ދުނިޔޭގެ ބާޒާރުގައި ތެލުގެ އަގުބޮޑުވެ އެސްޓީއޯއިން ތެޔޮ ވިއްކާ އަގު އުފުލިއްޖެ

އެސްޓީއޯއިން ރާއްޖޭގައި ތެޔޮވިއްކާ އަގުތަކަށް ބަދަލުގެނެސްފައިވާކަމަށް އެ ކުންފުނިން އަންގާރަ ދުވަހު ހާމަކޮށްފިއެވެ.

ހަތަރުމަސް ކުރިން ދުނިޔޭގެ ބާޒާރުގައި ތެޔޮފީފާއެއްގެ އަގު ހުރި މިންވަރާއަޅާބަލާއިރު ތެޔޮފީފާއެއްގެ އަގު ދުނިޔޭގެ ބާޒާރުގައި މިހާރުވަނީ ދެގުނައަށް ބޮޑުވެފައެވެ.

އެސްޓީއޯއިން ނެރުނު ބަޔާނެއްގައި ބުނެފައިވަނީ ދުނިޔޭގެ ބާޒާރުގައި ތެލުގެ އަގަށް މިއައި ބޮޑު ބަދަލާއެކު، އެ ކުންފުނިން ފޯރުކޮށްދެމުންދާ ތެލުގެ ޚިދުމަތް ދެމެހެއްޓެނިވި ގޮތެއްގައި ދިނުމަށްޓަކައި 16 މާރިޗު 2021 ން ފެށިގެން އެ ކުންފުނީގެ ސަބްސިޑިއަރީ ކުންފުނި ފިއުލް ސަޕްލައި މޯލްޑިވްސްގެ ޝެޑްތަކުން ވިއްކާ ތެލުގެ އަގަށް ބަދަލުގެނެސްފައިވާކަމަށެވެ.

މި ބަދަލާއެކު ފިއުލް ސަޕްލައި މޯލްޑިވްސްގެ ޝެޑްތަކުން ޑީސަލް ވިއްކުމަށް ހަމަޖެހިފައިވަނީ ލީޓަރެއް 9.79 (ނުވަ ރުފިޔާ ހަތްދިހަ ނުވަ ލާރި) އަށެވެ. އަދި ޕެޓްރޯލް ލީޓަރެއް 8.85 (އަށް ރުފިޔާ އަށްޑިހަ ފަސްލާރި) އަށެވެ.

މި ގެނެވުނު ބަދަލުގައި ޑީސަލް ލީޓަރަކުން ބޮޑުވެފައިވަނީ 60 ލާރިއެވެ. އަދި ޕެޓްރޯލް ލީޓަރަކުން ބޮޑުވެފައިވަނީ 41 ލާރިއެވެ.

އެސްޓީއޯއިންވަނީ ކޮވިޑްގެ ބަލިމަޑުކަމުގެ ތެރޭގައި މިދިޔަ އަހަރުވެސް ތެލުގެ އަގު ހެޔޮކޮށްފައެވެ. އަދި ކުންފުނީގެ ހިންގުން ހަރުދަނާކޮށް ނިމިގެންދިޔަ ދެ އަހަރުވެސް ސާފު ފައިދާ އިތުރުކޮށްފައެވެ.