އިޓަލީގައި ކޮވިޑް-19ގެ ހާލަތު ގޯސްވެ ވެރިރަށް ރޯމާއި ވިޔަފާރީގެ މައި މަރުކަޒު މިލާންގައި ފިޔަވަޅުތައް އިތުރަށް ވަރުގަދަކޮށްފިއެވެ.
ވައިރަސް ފެތުރުން ކޮންޓްރޯލްކުރުމަށް ސަރުކާރުން އިތުރަށް އަޅަމުންދާ ފިޔަވަޅުތަކަށް ހޯމަ ދުވަހުން ފެށިގެން އަމަލުކުރަން ފަށާއިރު އެފިޔަވަޅުތަކުގެ ސަބަބުން އިޓަލީގެ ވިޔަފާރީތަކަށާއި މީހުންގެ ދިރިއުޅުމަށް ބޮޑެތި އަސަރުތަކެއް ކުރާނެއެވެ.
ހުކުރު ދުވަހު އިޓަލީގެ ސަރުކާރުން ބުނީ ކުރިޔަށް އޮތް އީސްޓަރ ވީކެންޑާ ދިމާކޮށް އެގައުމު އެއްކޮށް ލޮކްޑައުންކުރުމަށް ނިންމާފައިވާކަމަށެވެ. މިއީ އީސްޓަރ އާ ދިމާކޮށް އިޓަލީ ލޮކްޑައުންކުރާ ދެ ވަނަ އަހަރެވެ.
ކޮވިޑްގެ ޕެންޑަމިކަށް އަހަރެއްވެފައިވާއިރު އިޓަލީއަކީ ޔޫރަޕްގެ ގައުމުތަކުން އެންމެ ފުރަތަމަ ކޮވިޑް ފެނުނު ގައުމެވެ. އިޓަލީގައި ކޮވިޑްގެ ހާލަތު ރަނގަޅުވެފައި އޮތުމަށްފަހު ނިމިގެންދިޔަ ހަފްތާގައި ވަނީ ކޭސްތައް ފެންނަ މިންވަރު އިތުރުވާން ފަށާފައެވެ. އެގޮތުން މިދިޔަ ހަފްތާގައި ކޮވިޑްގެ ކޭސްތައް ފެނުނު މިންވަރު އޭގެކުރީ ހަފްތާއާ އަޅާބަލާއިރު 10 އިންސައްތަ ވަނީ އިތުރުވެފައެވެ.
އިޓަލީގެ އޮފިޝަލުން ވަނީ ކޮވިޑްގެ އައު ވޭރިއަންޓް އިޓަލީގެ އެކި ހިސާބުތަކަށް ފެތުރިފައިވާކަމަށް ބުނެ ހާލަތު ގޯސްވެދާނެކަމުގެ އިންޒާރުދެމުންނެވެ.
ކޮވިޑްގެ ހާލަތަށް ބަލާ އިޓަލީގެ 20 ސަރަހައްދަށް ވަނީ އެކި ކުލަތައް ދީފައެވެ. އަދި ކޮންމެ ހަފްތާއަކުން އެސަރަހައްދެއްގެ ހާލަތު ބެލުމަށްފަހު ކުލަ އަށް އަންނަނީ ބަދަލު ގެންނަމުންނެވެ. އެގޮތުން އެންމެ ހާލަތު ރަނގަޅު ހިސާބުތަކަށް ހުދު ކުލަ ދީފައިވައިރު ކުޑަކޮށް ހާލަތު ގޯސް ސަރަހައްދުތަކަށް ދީފައިވާ ކުލަ އަކީ ރީންދޫ ކުލައެވެ. ހާލަތު ގޯސް ވަމުންދާނަމަ އޮރެންޖް ކުލައަށް އެސަރަހައްދެއް ބަދަލުވާނެއެވެ. އަދި އެންމެ ހާލަތު ގޯސްވުމުން އެސަރަހައްދެއް ރަތް ކުލައަށް ބަދަލުވާނެއެވެ. ކުލަ އާއި އެއްގޮތަށް އަޅާ ފިޔަވަޅުތައްވެސް ވަނީ ކަނޑައަޅާފައެވެ.
އިޓަލީގެ ހެލްތު މިނިސްޓަރ ހުކުރު ދުވަހު ވަނީ ހަތް ސަރަހައްދެއް ރަތް ކުލައިގެ ޒޯންތަކަށް ބަދަލުކުރައްވާފައެވެ. އޭގެތެރޭގައި މިލާން އާއި ރޯމް އަދި ކުރީގައި ކޮވިޑްގެ ހާލަތު އެންމެ ގޯސްވި ލޮމްބާޑޭ ހިމެނެއެވެ.
މިހާރުވެސް ތިން ސަރަހައްދެއް ވަނީ ރަތް ކުލައިގައެވެ. އެހެންކަމުން މިހާރު މިގެނައި ބަދަލާއެކު ހޯމަ ދުވަހުން ފެށިގެން އެގައުމުގެ ދެ ބައިކުޅަ އެއްބައި ސަރަހައްދު ވެގެންދާނީ ރަތް ކުލައިގެ ސަރަހައްދުތަކަށެވެ. މިއާއެކު އާބާދީގެ ބޮޑު ބަޔަކަށް ދެން އުޅެންޖެހޭނީ ކޮވިޑް ފެތުރުން ކޮންޓްރޯލްކުރުމުގެ އެންމެ ހަރުކަށި ފިޔަވަޅުތަކާއެކުއެވެ.
މިސަރަހައްދުތަކުގައި ސްކޫލްތަކާއި ޒަރޫރީ ތަކެތި ވިއްކާ ފިހާރަތައް ނޫން އެހެން ހުރިހާ ފިހާރައެއް ބަންދުވާނެއެވެ. އަދި ގެއިން ބޭރަށް ނިކުމެވޭނީ ހަމައެކަނި މަސައްކަތް ކުރުމަށާއި ސިއްހީ ކަމެއްގައި ނުވަތަ އެމަރޖެންސީ ހާލަތެއްގައި އެކަންޏެވެ.
ފާއިތުވި 13 މަސް ދުވަހުގެ ތެރޭގައި އިޓަލީގައި ވަނީ މިބަލީގައި ލައްކައެއްހާ މީހުން މަރުވެފައެވެ. އިޓަލީއަކީ ހަތް ވަނަ އަށް އެންމެ ގިނަ މީހުން މަރުވެގެން ރިޕޯޓްކުރަމުން އަންނަ ގައުމެވެ.
އަނެއްކޮޅުން އިޓަލީން އަންނަނީ ކޮވިޑް ވެކްސިނޭޝަން ޕްރޮގްރާމް މިހާރަށްވުރެ ރަނގަޅަށް ހިންގުމަށް މަސައްކަތްކުރަމުންނެވެ. އެގޮތުން މިހާރު ދުވާލެއްގެ މައްޗަށް ވެކްސިން ދެމުންދާ 170،000ށް ވުރެ އަދަދު އިތުރުކުރުމަށް އަންނަނީ މަސައްކަތްކުރަމުންނެވެ.
އިޓަލީގެ މެޑިސިން އެޖެންސީން ވަނީ ހުކުރު ދުވަހު ޖޯންސަން އެންޑް ޖޯންސަން ވެކްސިން ޖެހުމުގެ ހުއްދަ ދީފައެވެ. މިމަސްތެރޭގައި ފުރަތަމަ ޝިޕްމަންޓް ލިބޭނެކަމަށް ވަނީ ބެލިވެފައެވެ.
