ރައްޔިތުން މާޔޫސްކަމެއްގެ ތެރެއަށް ދޫކޮށްލުމަށްފަހު، ޕާޓީ ބޮޑު ކުރުން!

މިދިޔަ އަހަރުގެ ސެޕްޓެމްބަރު މަހު އޮތް ރިޔާސީ އިންތިޚާބުގައި ރައްޔިތުން ޑޮކްޓަރު މުޙައްމަދު މުޢިއްޒު އަށް ވެރިކަން ހަވާލުކުރީ ނުހަނު ފޮނި އުންމީދާ އެކު އެވެ. އެތައް ފޮނި ހުވަފެންތަކެއް ރައްޔިތުން ދެކެމުން އައިއިރު، އެކަންކަން ހަޤީގަތަކަށް ހެދުމުގެ ބޭނުމުގަ އެވެ. ދިވެހި ރައްޔިތުންގެ ތެރެއިން ގިނަ ބަޔަކު ވޯޓު ދީގެން މިހާރުގެ ރައީސް ޑޮކްޓަރު މުޢިއްޒު ވެރިކަމަށް އިންތިޚާބު ކުރީ އެމަނިކުފާނު އެތައް ގިނަ ވައުދުތަކެއް ވެވަޑައިގެންފައި ވަނިކޮށެވެ.

މިދިޔަ އަހަރުގެ ނޮވެމްބަރު މަހު ހުވާ ކުރެއްވި ރައީސް މުޢިއްޒުގެ މި ސަރުކާރަށް އެއް އަހަރުވާން ކައިރިވެފައިވާއިރު، ސަރުކާރަށް ކުރެވުނު އެއްވެސް ކަމެއް ނެތެވެ. މި ދެންނެވީ ރައްޔިތުންގެ ލާބަ އާއި މަންފާ އަދި ކުރިއެރުމަށް ކުރެވުނު އެއްވެސް ކަމެއް ނެތް ވާހަކަ އެވެ. ކުރެވުނުހާ ވެސް ކަމަކީ، މާލޭ ރަސްމީ ފާލަން ރޫޅާލުމަށްފަހު އެތަން ހުރި ގޮތަށް ދޫކޮށްލުމާއި، ރަސްމާލެ ނަމުގައި ފެށި މަޝްރޫޢު އަށް މަޑު ޖެހުން ކަހަލަ ދެ ތިން ކަންތައްތަކެވެ. ރަށް ރަށުގައި މި ސަރުކާރުގެ އެއްވެސް މަޝްރޫއެއް ނުހިނގާތާ، ނިމިދިޔަ ރައީސް އިބްރާހީމް މުޙައްމަދު ޞާލިޙުގެ ސަރުކާރުން ފަށާފައިވާ މަޝްރޫއުތައް ވެސް ހުރީ މަޑު ޖެހިފަ އެވެ.

މިއަހަރަށް ފާސްކޮށްފައިވާ ދައުލަތުގެ ބަޖެޓުން ނުފުދިގެން، އަހަރުގެ ބާކީ އޮތް ތަނަށް ސަޕްލަމެންޓްރީ ބަޖެޓެއް ފާސް ކުރުމަށް ވެސް ރައްޔިތުންގެ މަޖިލީހަށް ސަރުކާރުން ހުށަހަޅާފައިވާއިރު، ރައްޔިތުންގެ އެންމެ ބޮޑު ސުވާލަކީ، ބަޖެޓު ނުފުދިގެން ސަރުކާރުން ސަޕްލިމެޓްރީ ބަޖެޓެއް ހުށަހަޅާފައިވާއިރު، ފާސްކޮށްފައި އޮތް ބަޖެޓުން ކުރީ ކޮން ކަމެއް ހެއްޔެވެ؟ ގައިމު ރާއްޖޭގެ ރަށެއްގައި ތަރައްޤީގެ މަޝްރޫއެއް ކުރިއަކަށް ނުދެ އެވެ. މަސައްކަތް ކުރާ ކުންފުނިތަކަށް ފައިސާ ނުދޭތާ ތިން ހަތަރު މަސް ވެގެން އެ ފަރާތްތަކުން ވެސް ޝަކުވާ ކުރަނީ އެވެ. ދެން އެއް އަހަރުވާން ކައިރިވެފައިވާއިރު، ސަރުކާރަށް މި އުޅެނީ ކޮން ކަމެއް ކުރެވިގެން ހެއްޔެވެ؟

