ޕްރޮޖެކްޓްތައް އެވޯރޑްކުރާއިރު ބަލާ ކަންކަން ބެލުމުގައި ނޭޝަނަލް ޓެންޑަރ ބޯޑަށް އައުމަށްފަހު ގަވާއިދުގެ ތެރެއަށް ކަންކަން ފައްތަން ޖެހުނު
އިސްމާއީލް ޒަރިޔަންދު ފަލަސުރުޚީ ޕްރޮގްރާމްގައި ވާހަކަދައްކަވަނީ
ޕްރޮޖެކްޓްތައް އެވޯރޑްކުރާއިރު ބަލާ މާލީ ގާބިލުކަމާއި ތަޖުރިބާގެ ކަންކަމާއި ފަންނީ ކަންކަން ބެލުމުގައި ނޭޝަނަލް ޓެންޑަރ ބޯޑަށް އައުމަށްފަހު ގަވާއިދުގެ ތެރެއަށް ކަންކަން ފައްތަން ޖެހުނު ކަމަށް ނޭޝަނަލް ޓެންޑަރ ބޯޑުގެ ކުރީގެ ޗެއަރމަން އިސްމާއީލް ޒަރިޔަންދު ވިދާޅުވެއްޖެއެވެ.
ރާއްޖެޓީވީގެ "ފަލަސުރުޚީ" ޕްރޮގްރާމްގައި އެކަމާ ގުޅޭގޮތުން ވާހަކަދައްކަވަމުން ޒަރިޔަންދު ވިދާޅުވީ އެބަދަލުތަކާ ގުޅިގެން ބައެއް ފަރާތްތަކުގެ ހިތްހަމަނުޖެހުންތަކެއް ވެސް ހުރިކަމަށެވެ. މާލީ ގާބިލުކަން ބެލުމުގައި ބަލަނީ ކުންފުނީގެ ލިކުއިޑް އެސެޓް ހުންނަ މިންވަރަށްކަމަށް ޒަރިޔަންދު ވިދާޅުވިއެވެ. އެ ކުންފުންޏެއްގެ އަތުގައި ހުންނަ ދައުރުވާ މުދަލާއި ލަޔަބިލިޓީ އާ ދެބައި އަޅާ ކަނޑާއިރު ވަކި މިންގަނޑެއްގެ ތެރޭގައި ހުންނަންޖެހޭނެކަމަށް ޒަރިޔަންދު ވިދާޅުވިއެވެ.
މިއީ ބިޑް ޑޮކިޔުމެންޓްގައި ވެސް ބުނެފައި އޮންނަ ވާހަކައެއް ކަމަށާއި، އެވަަރަށް އެ ކުންފުންޏެއްގެ އަތުގައި މުދާ ނެތްކަމަށްވާނަމަ ޖެހޭނީ ކޮންމެވެސް ފަރާތަކުން ގެރެންޓީއެއް ގެންނަންކަމަށް ޒަރިޔަންދު ވިދާޅުވިއެވެ.
މީގެއިތުރުން ދެން ދިމާވާ މައްސަލައަކީ ބިޑް ޑޮކިޔުމެންޓްގައި ލިޔެފައި ނެތް ގޮތްތަކަށް އަމަލުކުރުން ކަމަށް ޒަރިޔަންދު ވިދާޅުވިއެވެ. ތަޖުރިބާގެ ކަންތަކުގައި ވަރަށް ގިނަ ފަހަރު ކުންފުނިތަކުން ނެތް ތަޖުރިބާ ހިމަނާފައި ހުންނަކަަމަށް ޒަރިޔަންދު ވިދާޅުވިއެވެ.
ނަމަވެސް އެޓަރނީ ޖެނެރަލްގެ ލަފައެއް ބިޑް ކުރުމުގައި ބަލަންޖެހޭނީ ބޮޑު ޑޮކިޔުމަންޓަކަށް ކަމަށް އޮންނަ ކަމަށް ޒަރިޔަންދު ވިދާޅުވިއެވެ. އެހެންކަމުން ފޮޓޯ އޮތަސް އެއީ ހެއްކެއްގެ ގޮތުގައި ބޭނުންނުކުރެވޭ ކަމަށް ޒަރިޔަންދު ވިދާޅުވިއެވެ. އެހިސާބުން އޮޅުވާލި މައްސަލައެއްގެ ގޮތުގައި އެ މައްސަލަ ހުށަހަޅައިގެން ކުރިޔަށް ގެންދަންޖެހެނީ ކަމަށް ޒަރިޔަންދު ވިދާޅުވިއެވެ. މިފަދަ ކަންކަން ޒަމާނާ އެއްގޮތަށް ބަދަލު ގެންނަންޖެހޭކަމަށް ޒަރިޔަންދު ވިދާޅުވިއެވެ.
