އެހެން ރައީސުންނަށް އަތްލަން ނުކެރުނު ކަންކަމުގައި ރައީސް މުޢިއްޒު އަތްލައްވަން ފެއްޓެވި ފަހުން، ހުރިހާ ތަކުލީފެއް ނިކަމެތި ރައްޔިތު މީހާ އަށް!

މިފަހަކަށް އައިސް ސޯޝަލް މީޑިއާގައި ސަރުކާރަށް ތާއީދު ކުރާ ފަރާތްތަކުން ލިޔެފައި ހުންނާތީ ފެނެ އެވެ. އެހެން ރައީސުންނަށް ކުރައްވަން ނުކުރެނުނު ކަންކަން، އަދުގެ ރައީސް ޑޮކްޓަރު މުޙައްމަދު މުޢިއްޒު ކުރައްވާ ވާހަކަ އެވެ. ސަރުކާރުގެ ސިޔާސީ މަގާމުތަކުގައި ތިބި ފަރާތްތަކާއި، ސަރުކާރު ޕާޓީ އަށް ނިސްބަތްވާ މެމްބަރުން އަދި ސަރުކާރަށް ތާއީދު ކުރާ އެކްޓިވިސްޓުން ވެސް އެ ވާހަކަ ލިޔެފައި ހުންނާތީ ފެނެ އެވެ.

ނުވިތާކަށް އަދުގެ ރައީސް ޑޮކްޓަރު މުޢިއްޒު ވެސް ވަނީ އެ ބީދައިން ވާހަކަ ދައްކަވައިފަ އެވެ. އޭގެ ބައެއް ކަންކަމަށް ބަލާލުން މުހިންމު ކަމަށް ދެކެމެވެ. އޭގެ ތެރޭގައި ޑޮލަރުގެ މައްސަލަ ޙައްލު ކުރުމަށް ސަރުކާރުން ޚާއްސަ ފިޔަވަޅުތަކެއް އެޅުމާއި، ބޮއްސުންލާފައިވާ ޞިއްޙީ ނިޒާމު ހަމަ މަގަށް އެޅުވުމަށް ސަރުކާރުން ރެޔާއި ދުވާލު ގޮންދާ ހިލެންދެން މަސައްކަތް ކުރުމާއި، އަދި ކޮރަޕްޝަނުގެ ހާތްޔަކަށް ވެފައިވާ އާސަންދައިގެ ނިޒާމު މުޅިން ދޮވެ ސާފު ކުރުން ހިމެނެ އެވެ. ސަރުކާރުގެ އިސް ބޭފުޅުން ވިދާޅުވެފައިވާ ގޮތުގައި އާސަންދައިގެ ނިޒާމު އޮތީ ވަރަށް ބޮޑަށް "ބްލީޑު" ވެފަ އެވެ. އެ ޙާލަތުގައި ނިޒާމު އޮތްއިރު، ރައީސް މުޢިއްޒު ކުރައްވަނީ އެ ނިޒާމުގައި ބޭސް މަލަމާއި، ބެންޑޭޖާއި އަދި ރަތް ބޭސް ޖެހުމުގެ މަސައްކަތް ކަމަށް އެ ބޭފުޅުންގެ ވާހަކަ އިން ދޭހަވަ އެވެ.

ރަނގަޅެވެ. ބޮއްސުންލާފައިވާ ކަންކަން ސަރުކާރުން ހަމަ މަގަށް އަޅުވަންވީ އެވެ. އެއީ ކުރަން ވެސް ޖެހިފައިވާ ކަމެކެވެ. ހެޔޮ އަގުގައި ބޭސް ގަންނަން ލިބުމާއި، އެންމެ ޙައްޤު މީހާ އަށް އާސަންދަ ދިނުމާއި، އާސަންދައިގެ ނިވަލުގައި ތިބެ މީހުން މުއްސަނދިވާ ނަމަ، އެކަމުގައި ވެސް ސަރުކާރުން "އޮބި" އަޅަންވީ އެވެ. ޑޮލަރުގެ މައްސަލައިގެ ތާށިކަން ބޮޑުވެ، ޑޮލަރުގެ މައްސަލަ އިންތިހާ އަށް ބޮޑުވެފައިވާއިރު، އެކަމަށް ވެސް ޙައްލު ގެންނަން ސަރުކާރުން "ފޫގަޅާލަން"ވީ އެވެ.