ސަރުކާރަށް އެއް އަހަރުވާން މަސް ދުވަހަށްވުރެ ކުޑަވެފައިވާއިރު، ރައްޔިތުން މާޔޫސްވެއްޖެ އެވެ. ސަރުކާރާ މެދު ވަރަށް ބޮޑަށް ރައްޔިތުން މާޔޫސްވެއްޖެ އެވެ. ސަރުކާރު ގެންނަން ވޯޓު ދިން ރައްޔިތުންގެ މޫނު މަތިން ވެސް ފެންނަނީ މާޔޫސްކަމެވެ. ސަބަބެއް ވެސް ނެތިއެއް ނޫނެވެ. ފޮނި އުންމީދުތަކާއި، އެތައް ހުވަފެންތަކާއެކު ގެނައި މި ސަރުކާރުން މިހާތަނަށް ރައްޔިތަކަށް ލާބަ އެދިގެން ކޮންދިން ކަމެއް ނެތީމަ އެވެ. ބަލާލި ކޮންމެ ދިމާލަކުން ފެންނަނީ، ރައްޔިތުންނަށްޓަކައި ކުރިން ވެސް ފަށާފައިވާ މަޝްރޫއުތައް ހުއްޓިފައިވާ މަންޒަރެވެ. ކޮންމެ ދިމާލަކުން މީހަކާ ދިމާވި ނަމަވެސް ދައްކަނީ ސަރުކާރުގެ ދުވެލި މަޑު އަދި މަތިބަރު ވާހަކަ އެވެ.

އެކަމަކު، އެކަން މިހެން އޮއްވައި ސަރުކާރު ހިންގާ މައި ޕާޓީ، ޕީއެންސީން އެ ޕާޓީ އަށް މެމްބަރުން އިތުރު ކުރުމުގެ މަޝްރޫއެއް ފަށައިގެން އެބަ ކުރިއަށް ގެންދެ އެވެ. ކޮންމެ ހަފުތާ ބަންދަކު މި މަޝްރޫއު ކުރިއަށް ގެންދަނީ ވަޒީރުންނާއި، ނައިބު ވަޒީރުންނާއި، މަޖިލިސް މެމްބަރުންނާއި، ދެން ވެސް ތިބި ސިޔާސީ ވެރިން ބައިވެރިވެގެންނެވެ. އެއީ ސަރުކާރަށް އެއް އަހަރުވާއިރު ޕީއެންސީގައި 75،000 މެމްބަރުން ތިބެން ރައީސް މުޢިއްޒު ބޭނުންފުޅުވާތީ އެވެ. އެމަނިކުފާނުގެ އެ އުންމީދު ޙާސިލު ކޮށްދިނުމަށް މުޅި ޕީއެންސީ އޮތީ ފޫގަޅާލައިގެންނެވެ.

ރައްޔިތުން ހޮވި ސަރުކާރުން، ރައްޔިތުން ހޮވި މެމްބަރުން އަދި ރައްޔިތުންގެ ޓެކްސް ފައިސާ އިން މުސާރަ ނަންގަވާ ސިޔާސީ ވެރިން، ރައްޔިތުން މާޔޫސްކޮށްލުމަށްފަހު އަނެއްކާ ވެސް ރައްޔިތުން ގާތަށް މި ދަނީ އެވެރިންގެ ޕާޓީ އަށް މެމްބަރުން އިތުރު ކުރުމަށެވެ. އެވެރިންގެ ދަޅައިގަ ޖެހިގެން ރައްޔިތުން ވެރިކަން ޕީއެންސީއާ ހަވާލުކޮށްފި އެވެ. އޭގެ މަސް ތަކެއް ފަހުން އޮތް މަޖިލިސް އިންތިޚާބުގައި ޕީއެންސީ އަށް ބޮޑު މެޖޯރިޓީއެއް ދިނީ ވެސް އެވެރިންގެ ދެއްކި ވާހަކަ ރައްޔިތުން ޤަބޫލުކޮށްގެންނެވެ. ސަރުކާރާއި މަޖިލިސް އޮވެމެ، ރައްޔިތުންނަށް ފައިދާވާނެ ކަމެއް ނުކޮށް ތިބެގެން، އަނެއްކާ ވެސް ރައްޔިތުންގެ ގާތަށް ޕާޓީ ބޮޑު ކުރަން ދިޔުމަކީ ލަދުވެތި ކަމެއް ނޫން ހެއްޔެވެ؟