ބިޑްތައް އެކި ފަރާތްތަކަށް ދިނުމުން އާންމު ފަރާތްތަކުން ކިޔާ ފާޑުކިޔުންތަކާއި ނޫސްތަކުގައި އެކަންކަމާ ގުޅޭގޮތުން ލިޔެފައި ހުންނަ ލިޔުންތަކާ ގުޅޭގޮތުން ކުރެވުނު ސުވާލަށް ޖަވާބު ދެއްވަމުން ޒަރިޔަންދު ވިދާޅުވީ ނޭޝަނަލް ޓެންޑަރ ބޯޑުން ސީދާ ގޮތުން އާންމުންނަށް ޖަވާބު ދާރީ ނުވާނެކަމަށެވެ. ޓެންޑަރ ބޯޑުން ކުރާ ކަންކަމަށް ޖަވާބުދާރީ ވާނީ ފިނޭންސް މިނިސްޓްރީން ކަމަށް ޒަރިޔަންދު ވިދާޅުވިއެވެ.
އާންމު ގޮތެއްގައި ނޫސްތަކުގައި ހުންނަ ލިޔުންތަކަކީ ބިޑްތައް ކާމިޔާބުނުވާ ފަރާތްތަކުގައި ހުންނަ މައުލޫމާތަށް އެކަނި ބަލައިގެން ލިޔާ މައުލޫމާތުތައް ކަމަށް ޒަރިޔަންދު ވިދާޅުވިއެވެ. ފުރިހަމައަށް އެކަންކަން ގެންނަނަމަ ޓެންޑަރ ބޯޑުގެ ސެކެޓްރޭޓިއަޓްގެ ފަރާތުން ވެސް ބަހެއް ހޯދައިގެން އެކަންކަން ގެނެސްދޭންޖެހޭނެކަމަށް ގަބޫލުކުރައްވާކަމަށް ޒަރިޔަންދު ވިދާޅުވިއެވެ.
މާލިއްޔަތު ގަވާއިދުގައި ބުނެފައި އޮންނަނީ އަބަދުވެސް ޕްރޮޖެކްޓް އެވޯރޑް ކުރެވެންޖެހޭނީ މާލިއްޔަތު ގަވާއިދުގެ ހަމަތަކުގެ މަތިން ފާސްވާ އެންމެ ކުޑަ އަގު އޮންނަ ފަރާތަކަށް ކަމަށެވެ. އެހެންކަމުން އެވޯރޑް ކުރާނީ ފާސްވާ އެންމެ ކުޑަ އަގުކަމަށް ޒަރިޔަންދު ވިދާޅުވިއެވެ. ފާސްވާ އެންމެ ކުޑަ އަގުގެ މާނައަކީ އެބަޔަކު ވާންޖެހެނީ ބިޑް ޑޮކިޔުމަންޓްގައި ކަނޑައެޅިފައި އޮންނަ ރިކުއަރމެންޓްތަކުގެ ޝަރުތުތަކަށް ފެތޭ ބަޔަކަށްކަމަށް ޒަރިޔަންދު ވިދާޅުވިއެވެ.
ޒަރިޔަންދު ވިދާޅުވީ ޓެންޑަރ ބޯޑަށް ބިޑްތައް އަންނަނީ ޓެކްނިކަލް ޓީމުން އިވެލުއޭޓްކުރުމަށްފަހު ކަމަށެވެ. އެކޮމިޓީގެ ރިޕޯޓަށް ބަލައިގެން ނޫން ގޮތަކަށް ބިޑްގެ ވާހަކަ ޓެންޑަރ ބޯޑަށް ނުދެއްކޭނެކަމަށް ޒަރިޔަންދު ވިދާޅުވިއެވެ. ކުޑަ އަގެއް ޖަހާފައި އޮތް ކުންފުނި ފެއިލްވެފައިވާ ކަަމަށްވާނަމަ އެކުންފުނި ފެއިލްވީ ކިހިނެއްތޯ ބަލާނެކަމަށް ޒަރިޔަންދު ވިދާޅުވިއެވެ. އެހެން ބަލާއިރު ކުންފުނި ފެއިލްވީ ރަނގަޅަށްކަން ސާބިތުވެއްޖެނަމަ އެއަގެއް އެވޯޑް ކުރުމުގެ މަރުހަލާގައި ބޭނުންނުކުރާނެ ކަމަށް ޒަރިޔަންދު ވިދާޅުވިއެވެ.
