ލޯނު އުސޫލުން މުޖުތާޒާއި ޖުނައިދު ސަސްއަށް

ލޯނު އެއްބަސްވުމެއްގެ ދަށުން މާޒިޔާ ސްޕޯޓްސް އެންޑް ރެކްރިއޭޝަނުގެ ޑިފެންޑަރު މުޖުތާޒް މުޙައްމަދު (މުޖޭ) އާއި މިޑްފީލްޑަރު އަބްދުﷲ ޖުނައިދު (ޖެންނޭ) ސުޕަ ޔުނައިޓެޑް ސްޕޯޓްސް (ސަސް) އަށް ބަދަލުވެއްޖެއެވެ.

މާޒިޔާއިން މައުލޫމާތުދޭ ގޮތުގައި އެ ދެ ކުޅުންތެރިން ސަސްއަށް ބަދަލުވީ ލޯނު އުސޫލުން މި ސީޒަނުގެ ނިޔަލަށެވެ. އަދި ލޯނު އެއްބަސްވުމެއްގެ ދަށުން ޒުވާން ދެ ކުޅުންތެރިން ކުލަބު ބަދަލުކުރީ، މި ސީޒަނުގެ ބާކީ ބައިގައި ކުޅުމުގެ ފުރުސަތު ގިނައިން ހޯދުމަށް ކަމަށްވެސް މާޒިޔާއިން މައުލޫމާތުދެއެވެ.

ޤައުމީ ފުޓްބޯޅަ ޓީމުގައިވެސް ހިމެނޭ މުޖުތާޒް މީގެ ކުރިން ވަނީ ކުލަބު ވެލެންސިއާ އާއި ކުލަބު އީގަލްސްއަށްވެސް ކުޅެފައެވެ. އަދި އީގަލްސް ދޫކޮށް އޭނާ މާޒިޔާއާ ގުޅުނީ 2018 ވަނަ އަހަރެވެ. މީގެ އިތުރުން ތިންވަނަ ޑިވިޝަން ފުޓްބޯޅަ މުބާރާތުން ވިދާލި ޖުނައިދު މީގެ ކުރިން ވަނީ މާޒިޔާގެ ޔޫތު ޓީމުގައި މޮޅު ކުޅުމެއް ދައްކާފައެވެ. އެކަމަކު މި ސީޒަނުގައި މާޒިޔާއިން ވަރުގަދަ ސްކޮޑެއް އެކުލަވާލުމާއެކު، ޒުވާން ދެ ކުޅުންތެރިންނަށްވެސް ފުރުސަތު ލިބުން ވަނީ މަދުވެފައެވެ.

މުޖުތާޒާއި ޖުނައިދު ސަސްއާ ގުޅުނުއިރު، މި ސީޒަނުގައި މުޅިން އަލަށް ފުރަތަމަ ޑިވިޝަނުގައި ވާދަކުރަމުން އަންނަ ސަސްއިން މިހާތަނަށް ވަނީ ރަނގަޅު ނަތީޖާތަކެއް ނެރެފައެވެ. އެގޮތުން މި ސީޒަނަށް އަޙްމަދު ނާޝިދު (ނާދު) ގެ އިރުޝާދުގެ ދަށުން ސަސް ކުރިމަތިލިއިރު، ނާދުގެ ކޯޗުކަމުގައި ސަސްއިން ވަނީ މޮޅު ކުޅުމެއް ދައްކާފައެވެ. އެކަމަކު މި އަހަރުގެ ޖެނުއަރީ މަހު ސަސްއިން ވަނީ ނާދުގެ އެއްބަސްވުން ދެ ފަރާތް އެއްބަސްވެގެން އުވާލައި، އެ ޓީމުގެ ކޯޗަކަށް އީގަލްސްގެ ކުރީގެ ކޯޗު މުޙައްމަދު ޝިޔާޒް (މޯހަން) ހަމަޖައްސާފައެވެ.

ކޮވިޑް-19 ގެ ކޭސްތައް މާލެ ސިޓީގައި އިތުރުވުމާއެކު ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ނެރުނު އައު އުސޫލުތަކާ ގުޅިގެން މިދިޔަ ފެބްރުއަރީ މަހުގެ ތިންވަނަ ދުވަހު ދިރާގު ދިވެހި ޕްރިމިއާ ލީގުގެ ކުޅުން މެދުކަނޑާލާފައިވާއިރު، ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން އަންނަނީ ލީގު އަލުން ފެށުމަށް މަސައްކަތްކުރަމުންނެވެ. ދެވަނަ ބުރުގެ މެދުތެރެއިން ލީގު މެދުކަނޑާލިއިރު ސަސް އޮތީ ތާވަލުގެ ހަވަނައިގައި ކުޅުނު އަށް މެޗުން ލިބުނު އަށް ޕޮއިންޓާއެކުއެވެ.