އެމްޓީޑީސީ ހިއްސާ ނުބަހާ، ބޯޑު މެމްބަރުންގެ އިސްތިއުފާއަށް ގޮވައިފި

ސަރުކާރުގެ ޓޫރިޒަމްގެ ވިޔަފާރި ކުންފުނި މޯލްޑިވްސް ޓްއަރިޒަމް ޑިވެލޮޕްމަންޓް ކޯޕަރޭޝަން (އެމްޓީޑީސީ) ހިއްސާދާރުންނަށް ހިއްސާގެ ފައިދާ ބަހަން ނުފެންނަ ކަމަށް ނިންމައިފިއެވެ.

މިގޮތަށް ނިންމީ ހޯމަ ދުވަހުގެ ރޭ އިސްލާމީ މަރުކަޒުގައި ބޭއްވި އެކުންފުނީގެ އަހަރީ އާންމު ޖަލްސާއަށް ހާޒިރުވި ހިއްސާދާރުންގެ 95.31 ޕަސެންޓުންނެވެ.

މިދިޔަ އަހަރު ސާފު ފައިދާގެ ގޮތުގައި 69.72 މިލިއަން ރުފިޔާ ލިބުނުއިރު، ހިއްސާ ބަހަން ނުފެންނަ ކަމަށް ނިންމުމުން ބައެއް ހިއްސާދާރުން ވަނީ ހިތް ހަމަނުޖެހުން ފާޅުކޮށްފައެވެ.

ހިއްސާދާރުންގެ ސުވާލުތަކަށް ޖަވާބު ދެއްވަމުން އެމްޓީޑީސީގެ އެމްޑީ އަބްދުﷲ ޝުޖާއު ވިދާޅުވީ އެކުންފުނީގެ ބޯޑުން މިއަހަރުވެސް ހިއްސާދާރުންނަށް ހިއްސާ ބަހަން ނުފެންނަ ކަމަށް ނިންމީ ކުންފުންޏަށް ލިބޭ އާމްދަނީ އަދިވެސް އިތުރުނުވާ ކަމަށާއި އަދި ސީއެމްޑީއޭ އިން ޑިވިޑެންޓް ދޫކުރެވޭނެ ކަމަށް ކަނޑައަޅާފައިވާ މިންވަރަށް ކުންފުނީގެ ސާފު ފާއިދާ ޖެއްސިފައި ނުވާ ކަމަށެވެ.

މިއަހަރުގެ ދެވަނަ ކުއާޓަރގައި އެމްޓީޑީސީއަށް ފައިދާގެ ގޮތުގައި 6.7 މިލިއަން ރުފިޔާ ލިބިފައެވެ.

އެކުންފުނީގެ މިއަހަރުގެ ދެވަނަ ކުއާޓަރގެ މާލީ ބަޔާނަށް ބަލާއިރު، ވަގުތީ ސާފު ފައިދާގެ ގޮތުގައި 434,655 ޑޮލަރު, ދިވެހި ފައިސާއިން ބަލާނަމަ، 6.7 މިލިއަން ރުފިޔާ ވަނީ ލިބިފައެވެ.

މި މުއްދަތުގެ ތެރޭގައި އެމްޓީޑީސީއަށް ޖުމްލަ އާމްދަނީގެ ގޮތުގައި އެއް މިލިއަނަށްވުރެ ގިނަ ޑޮލަރު، ނުވަތަ 16.8 މިލިއަން ރުފިޔާ ލިބިފައިވެއެވެ.

އަދި 2016 ވަނަ އަހަރު ފައިދާގެ ގޮތުގައި 69.7 މިލިއަން ރުފިޔާ ލިބުނުއިރު 2015 ވަނަ އަހަރު އެ ކުންފުންޏަށް 93.7 މިލިއަން ރުފިޔާގެ ފައިދާއެއް ލިބިފައިވެއެވެ.

އެމްޓީޑީސީގެ ހިއްސާދާރުންނަށް 2009 ވަނަ އަހަރުގެ ފަހުން ހިއްސާގެ ފައިދާ ބަހާފައިނުވާއިރު ރޭގެ ޖަލްސާގައި ބޯޑު މެމްބަރުގެ އިސްތިއުފާ އަށް ވަނީ ގޮވާފައެވެ.