ފުޑް ކޯޓުން ސްލޮޓް ނަގަން ބޭނުންވާ ފަރާތްތަކަށް ޕްރޮޕޯސަލް ހުށަހެޅުމަށް ހުޅުވާލައިފި
މި މަހުގެ 22 ވަނަ ދުވަހުގެ 14:00 ކުރިން ޕްރޮޕޯސަލް ހުށަހަޅަން ޖެހޭ
ފުޑްކޯޓް
މާލޭ ހާބަރު ފުޑް ކޯޓުން ސްލޮޓް ނަގަން ބޭނުންވާ ފަރާތްތަކަށް ޕްރޮޕޯސަލް ހުށަހެޅުމަށް ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) ހުޅުވާލައިފިއެވެ.
އެސްޓީއޯ އިން ބުނީ ކުއްޔަށް ދޫކުރުމަށް ހަމަޖެހިފައިވަނީ އަމީނީމަގުގައި ހުންނަ ބްލޮކް 1 ގެ ދެވަނަ ޔުނިޓާއި އިއްޒުއްދީން މަގުގައި ހުންނަ ހަތަރު ވަނަ ބްލޮކްގެ 23 އަދި 26 ވަނަ ޔުނިޓް ކަަމަށެވެ. އަދި މި މަހުގެ 22 ވަނަ ދުވަހުގެ 14:00 ކުރިން އެސްޓީއޯ ހެޑް އޮފީހުގެ ރިޝެޕްޝަނަށް ޕްރޮޕޯސަލް ހުށަހެޅުމަށް އެދޭ ކަމަށެވެ.
އެ ޔުނިޓްތައް ބަލަން ބޭނުންވާ ފަރާތްތަކުން 16 މާރޗް އިން 18 މާރޗް އަށް މެންދުރު 14:00ން 15:00ށް އެ ޔުނިޓް ބަލައިލެވޭނެކަން ފާހަގަކޮށް އެސްޓީއޯއިން ބުނީ ޕްރޮޕޯސަލް ހުށަހެޅުމަށް ބޭނުންވާ ފަރާތްތަކުން އިތުރަށް މައުލޫމާތު ސާފުކުރުމަށް އެދޭނަމަ 15 މާރޗް އިން 21 މާރޗް އަށް admin.properties@sto.mv އަށް މެއިލް ކުރުމަށް ނުވަތަ 3344275، 3344202 މި ނަންބަރަށް ގުޅުމަށް އެދޭ ކަމަށެވެ.
ފުޑް ކޯޓުން ސްލޮޓް ނަގަން ބޭނުންވާ ފަރާތްތަކަށް ޕްރޮޕޯސަލް ހުށަހެޅުމަށް ހުޅުވާލާފައިވާއިރު ކުރިން ނަގަމުން އައި ބައެއް ފީތައް ނުނަގަން މިހާރު ނިންމާފައިވާ ކަމަށް އެސްޓީއޯ އިން ބުނެއެވެ. އެގޮތުން، ކުރިން ނަގަމުން އައި 100،00ރ. ގެ ބިޑް ސެކިއުރިޓީ އާއި އެޑްވާންސް ކުލި ނުނަގަން ނިންމާފައިވާ ކަމަށާއި ކުރިން ތިން މަހުގެ ސެކިއުރިޓީ ޑިޕޮޒިޓް ނެގި ނަމަވެސް މިހާރު ނަގާނީ ދެ މަހުގެ ސެކިއުރިޓީ ޑިޕޮޒިޓް ކަމަށް އެ ކުންފުނިން ބުންޏެވެ.
ފުޑް ކޯޓުގެ ގޮޅިތަކަށް އެދި ހުށަހަޅާ ފަރާތްތަކުގެ ތެރެއިން ބިޑް ކާމިޔާބުކުރާ ފަރާތްތަކުން ހަތް ދުވަހުގެ ތެރޭގައި ސެކިއުރިޓީ ޑިޕޮސިޓްގެ ގޮތުގައި ދެ މަސް ދުވަހުގެ ކުލި އެޑްވާންސްކޮށް ދައްކަން ޖެހޭނެއެވެ. އެއީ އަކަފޫޓެއް 39ރ. ގެ ރޭޓުންނެވެ. ކުރިން އަކަފޫޓަކަށް 53ރ. ދައްކަން ޖެހެއެވެ.
ފުޑް ކޯޓުގައި ހިންގާ ރެސްޓޯރަންޓްތަކާއި ކެފޭތަކަށް ފަރުނީޗަރު ފޯރުކޮށްދޭނީ އެސްޓީއޯއިންނެވެ. އެ ޔުނިޓްތައް ހިންގާ ފަރާތްތަކުން އިތުރު ފަރުނީޗަރު ގެންދިއުމަކީ މަނާ ކަމެކެވެ.
