އެޗްޑީސީގެ ބިޔަބޮޑު ވައްކަމަކީ މުޅި ގައުމުގެ މަސްލަހަތު އޭގައި ހިމެނޭ ކަމެއް: މީކައިލް

ހުޅުމާލެއިން "ބިންވެރިޔާ" ސްކީމް ގެ ދަށުން ޝަރުތު ހަމަނުވާ ބަޔަކަށް ގޯތިތަކެއް ވަގަށް ދިން މައްސަލަ ފަޅާ އެރުމާއެކު، އެޗްޑީސީ ގެ ތެރެއިން ހިނގަމުންދާ ވައްކަމާ، ޚިޔާނާތާއި މަކަރު ހީލާތް ހެދުމުގެ އެތައް ކަމެއް ފެންމަތިވަމުން އަންނައިރު، މި ހުރިހާ ކަމަކީ ވެސް މުޅި ގައުމުގެ މަސްލަހަތު އެކަމުގައި ހިމެނޭ ކަމެއް ކަމަށް ގަލޮޅު ދެކުނު ދާއިރާގެ އެމްޑީޕީ މެންބަރު މީކާއިލް އަހުމަދު ނަސީމް ވިދާޅުވެއްޖެއެވެ.

ގަލޮޅު ދެކުނު ދާއިރާގެ އެމްޑީޕީ މެންބަރު މީކާއިލް އަހުމަދު ނަސީމް މިފަދައިން ވިދާޅުވީ ހޮނިހިރު ދުވަހުގެ ރޭ ރާއްޖެ ޓީވީން ގެނެސްދިން "ފަލަ ސުރުކީ" ޕްރޮގްރާމުގައި ވާހަކަދައްކަވަމުންނެވެ.

މިމަހުގެ 12 ވަނަ ދުވަހު ހިނގި ނުރައްކާތެރި އަލިފާނުގެ ހަދިސާއާއި ގުޅިގެން މަޖިލީހުގައި ކުއްލި ބައްދަލުވުމެއް ބާއްވަދިނުމަށް އެދި ވެރިކަން ކުރާ މައި ޕާޓީ ޕީއެންސީއަށް ފޮނުވި ސިޓީއަށް ޖަވާބު ނުދެއްވާކަން ފާހަގަކުރައްވާ މީކާއިލް ވިދާޅުވީ އަލިފާނުގެ ހާދިސާގެ މައްސަލައާއި ގުޅިގެން މަޖިލީހުގައި ކުއްލި ބައްދަލުވުމެއް ބާއްވައި ދިނުމަށް ޕީއެންސީގެ މިހާރުގެ ސްޕީކަރގެ އަރިހުން އެދިފައިވާ ކަމަށެވެ. އެހެން ނަމަވެސް އަދިވެސް އެކަމަށް ޖަވާބެއް ދެއްވާފައި ނުވާކަމަށް މީކާއިލް ވިދާޅުވިއެވެ.

މިކާއީލް ވިދާޅުވީ މިހާރު ރާއްޖޭގައި މި ހިނގާ ކަންކަމަކީ ވަކި ސިޔާސީ ޕާޓީއަކަށް ނިސްބަތްވާ ކަންކަން ނޫން ކަމަށާއި މިއީ މުޅި ގައުމުގެ މަސްލަހަތު ވެސް އެކަމުގައި ހިމެނޭ ކަމެއް ކަމަށެވެ. އެހެން ކަމުން މިކަން ހަމަމަގަށް އެޅުވުމަށް އެންމެން އެކުވެގެން މަސައްކަތް ކުރަން ޖެހޭކަމަށް މީކައިލް ވިދާޅުވިއެވެ.

" އެއްވެސް ޖަވާބެއް އަދި އަޅުގަނޑުމެނަށް ލިބިފައެއް ނެތް. އަޅުގަނޑުމެން ވާނެ މި އަލިފާނުގެ ހާދިސާއާއި ގުޅިގެން މަޖިލީހުގެ ކުއްލި ޖަލްސާއެއް ބާއްވާ ދިނުމަށް އެދިފަ. އެހެން ނަމަވެސް އަދިވެސް އެކަމަށް ޕީއެންސީން ޖަވާބެއް ނުދެއްވާ." ފަލަ ސުރުޚީ ޕްރޮގްރާމުގައި ވާހަކަ ދައްކަވަމުން މީކައިލް ވިދާޅުވިއެވެ.

މީކާއިލް ވިދާޅުވީ މަޖިލިސް ޗުއްޓީގައި އޮވެފައި ވެސް ރައްޔިތުންގެ މަޖިލީހުގެ ދައުރު އަދާކުރުމަށް މަޖިލީހަށް ނުކުންނަށް ޖެހޭ ކަމަށް ގަބޫލުކުރައްވާ ކަމަށާއި ނަމަވެސް ޕީއެންސީގެ ފަރާތުން ފެނިގެން މިދަނީ އެއްވެސް ޕަބްލިކް ކޮންސާނަކަށް ދީލާނުނާލެތަން ކަމަށެވެ.

މީކާއިލް އިތުރަށް ވިދާޅުވީ ޕީއެންސީ އަކީ އެއްވެސް ވަރަކަށް ރައްޔިތުންގެ އެއްވެސް ކަންބޮޑުވުމަކަށް އެއްވެސް އަހައްމިޔަތު ކަމެއް ނުދެއްވާ، އަދި އެކަން ކަމަށް ދީލާނުލާނެ ބައެއް ކަން މިހާރު ސާފުވަމުން އަންނަ ކަމަށެވެ.

މީކައިލް އިތުރަށް ވިދާޅުވީ އެޗްޑީސީގެ މި ގޯތީގެ ބިޔަބޮޑު ވައްކަމަކީ މި ސަރުކާރުގެ އެންމެ މަތިން ފެށިގެން ތިރިއަށް ބައިވެގެން ހިންގާފައިވާ ޖަރީމާއެއް ކަމަށާއި މިއީ ވަރަށް ބޮޑު ސަމާލުކަމެއް ދީގެން ވަރަށް ރަނގަޅަށް ތަހުގީގު ކުރަން ޖެހޭ މައްސަލައެއް ކަމަށެވެ.