އެކަމަކު، މިވާހަކަތާ އެކު އާންމު ރައްޔިތުންގެ ޝުއޫރު ހުރި ގޮތް ވެސް ބަލާލުމަކީ މުހިންމު ކަމެއްކަމަށް ޤަބޫލު ކުރަމެވެ. ސަރުކާރަށް ނިސްބަތްވާ ސިޔާސީ ފަރާތްތަކާއި، ސަރުކާރު ޕާޓީގެ މެމްބަރުންގެ އެ ވާހަކަތާކާ އެކު އާންމު ރައްޔިތުން ބަންޑުންކޮށްލީ އެހެން ޝުއޫރެކެވެ. ފަހަރުގައި ސަރުކާރުގައި ތިއްބެވި ބޭފުޅުންނަށް އެ ވާހަކަތައް ބަލައި ގަންނަން އުނދަގޫ ވެދާނެ އެވެ. އެހެން ނަމަވެސް، އެ ވެރިންނަށް މުސާރަ ލިބެނީ އެ ނިކަމެތި ރައްޔިތު މީހާ ދައްކާ ޓެކްސް ފައިސާ އިން ކަމެއް އެވެރިންގެ ހަނދާނުގައި ނެތީ ކަމަށް ވެދާނެ އެވެ. އެހެން ވެއްޖެ ނަމަ، އެއީ އެވެރިންގެ "ނުކުޅެދުންތެރި" ކަމެވެ.

އާންމު ނިކަމެތި ނުވަތަ އުމުރުން ދުވަސްވީ ދައްތަ އާއި ބޭބެމެން ބުނެ އުޅެ އެވެ. މީގެ ކުރިން ހަކުރު ބައްޔަށް ބޭނުންވާ ބޭސް ރާއްޖެ އިން ފަސޭހަ ކަމާ އެކު ލިބެން ހުރެ އެވެ. ފުރަ މާލެ އިން ލިބެން ހުންނައިރު، ކުދި އާބާދީ އާއި ބޮޑެތި އާބާދީތަކުގައި ހުންނަ ބޭސް ފިހާރަތަކުން ބެސް އެ ބޭސް ފަސޭހަ އިން ލިބެން ހުރެ އެވެ. އެހެން ނަމަވެސް، އެހެން ރައީސުންނަށް އަތްލަން ނުކެރުނު ކަންކަމުގައި ރައީސް މުޢިއްޒު އަތްލައްވަން ފެއްޓެވި ފަހުން މީގެން ރަށަކުން ހަކުރު ބޭސް ނުލިބޭތާ، މާލެ އިން ވެސް ލިބެން ނެތީ އެވެ. އެންމެ ފަހުން 80 އަހަރުން މަތިވެފައިވާ ބޭބެ ނުވަތަ ދައްތަގެ އުމުރުގައި ފުރަތަމަ ފަހަރަށް ރާއްޖެ އިން ބޭރުން ހަކުރު ބަލީގެ ބޭސް ގަންނަން ޖެހިއްޖެ އެވެ.

މީގެ ކުރިން އާސަންދައިގެ ދަށުން ލިބެން ހުންނަ ތައިރޮޑުގެ ބޭހާއި، ދެން ވެސް ނުރައްކާތެރި ބަލިތަކުގެ ބޭސް ފަސޭހަ އިން ލިބެ އެވެ. ބޭސް ސިޓީ އާއެކު އެ ބޭސްތައް ލިބެނީ، އާސަންދައިގެ ދަށުންނެވެ. އަތުން ލޯ ލާރިއެއް ވެސް ދައްކަން ނުޖެހި އެ ބޭސް ހޯދައިގެން ބޭނުން ކުރި މީހުން މި ފަސްގަނޑު މަތީގައި މަދެއް ނުވާނެ އެވެ. އެހެން ނަމަވެސް، އެހެން ރައީސުންނަށް އަތްލަން ނުކެރުނު ކަންކަމުގައި ރައީސް މުޢިއްޒު އަތްލައްވަން ފެއްޓެވި ފަހުން، އެކަހަލަ ބޭސް ޚާއްސަކޮށް ތައިރޮޑު ބަލީގެ ބޭސް އާސަންދައިން ލިބުން ހުއްޓިއްޖެ އެވެ. މިހާރު ޖެހެނީ އެ ބޭސް ގަންނަ ފަހަރަކު ބޭހުގެ ފުރިހަމަ އަގު ދައްކާފައި ނުވަތަ ދެ ބައި ކުޅަ އެއް ބަޔަށް ވުރެ ބޮޑު އަގެއް ދައްކާފައި ގަންނާށެވެ.

