އެންޓި ކޮރަޕްޝަން ކޮމިޝަން (އޭސީސީ)ގެ މެމްބަރުކަމުގެ މަގާމުން އިސްތިއުފާ ދެއްވި އެ ކޮމިޝަންގެ މެމްބަރު އަލީ އަޝްރަފް ޓެންޑަރ ބޯޑުގެ ޗެއަރމަނަކަށް ހަމަޖައްސައިފިއެވެ.

އަޝްރަފް މަގާމުން އިސްތިއުފާ ދެއްވީ ޕާރފޯމަންސް އޮޑިޓަކަށްފަހު އޭސީސީގެ މެމްބަރުން ވަކިކުރުމަށް މިނިވަން މުއައްސަސާތަކާއި ބެހޭ ކޮމިޓީން 11 ނޮވެންބަރު 2021 ގައި ނިންމާފައިވަނިކޮށެވެ. ކޮމިޓީގެ ބައްދަލުވުމުގައި މިގޮތަށް ނިންމާފައިވަނީ، އެ ކޮމިޝަނުން މައްސަލަތައް ބެލުމުގައި ލަސްކަމާއި، ތަކުރާރުކޮށް މިނިވަން މުއައްސަސާތަކާއި ބެހޭ ކޮމިޓީއަށް ހާޒިރު ކުރުމަށް ފަހު، ހޯދި މައުލޫމާތުތަކުގެ މައްޗަށް ބިނާކޮށެވެ.

އޭސީސީގެ މެންބަރުކަމަށް އަޝްރަފް އައްޔަން ކޮށްފައި ވަނީ 2019 ވަނަ އަހަރުގެ ސެޕްޓެމްބަރު މަހުގެ ތެރޭގައެވެ. މައުލޫމާތު ލިބިފައިވާ ގޮތުގައި އޭނާ އިސްތިއުފާ ދެއްވީ އަމިއްލަ ސަބަބުތަކަކާ ހުރެއެވެ.

ފިނޭންސް މިނިސްޓްރީގެ ދަށުން އޮންނަ ޓެންޑަރ ބޯޑުގެ ޗެއަރ އަކަށް އަޝްރަފް ހަމަޖައްސާފައިވާއިރު، އެކަމާއި ގުޅޭގޮތުން ރާއްޖެއެމްވީއާއި ވާހަކަ ދައްކަވަމުން ފިނޭންސް މިނިސްޓްރީގެ އޮފިޝަލަކު ވިދާޅުވީ، ޓެންޑަރ ބޯޑުގެ މެމްބަރުންގެ ދައުރު ހަމަވަނީ ކޮންމެ އަހަރެއްގެވެސް ޑިސެމްބަރުގައި ކަމަށެވެ. އެގޮތުން ކުރިން ތިއްބެވި މެމްބަރުންގެ ދައުރު ހަމަވެފައިވާއިރު، އޭގެ ތެރެއިން 3 މެމްބަރެއް އައު ދައުރަށްވެސް ވަނީ އައްޔަނު ކުރައްވާފައެވެ. އަދި މުޅިން އަލަށް 4 މެމްބަރަކު އައްޔަނު ކުރައްވާފައިވާއިރު، އޭގެ ތެރޭގައި އަޝްރަފްވެސް ހިމެނިވަޑައިގަންނަވާކަމަށެވެ.

ފިނޭންސް މިނިސްޓަރު ވަނީ އަޝްރަފް ޓެންޑަރ ބޯޑުގެ ޗެއަރމަނަކަށް އައްޔަނު ކުރައްވާފައެވެ.

ޓެންޑަރ ބޯޑުގެ ޗެއަރމަންއަކަށް ކުރިން ހުންނެވީ އިސްމާއީލް ޒަރިޔަންދުއެވެ. ނޭޝަނަލް ޓެންޑަރިންގ ބޯޑުގެ މަސައްކަތްތައް ވީހާވެސް ދެފުށް ފެންނަ ގޮތަކަށް ކުރުމަށް ގިނަ މަސައްކަތްތަކެއް ކޮށްފައިވާތަން ފެންނަކަމަށް ޒަރިޔަންދު ވަނީ ވިދާޅުވެފައެވެ.

ޓެންޑަރ ބޯޑަށް 2018 ވަނަ އަހަރުގެ ކުރީގައި މުޅިން ވެސް އައްޔަނުކޮށްފައިވަނީ ފިނޭންސް މިނިސްޓްރީގެ މުވައްޒަފުންނެވެ. ނަމަވެސް ބޯޑުގެ މަސައްކަތްތައް ވީހާވެސް ދެފުއް ފެންނަ ގޮތަކަށް ކުރުމަށްޓަކައި މައިގަނޑު ބަދަލެއްގެ ގޮތުގައި ރައީސުލްޖުމްހޫރިއްޔާ އިބްރާހިމް މުޙައްމަދު ސޯލިޙު ގެންނެވި ބަދަލަކީ ފިނޭންސް މިނިސްޓްރީގެ މަސައްކަތްތަކާއި ދުރު މީހަކު ޓެންޑަރ ބޯޑުގެ ޗެއަރއަކަށް ބެހެއްޓުމެވެ.

ނޭޝަނަލް ޓެންޑަރ ބޯޑަކީ ދައުލަތުގެ ވަކި އޮފީހެއް ނޫނެވެ. އެ ބޯޑަކީ ފިނޭންސް މިނިސްޓަރުގެ މަސްއޫލިއްޔަތުގެ ތެރޭގައި ހިމެނޭކަންކަމަށް މަގުފަހިކުރުމަށްޓަކައި ރައީސުލްޖުމްހޫރިއްޔާ އެކުލަވާލައްވާ މެމްބަރުން އައްޔަނުކޮށްފައިވާ ބޯޑެކެވެ.