ރައީސް ދައުރު ފުރިހަމަ ކުރައްވަނީ އެންމެ ތިން ޖަވާބުން: އަދުރޭ
11 މާރިޗު 2021 | ބުރާސްފަތި 12:37ސަރުކާރު އުފެދިގެން އައީ ބަލިކަށި ސަރުކާރެއްގެ ގޮތަށް
އިދިކޮޅު ޕީޕީއެމް/ޕީއެންސީގެ އެކްޓިންގ ލީޑަރ އަބްދުލްރަޙީމް އަބްދުﷲ ނޫސްވެރިންގެ ބައްދަލުވުމުގައި ވާހަކަ ދައްކަވަނީ
ރައީސުލްޖުމްހޫރިއްޔާ އިބްރާހިމް މުހައްމަދު ސާލިހް ދައުރު ފުރިހަމަ ކުރައްވަމުން ގެންދަވަނީ އެންމެ ތިން ޖަވާބުންކަމަށް އިދިކޮޅު ޕީޕީއެމް/ޕީއެންސީގެ އެކްޓިންގ ލީޑަރ އަބްދުލްރަޙީމް އަބްދުﷲ (އަދުރޭ) ވިދާޅުވެއްޖެއެވެ.
ބުރާސްފަތި ދުވަހު އިދިކޮޅު ކޯލިޝަނުން ބޭއްވި ނޫސްވެރިންގެ ބައްދަލުވުމުގައި އަދުރޭ ވިދާޅުވީ ރައީސް ދައުރު ފުރިހަމަ ކުރައްވާ ތިން ޖަވާބަކީ "ތިކަން އޮތީ އެންމެ ރަނގަޅަކަށް ނޫނޭ، ތިކަން އަޅުގަނޑު ބަލާލާނަމޭ، ތިއީ ކޮވިޑާއި ގުޅިގެންނޭ" މިއީ ކަމަށެވެ. އޭނާ ވަނީ މި ސަރުކާރަށް ވަރަށް ބޮޑަށް ފާޑުވެސް ވިދާޅުވެފައެވެ. އެގޮތުން މި ސަރުކާރު އުފެދިގެން އައީ ބަލިކަށި ސަރުކާރެއްގެ ގޮތަށް ކަމަށާއި މި ސަރުކާރުގެ ބިންގާވެސް އަޅާފައި އޮތީ ކައްޗަށްކަމަށް ވިދާޅުވިއެވެ.
އަދި މި ސަރުކާރުން ހިޔާ މަޝްރޫއުގެ ފްލެޓް ދޫކުރުމަށް ނިންމާފައިވާގޮތާއި ބޯހިޔާވަހިކަމުގެ މަޝްރޫއުތަކުގައި ގެންގުޅޭ ސިޔާސަތުތަކަށްވެސް ވަނީ ވަރަށް ބޮޑަަށް ފާޑު ވިދާޅުވެފައެވެ. އެގޮތުން ރައީސް ސާލިހް ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ދެއްކެވި ވާހަކަފުޅަށް ރައްދުދެއްވާ އަދުރޭ ވިދާޅުވީ މިސަރުކާރުން ބިނާކުރި އެއްވެސް ފްލެޓެއް ފެންނަން ނެތް ކަަމަށެވެ.
ނޫސްވެރިންގެ ބައްދަލުވުމުގައި އިތުރަށް ވާހަކަ ދައްކަވަމުން އަދުރޭ ވަނީ އިދިކޮޅުން ކޮންމެ ހަފްތާއަކުވެސް ހުކުރު ދުވަހު ސިލްސިލާކޮށް ބާއްވާ މުޒާހަރާގައި ވީހާ ގިނަ ރައްޔިތުން ބައިވެރިވުމަށް އެދިފައެވެ. އަދި ރާއްޖޭގެ މިނިވަންކަމަށް ލޯބި ކުރާ ކޮންމެ ރައްޔިތަކުވެސް މިކަަމަށް އެއްބާރުލުން ދޭނެކަމަށް ވިދާޅުވިއެވެ.
