދާޅުވީ ޓެކްނިކަލް ޓީމުގައި ތިބޭނީ އެކަމާ ގުޅޭ އޮފީހެއްގެ ބަޔަކު ކަމަށެވެ. ފުރަތަމަ ޓެކްނިކަލް ޓީމުން އިވެލުއޭޓްކުރުމަށްފަހު ޓެންޑަރ ބޯޑަށް ކަންކަން އަންނައިރު ބޯޑުގައި ބިޑާ ގުޅޭގޮތުން ވާހަކަތައް ދެކެވޭނީ ޓެކްނިކަލް ރިޕޯޓަށް ބަލައިގެން ކަމަށް ޒަރިޔަންދު ވިދާޅުވިއެވެ.

ޕްރޮޖެކްޓްތައް އެވޯރޑްކުރުމުގައި ސަރުކާރުގެ އެއްވެސް ހިސާބަކުން އެއްވެސް ނުފޫޒެއް އާދޭތޯ ކުރެވުނު ސުވާލަށް ޖަވާބު ދެއްވަމުން ޒަރިޔަންދު ވިދާޅުވީ ނޭޝަނަލް ޓެންޑަރ ބޯޑަކީ ދައުލަތުގެ ވަކި އޮފީހެއް ނޫންކަމަށެވެ. އެ ބޯޑަކީ ފިނޭންސް މިނިސްޓަރުގެ މަސްއޫލިއްޔަތުގެ ތެރޭގައި ހިމެނޭކަންކަމަށް މަގުފަހިކުރުމަށްޓަކައި ރައީސުލްޖުމްހޫރިއްޔާ އެކުލަވާލައްވާ މެމްބަރުން އައްޔަނުކޮށްފައިވާ ބޯޑެއް ކަމަށެވެ.

އެހެންކަމުން ބޯޑުގެ މަސައްކަތްތައް މައިގަނޑު ގޮތެއްގައި ފެށޭނީ ފިނޭންސް މިނިސްޓަރުގެ މަސްއޫލިއްޔަތުތަކާ ހިސާބުންކަމަށެވެ. ބޯޑުގެ މަސައްކަތްތައް ނިމެނީ ރައްޔިތުންނަށް ޚިދުމަތްކުރުމަށްކަމަށް ޒަރިޔަންދު ވިދާޅުވިއެވެ.

ޒަރިޔަންދު ވިދާޅުވީ ޓެންޑަރ ބޯޑަށް ބިޑެއް ލިބުމުން އެންމެ ފުރަތަމަ ވެސް އަހަނީ އެކަން ގަބޫލުނުކުރަނީ ކޮން މެމްބަރެއްތޯ ކަމެވެ. މެމްބަރަކު ކަމެއް ގަބޫލުނުކުރާނަމަ ގަބޫލުނުކުރާ ސަބަބެއް އޮންނާނެކަމަށާއި، އެހެންކަމުން އެކަން ސާފުކުރުމަށް އަނެއްކާވެސް ކޮމިޓީއަށް ފޮނުވާލަނީ ކަމަށް ޒަރިޔަންދު ވިދާޅުވިއެވެ.