ހުކުރު ދުވަހު ޕޮޒިޓިވްވީ 114 މީހުން

ފާއިތުވެދިޔަ 24 ގަޑިއިރުގެ ތެރޭގައި ރާއްޖެއިން އިތުރު 114 މީހުން ޕޮޒިޓިވްވެފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ން ހާމަކޮށްފިއެވެ.

އެޗްޕީއޭއިން އެންމެ ފަހުން ނެރުނު ތަފާސް ހިސާބުތައް ދައްކާ ގޮތުން ބުރާސްފަތި ދުވަހުގެ ހަވީރު 06:00 ން ފެށިގެން ހުކުރު ދުވަހުގެ ހަވީރު 06:00 އާއި ހަމައަށް ރާއްޖެއިން 3،462 މީހުން ކޮވިޑަށް ޓެސްޓު ކޮށްފައިވާއިރު، އޭގެ ތެރެއިން ޕޮޒިޓިވްވެފައިވަނީ 114 މީހުންނެވެ.

ޕޮޒިޓިވްވި 114 މީހުންގެ ތެރެއިން މާލެ ސަރަހައްދުން 86 މީހުން ޕޮޒިޓިވްވެފައިވާއިރު، އަތޮޅު ތެރެއިން 14 މީހަކު ވަނީ ޕޮޒިޓިވްވެފައެވެ. އަދި ރިސޯޓުތަކުންވެސް 14 މީހަކު ވަނީ ޕޮޒިޓިވްވެފައެވެ.

ރާއްޖެއިން އިތުރު 114 މީހުން ޕޮޒިޓިވްވެފައިވާއިރު ރާއްޖެއިން މިހާތަނަށް 21،382 މީހުން ވަނީ ކޮވިޑަށް ޕޮޒިޓިވްވެފައެވެ. އެކްޓިވް ކޭސްތަކުގެ އަދަދަކީ 2،531 އެވެ. ރާއްޖެއިން މިބަލީގައި 64 މީހުން ނިޔާވެފައިވާއިރު، 133 މީހަކަށް ހޮސްޕިޓަލުގައި އެޑްމިޓްކޮށްގެން އަންނަނީ ފަރުވާ ދެމުންނެވެ. އަދި ރާއްޖެއިން 18،780 މީހުން ވަނީ ބަލިން ފަސޭހަވެފައެވެ.

ކޮވިޑް-19އާ ގުޅިގެން އިއުލާންކުރި ލޮކްޑައުންއަށް ލުއިތައް ދިނުމާއެކު ކޮވިޑް-19ގެ ދެވަނަ ރާޅެއް ދިވެހިންނާ ކުރިމަތިވުމަށް ފަހު ކޭސްތައް ވަރަށް ބޮޑަށް ދަށްވިތާ މާ ގިނަ ދުވަހެއް ނުވެ އަނެއްކާވެސް ކޮވިޑް-19ގެ ތިންވަނަ ރާޅަކާ ކުރިމަތިލައި ކޭސްތައް އިތުރުވާން ފެށީ މިދިޔަ ޖެނުއަރީގައެވެ. ޖެނުއަރީ 24ން ފެށިގެން ގާތްގަނޑަކަށް ކޮންމެ ދުވަހަކުވެސް ކޭސްތަކުގެ އަދަދު ހުންނަނީ 100ން މަތީގައެވެ. އެއާއެކު އެ ބަލިން ރައްކާތެރިވުމަށް ފިޔަވަޅުތައް ހަރުކަށިކޮށްފައިވާއިރު، ސްކޫލްތަކުގައި އޮންލައިންކޮށް ކިޔަވައިދޭން ނިންމައި، އިރުއޮއްސި ހައެއްގެ ފަހުން އެއްގަމު އުޅަނދުފަހަރު ދުއްވުން މަނާކޮށް ވަނީ އުސޫލު ކަނޑައަޅާފައެވެ.

މީގެ އިތުރަށް ރޭގަނޑު 8 ގެ ފަހުން ރެސްޓޯރަންޓުތަކުގައި ޑައިން އިން ކުރުން މަނާކޮށް ރޭގަނޑު 11ގެ ފަހުން ބޭރަށް ނިކުމެ އުޅުންވެސް ވަނީ މަނާކޮށްފައެވެ. މި ފިޔަވަޅުތަކަށް އެއް މަހަށް ވުރެ ގިނަ ދުވަސްވެފައިވާއިރު ކޭސްތަކުގެ އަދަދު 100ން މަތިވި ނަމަވެސް އަދަދުތައް 150ން ދަށުގައި އުޅޭތާ މިހާރު ވަނީ ދުވަސްކޮޅެއް ވެފައެވެ.