ދެން އޮތީ މިފަހުން އެންމެ ގަދަޔަށް ދެކެވުނު އެއް ވާހަކަ އެވެ. އެންމެ ބޮޑު މައްސަލަ ކަމަށް ސަރުކާރުން ދައްކަމުން އަންނަ މައްސަލަ އެވެ. ޑޮލަރުގެ މައްސަލަ އެވެ. މިކަމުގައި ވެސް ކަންތައް ވެެގެން ދިޔަ ގޮތް، ހޭބުއްދި ސަލާމަތުން ހުރި ކޮންމެ މީހަކަށް އިނގޭނެ އެވެ. ޑޮލަރުގެ މައްސަލައިގައި މިފަހުން ސަރުކާރުން ގެނައި ބަދަލާ އެކު، ފަތުރުވެރިކަމުގެ ދާއިރާގައި މަސައްކަތް ކުރައްވާ ތަޖުރިބާކާރު ބޭފުޅުން އަދި ވަކިސް ޚާއްސަކޮށް ރާއްޖެ އަށް ފަތުރުވެރިކަން ތައާރަފު ކުރުމުގައި އިސް ދައުރު އަދާކުރެއްވި ބޭފުޅުން ކަންބޮޑުވުން ފާޅު ކުރުމުން، ކަރުން ނާރު ހިލުވާލާފައި ރައީސް އެ ބޭފުޅުންނަށް "ބަވާލީ" އެވެ. ވިދާޅުވީ ޑޮލަރުގެ މައްސަލަ ޙައްލު ކުރައްވާނެ ކަމަށާއި، ޤަވާއިދު ބަދަލެއް ނުކުރާނެ ކަމަށެވެ. އެއީ ވެސް އެހެން ރައީސުންނަށް އަތްލާން ނުކެރިފައި އޮތް ކަމެއް ކަމަށް ދެއްކެވީ އެވެ. އެކަމުގައި ރައީސް މުޢިއްޒު އަތްލެއްވުމުން، ޑޮލަރުގެ އަގު ކަޅު ބާޒާރުގައި 19 ރުފިޔާ އިން މައްޗަށް ގޮސް، 20 ރުފިޔާއާ ގާތް ކުރާ އަދަދަކަށް ޖެހިލި އެވެ.

މިއީ ބައެއް ކަންކަމެވެ. މިއީ އާންމުންގެ ކަންބޮޑުވުން ފާޅު ކޮށްފައިވާ ކަންކަމުގެ ތެރެއިން އަޅުގަނޑުގެ ދެ އަތުން މިވަގުތަށް ލިޔެލެވުނު މަދު ކަންކަމެވެ. މި ލިސްޓު ލިޔަން ވެއްޖެ ނަމަ، އަޅުގަނޑުގެ އެއް ދުވަހުގެ މަސައްކަތް ހުސްވާނީ އެކަމަށެވެ. އެހެން ރައީސުންނަށް އަތްލާން ނުކެރުނު ކަންކަމުގައި ރައީސް މުޢިއްޒު އަތްލުމުން، އެކަމުގެ ހުރިހާ ތަކުލީފަކާއި، ދުއްތުރާލެއް ޖެހެނީ އާންމު ރައްޔިތު މީހާ އަށް ކަމަށް އެ ރައްޔިތުން ބުނެ އެވެ. އޭގެ ތެރޭގައި ސަރުކާރާ އިދިކޮޅު މީހުން އަދި ނުވިތާކަށް ރައީސް މުޢިއްޒު ވެރިކަމަށް ގެންނަން "ފޫގަޅާލައިގެން" މަސައްކަތް ކުރި މީހުން ވެސް ހިމެނެ އެވެ.