އެމްޑީޕީން ރިސޯޓުތަކަށް އަރަން އުޅޭ ކަމަށް ތުހުމަތު ކޮށްފި

އިދިކޮޅު މައި ޕާޓީ، މޯލްޑިވިއަން ޑިމޮކްރެޓިކް ޕާޓީ (އެމްޑީޕީން) ރިސޯޓުތަކަށް އަރަން އުޅޭ ކަމަށް ޓޫރިޒަމް މިނިސްޓްރީގެ ސްޓޭޓް މިނިސްޓަރު މުހައްމަދު ނިހާދު ތުހުމަތުކުރައްވައިފި އެވެ.

ވެރިކަން ކުރާ މައި ޕާޓީ، ޕީއެންސީން ހ. ވެޔޮވިލާ ގައި ހޯމަ ދުވަހުގެ ރޭ ބޭއްވި ޖަގަހަ ޖަލްސާގައި ވާހަކަ ދައްކަވަމުން ރައްޔިތުންގެ މަޖިލީހުގެ ފޭދު ދާއިރާގެ ކުރީގެ މެންބަރު ނިހާދު ވިދާޅުވީ އަންނަ ބުރާސްފަތި ދުވަހަށް ރާއްޖެއަށް މި އަހަރު ޒިޔާރަތްކުރާ ފަތުރުވެރިންގެ އަދަދު 2 މިލިއަނާ ހަމަކުރަން މަސައްކަތް ކުރަމުންދާ މި ދަނޑިވަޅުގައި ފަތުރުވެރިކަމަށް ހުރަސް އެޅުމަށް އެމްޑީޕީ އިސްވެ އޮވެ މަސައްކަތްތަކެއް ކުރަމުންދާ ކަމަށެވެ.

އެގޮތުން މާލެ ކައިރީގައި އެއް ފަޅުތެރެއެއްގައި އޮތް ތިން ރިސޯޓެއްގައި އެމްޑީޕީން ބައްދަލުވުމެއް ބާއްވަން އެދުމުން މި ދުވަސްކޮޅު ރިސޯޓް ފުލްވެފައިވާތީ ނުބޭއްވޭނެ ކަމަށް އެންގުމުން ހުއްދަ ނުލިބުނަސް އެ ރިސޯޓަށް އެމްޑީޕީން އަރާނެ ކަމުގެ އިންޒާރު ދީފައިވާ ކަމަށް ނިހާދު ތުހުމަތުކުރެއްވި އެވެ. ރިސޯޓަކަށް އެރުމަށް ޓަކައި އެމްޑީޕީން ރާވާފައި ވަނީ އަންގާރަ ދުވަހުގެ ހަވީރު ހަަތަރެއް ޖަހާއިރު ކަމަށް އޭނާ ވިދާޅުވި އެވެ. އެ ރިސޯޓަށް އެރުމުގެ ފަހަތުގައި ހުންނެވީ އެމްޑީޕީގެ ޗެއާޕާސަން ފައްޔާޒު އިސްމާއިލް ކަމަށް ވެސް ނިހާދު ތުހުމަކުރެއްވި އެވެ.

ނިހާދު ވިދާޅުވީ މިކަމުގައި ބައިވެރިވަނީ ހަމަ ސީދާ ކަނޑައެޅިގެން މި ދިވެހިރާއްޖޭގެ އިގުތިސޯދު ފުނޑާލަން މީގެ ކުރީގައި ވެސް މަސަައްކަތް ކުރި އެމްޑީޕީގެ ލީޑަޝިޕްގެ (ފައްޔާޒް) ކަމަށާއި އެކަން ކުރަނީ ލޭބާ ޔޫނިއަންގެ އިތުރުން އެހެން ޔޫނިއަންތަކެއް ގުޅިގެން ކަމަށެވެ. ނިހާދުގެ ވާހަކަފުޅުގައި ސީދާ ވަކި ރިސޯޓެއް ހާމަކޮށްފައެއް ނުވެ އެވެ.

"ލިޔުމުން އިންޒާރު ދީފައި ވަނީ ތިމަންނަމެން އެ ބައްދަލުވުން ބޭއްވުމަށް ޓަކައި ތި ރަށަށް އަރާނަމޭ. އަޑުގަދަކުރާޔާ އެކީގައި ތިމަންނަމެން ތި ރަށަށް ދޯނި ފަހަރުތަކުގައި ދާނަމޭ. މި ކަމުގައި ބައިވެރިވަނީ ހަމަ ސީދާ ކަނޑައެޅިގެން މި ދިވެހިރާއްޖޭގެ އިގުތިސޯދު ފުޑާލުމަށް ޓަކައި މީގެ ކުރީގައި ވެސް މަސައްކަތްތަކެއް ކޮށްފައިވާ އެމްޑީޕީ. އެ ލީޑާޝިޕްގެ ބްރޯ،" ނިހާދު ވިދާޅުވިއެވެ.

ނިހާދު ވިދާޅުވި އެކަން ކުރަނީ މިދިޔަ ސަރުކާރުން ބަދަލުގެ ގޮތުގައި ދީފައިވާ ރަށާއި ފަޅުތަކުގެ މައްސަލަ ބަލަމުންދާތީ ކަމަށެވެ. އަދި ފަތުރުވެރިކަމުގެ ސިނާއަތުގައި ހަރަކާތްތެރިވާ އެއްވެސް މީހަކު އެފަދަ އަމަލެއް ކުރުމުގައި ބައިވެރިނުވާން ނިހާދު ވަނީ އިލްތިމާސްކޮށްފަ އެވެ.

ސަރުކާރާއި އަމިއްލަ ފަރާތްތަކާ ދެމެދު ވެފައިވާ އެއްބަސްވުންތަކާ ގުޅިގެން އުފެދިފައިވާ މައްސަލަތައް ހައްލުކުރުމުގައި އަމަލުކުރާނެ ގޮތުގެ އުސޫލުގެ ދަށުން އެމްޑީޕީގެ ނިމިދިޔަ ސަރުކާރުން ސޮއިކޮށްފައިވާ ބަދަލު ދިނުމުގެ 9 އެއްބަސްވުމަކީ ބާތިލު އެއްބަސްވުންތަކެއް ކަމަށް މިދިޔަ ހަފުތާގައި އެޓާނީ ޖެނެރަލް ވަނީ ނިންމަވާފަ އެވެ. އެ އެއްބަސްވުންތަކަކީ އަމަލުކުރަން ނުޖެހޭ އެއްބަސްވުންތަކެއް ކަަމަށް ކަމާ ބެހޭ ދައުލަތުގެ އިދާރާތަކަށް ވަނީ އަންގަވާފަ އެވެ.

އެމްޑީޕީން ރިސޯޓުތަކަށް އަރަން ރާވަމުންދާ ކަމަށް ވިދާޅުވެ، އެ ތުހުމަތު އެމްޑީޕީގެ ބޮލުގައި އެޅުވީ ސީދާ ކޮން ވާހަކައެއްގެ މައްޗަށް ބިނާކޮށް ކަމެއް އަދި އެ މައުލޫމާތު ލިބިވަޑައިގެންނެވި ގޮތެއް ނިހާދުގެ ވާހަކައިގައި ހާމަކޮށްފައެއް ނުވެއެވެ.