ސިޔާސީ މަޤްސަދެއް ހާސިލުކުރުމުގެ ބޭނުމުގައި ދިވެހި ސިފައިންގެ އަގު ވައްޓާލަން މަސައްކަތް ކުރުން ބަލައެއް ނުގަނެވޭ: ޑިފެންސް މިނިސްޓަރ
15 މާރިޗު 2021 | ހޯމަ 09:44ހަގީގަތާ ޚިލާފު ދޮގު ޚަބަރު ފެތުރުން ބަލައެއް ނުގަނެވޭ
ޑިފެންސް މިނިސްޓަރ މާރިޔާ އަހުމަދު ދީދީ
ސިޔާސީ މަގްސަދެއް ހާސިލްކުރުމުގެ ބޭނުމުގައި ދިވެހި ސިފައިންގެ އަގު ވައްޓާލަން މަސައްކަތް ކުރުމަކީ ވަރަށް ދަށުދަރަޖައިގެ އަމަލެއް ކަމަށް ޑިފެންސް މިނިސްޓަރ އަލްއުސްތާޛާ މާރިޔާ އަޙްމަދުދީދީ ވިދާޅުވެއްޖެއެވެ.
މިނިސްޓަރ މިހެން ވިދާޅުވީ އުތުރު ތިލަފަޅު ތަރައްގީކުރުމަށް އިންޑިޔާ ސަރުކާރާއެކު ދިވެހިރާއްޖޭގެ ސަރުކާރުން ހަދާފައިވާ އެއްބަސްވުންކަމަށް ބުނެ މިހާރު ދައުރުވަމުންދާ ލިޔުމަށް ނިސްބަތްކުރައްވައެވެ.
ޑިފެންސް މިނިސްޓްރީންވެސްވަނީ ދައުރުވަމުންދާ ލިޔުމަކީ ހަގީގަތާ ޚިލާފު ދޮގު ލިޔުމެއް ކަމަށް ބުނެފައެވެ.
ލިޔުން ލިބިފައިވަނީ އަސްކަރިއްޔާގެ އިސްވެރިއެއްގެ ފަރާތުން ކަމަށްބުނެ ފަތުރަމުންދާ ވާހަކައަށް ރައްދުދެއްވައި މިނސްޓަރ ވިދާޅުވީ، ހަގީގަތާ ޚިލާފު ދޮގު ޚަބަރު ފެތުރުމަކީ ބަލައިގަނެވޭނެ ކަމެއް ނޫންކަމަށެވެ.
އުތުރު ތިލަފަޅުގެ އެގްރީމެންޓްގެ ޑްރާފްޓް ކޮޕީއެއް ކަމަށް ބުނެ މިއަދު މީސްމީޑިއާގައި ދައުރުވަމުންދާ ލިޔުމުގައި ބުނާ ގޮތުން އެތަނުގައި އިންޑިއާގެ އަސްކަރީ ފަރާތްތައް އެތަނުގައި ހަތިޔާރާއެކު ތިބެވޭނެ ކަމަށެވެ. އަދި އެ ފަރާތްތަކަށް ސަލާމަތާ ރައްކާތެރިކަން ފުރިހަމައަށް ދިވެހި ސަރުކާރުން ފޯރުކޮށްދޭންޖެހޭއިރު އެ ފެސިލިޓީ އިތުރު ފަރާތަކުން ވިޔަފާރީގެ ގޮތުގައި ބޭނުންކުރަން ދޭ ނަމަވެސް އިންޑިޔާއާއެކު މަޝްވަރާކުރަން ޖެހޭނެ ކަމަށެވެ.
ރާއްޖޭގެ ކޯސްޓް ގާޑުގެ ކެރިކުޅަދާނަކަން އިތުރުކުރުމަށްޓަކައި މާލެއަތޮޅު އުތުރު ތިލަފަޅުގައި އިންޑިޔާގެ އެހީގައި "ސިފަވަރު" ގެ ނަމުގައި ގާއިމްކުރާ ކޯސްޓްގާޑް ބަނދަރާއި ސާރވިސް ޑޮކްޔާޑުގައި ބޭރުގެ އަސްކަރީ އެއްވެސް ބަޔަކު ނުތިބޭނެކަމުގެ ޔަގީންކަން ދިވެހި ސިފައިން ވަނީ ދީފައެވެ. ދިވެހި ސިފައިން ބުނެފައިވަނީ މި ބަނދަރުގައި ތިބޭނީ ދިވެހި ސިފައިންނާއި ދިވެހި މުވައްޒަފުން ކަމުގައެވެ. އެ ބަނދަރަކީ ރާއްޖޭގެ ކޯސްޓްގާޑުގެ އުޅަނދުތައް ބަނދަރުކޮށް މަރާމާތުކުރުމަށް ހަދާ ތަނެއްކަމަށާއި ބޭރުގެ އަސްކަރީ އެއްވެސް ބަޔަކު ގާއިމުވެގެން ނުތިބޭނެކަން ވެސް ސިފައިން ފާހަގަކޮށްފައިވެއެވެ.
އޭގެ އިތުރުން، ކޯސްޓްގާޑް ބަނދަރާއި ޑޮކްޔާޑަކީ 2013 ވަނަ އަހަރުން ފެށިގެން ކުރެވުނު މަސައްކަތަށްފަހު، 2016 ވަނަ އަހަރުގެ އެޕްރީލް މަހު ކުރީގެ ރައީސް ޔާމީން އިންޑިއާއަށް ކުރެއްވި ދަތުރުފުޅުގައި ސޮއިކުރެވުނު ޑިފެންސް އެކްޝަން ޕްލޭން އޮން ޑިފެންސް ކޯޕަރޭޝަނުގެ ތެރޭގައި ވެސް ހިމެނޭ ކަމެކެވެ.