އަދުރޭ ވިދާޅުވީ މި ސަރުކާރު ޖަވާބުދާރީ ކުރުވުމަށްޓަކައި އިދިކޮޅުން ކުރާ މަސައްކަތް އެންމެ ފުރިހަމައަށް ނުފެނިގެން އުޅެނީ މި ސަރުކާރުން އެކަމަށް ޖާގަ ނުދޭތީ ކަމަށެވެ.
އިދިކޮޅު ޕީޕީއެމް/ޕީއެންސީން އެކި ނަންނަމުގައި މާލޭގައި އަންނަނީ ސިލްސިލާކޮށް މުޒާހަރާކުރަމުންނެވެ. އެގޮތުން ކޮންމެ ހުކުރު ދުވަހަކު މަގުތަކަށް ނިކުމެ އަންނަނީ މުޒާހަރާކުރަމުންނެވެ. މި މުޒާހަރާތަކާއި ގުޅިގެން ފުލުހުން ބުނަމުން އަންނަނީ އެޗްޕީއޭގެ އެންގުންތަކާ ޚިލާފުވެ، އާންމު ރައްޔިތުންގެ ސިއްހަތު ނުރައްކަލުގެ ތެރެއަށް ހުށަހެޅޭގޮތަށް އަމަލުތައް ބަހައްޓާ ފަރާތްތަކާމެދު ޤާނޫނީ ފިޔަވަޅު އަޅާނެކަމަށެވެ. މީގެއިތުރުން އިދިކޮޅުން ކުރިއަށްގެންދާ މުޒާހަރާތަކަކީ އެޗްޕީއޭގެ ގައިޑްލައިނާ އަދި ސުލްހަވެރިކަމާއެކު އެއްވެއުޅުމުގެ ޤާނޫނާވެސް ޚިލާފަށް ބާއްވަމުން އަންނަ އެއްވުންތަކެއްކަމަށް ފުލުހުން ބުނެއެވެ.
އިދިކޮޅުން މުޒާހަރާ ކުރަމުން އަންނައިރު، ރާއްޖޭގައި ކޮވިޑުގެ ހާލަތު މިއިން ދުވަހަކު ގޯސްނުވާ މިންވަރަށް ވަނީ ގޯސްވެފައެވެ. އެގޮތުން ޖެނުއަރީމަހުގެ 24 ވަނަ ދުވަހުން ފެށިގެން ދުވާލެއްގެ މައްޗަށް ކޮވިޑްޖެހޭ މީހުންގެ އަދަދު 100ން ދަށަށް ގޮސްފައިނުވާއިރު، ފާއިތުވި ހަފުތާއަކީ މުޅި ޕެންޑަމިކް ތެރޭގައި ރާއްޖޭގައި އެންމެ ގިނަ އަދަދެއްގެ ބަޔަކު ޕޮޒިޓިވްވި ހަފުތާ ކަމަށް ހެލްތު އެމަރޖެންސީ އޮޕަރޭޝަން ސެންޓަރ (އެޗްއީއޯސީ) އިން ވަނީ ބުނެފައެވެ.
ކޮވިޑުގެ ހާލަތު ރަނގަޅުވަމުން ނުދާތީ އެޗްޕީއޭއިން ވަނީ މާރޗް ހަތަރަކުން ފެށިގެން ފިޔަވަޅުތައް އިތުރަށް ވަރުގަދަކޮށްފައެވެ. އެގޮތުން މާލެ ސަރަހައްދުގައި އެއްފަހަރާ ފަސް މީހުންނަށްވުރެ ގިނައިން އެއްވެތިބުން ވަނީ މަނާކޮށްފައެވެ. އަދި ރަށްރަށަށްދާއިރު 72 ގަޑިއިރުވެފައިވާ ޕީސީއާރް ނެގެޓިވް ޓެސްޓެއް ބޭނުންވާނެކަމަށް އެޗްޕީއޭއިން ވަނީ ބުނެފައެވެ. އަދި ޕާކުތަކާއި މައިޒާންތައްވެސް ވަނީ ބަންދުކޮށްފައެވެ.
