އިބްރާހީމް ފައިސަލް ޓޫރިޒަމް މިނިސްޓަރު ކަމުގެ މަޤާމުން ނެރެ އެއްލާލީ ސީދާ މަޖިލީހުގެ ރައީސް އަބްދުއްރަހީމް އަބްދުﷲ ނިކަމެތިކޮށްލުމުގެ ބޭނުމުގައި ކަމަށް ރައްޔިތުންގެ މަޖިލީހުގެ ބިލެތްދޫ ދާއިރާގެ ކުރީގެ މެމްބަރު އަހުމަދު ހަލީމް (ދޮންބިލެތް ހަލީމް) ވިދާޅުވެއްޖެއެވެ.
ރާއްޖެ ޓީވީގެ "ފަލަސުރުކީ" ޕްރޮގްރާމުގައި ވާހަކަ ދައްކަވަމުން އަހުމަދު ހަލީމް ވިދާޅުވީ ޓޫރިޒަމް މިނިސްޓަރު ކަމުގެ މަޤާމުގައި ހުންނެވި އިބްރާހީމް ފައިސަލްގެ މަޤާމު ގެއްލުވާލުމަކީ ރައީސް ޑރ. މުހައްމަދު މުއިއްޒު ދުރާލާ ރާވައިގެން ކުރި ކަމެއް ކަމަށެވެ. އެކަން އެނގޭ އެއްކަމެއްގެ ގޮތުގައި އޭނާ ފާހަގަކުރެއްވީ އެޗްޑީސީގެ ބޮޑު ވައްކަމާއި ގުޅިގެން އެ ކުންފުނީގެ އޭރު އެމްޑީއަކަށް ހުންނެވި ފަޒުލް ރަޝީދުގެ މައްސަލައަށެވެ.
އަހުމަދު ހަލީމް ވިދާޅުވީ ފަޒުލް ރަޝީދަށް ވައްކަމާއި ހިޔާނާތުގެ ތުހުމަތުތައް އެވަރަށް ކުރެވިގެން ދިޔައިރުވެސް މަޤާމުން ވަކިކުރުމުގެ ކުރިން އިސްތިއުފާ ދެއްވުމުގެ ފުރުސަތު ދެއްވިކަމަށެވެ. އަދި ނޫސްވެރިންގެ ބައްދަލުވުމެއް ބޭއްވުމަށް ވެސް ފުރުސަތު ދެއްވިކަން އޭނާ ފާހަގަކުރިއެވެ. ނަމަވެސް ފައިސަލް އަށް މިފަދަ އެއްވެސް ފުރުސަތެއް ނުދެއްވާ މަޤާމުން ވަކިކޮށް އެއްލާލީ ކަމަށް އަހުމަދު ހަލީމް ވިދާޅުވިއެވެ. އެގޮތުން މަޤާމުން ވަކިކުރިކަން ވެސް ފައިސަލް އަށް އެނގުނީ އެ ދުވަހު އޮފީހަށް ވެސް ދިޔަ ފަހުންކަން އޭނާ ފާހަގަކުރިއެެވެ.
އަހުމަދު ހަލީމް ވިދާޅުވީ ފައިސަލް މިނިސްޓަރު ކަމުން ވަކިކޮށްލީ ސީދާ އަބްދުއްރަހީމް ނިކަމެތިކޮށްލުމުގެ ބޭނުމުގައި ކަމަށާއި އެއީ ދުރާލައި ރޭވިގެން ކޮށްފައިވާ ކަމެއް ކަމަށެވެ.
ދަރިކަލުން އިބްރާހީމް ފައިސަލް މިނިސްޓަރު ކަމުން ވަކިކުރުރެއްވި އިރު، އަބްދުއްރަހީމް ހުންނެވީ މެލޭޝިއާގައެވެ. އަދި އެ ޚަބަރާއި އެކު ދަތުރު ކުރުކޮށްލައްވައި ރާއްޖެ ވަޑައިގަތީ އަންގާރަ ދުވަހުގެ ރޭގައެވެ. އަބްދުލްރަހީމް ވަޑައިގަންނަވާ ގަޑިއަށް ރާއްޖޭގެ ގިނަ މީޑިއާ ތަކުން އެމަނިކުފާނާ ބައްދަލު ކުރުމަށް ވެލާނާ އިންޓަރނޭޝަނަލް އެއަރޕޯޓަށް ގޮސް ތިބި ނަމަވެސް އަބްދުލްރަހީމަށް އެއަރޕޯޓުން މާލެ އަށް ވަޑައިގަތީ ނޫސްވެރިންނަށް ފިއްލަވައިގެންނެވެ.
އެއަރޕޯޓަށް ދިޔަ ރާއްޖެޓީވީގެ ނޫސްވެރިޔާ ބުނިގޮތުގައި އަބްދުލްރަހީމް ބޭރަށް ނުކުންނެވުމުގެ ބަދަލުގައި އޭނާ ބަލައި އައި ވެހިކަލްތައް އޭޕްރަން އަށް ވަދެފައި ތިބިކަން އެނގުނީ ވެހިކަލުގައި ވަރަށް ބާރަށް ދުއްވާފައި ބޭރަށް ނުކުތުމުން ކަމުގައެވެ.
މައުލޫމާތު ލިބިފައިވާ ގޮތުން އަބްދުއްރަހީމް އެފަދައިން ކަންތައްކުރެއްވީ މީޑީއާ އާ ވާހަކަ ނުދައްކަވަން ރައީސް މުއިއްޒު އަންގަވައިފައި ވުމުންނެވެ. އަބްދުލްރަހީމަށް މުއިއްޒުގެ ފަރާތްޕުޅުން އެކަން އެންގީ އޭނާ މެލޭޝިއާ ގައި އޭނާ ހުންނަވަނިކޮށް އަންގާރަ ދުވަހު ޕީއެންސީގެ ސީނިއަރ މަޖިލިސް މެމްބަރެއް މެދުވެރިކޮށް ފޯނުން ކަމަށްވެސް ވަނީ މައުލޫމާތު ލިބިފައެވެ. އަދި އޭނާގެ ދަރިކަލުން އިބްރާހިމް ފައިސަލް މަގާމުން ވަކި ކުރެއްވުމާ ގުޅިގެން ދެއްވި އިންޓަވިއުގެ ސަބަބުން ޕާޓީ އަށާއި ސަރުކާރަށް ވަރަށް "ޑެމޭޖް" ވެއްޖެ ކަމަށް މުއިއްޒު އަބްދުއްރަހީމަށް ވިދާޅުވިކަމަށް ވެއެވެ. އެހެންވެ އިތުރަށް މިކަމުގައި މީޑިއާ އަށް ވާހަކަ ނުދެއްކެވުމަށް ވަނީ އަންގާފައެވެ.
މިކަމާއި ގުޅުވައި އަޙުމަދު ހަލީމް ވިދާޅުވީ އަބްދުއްރަހީމަށް މުއިއްޒުގެ އެންގެވުމަށް ތަބާވުން ނޫންގޮތެއް ނެތް ކަމަށާއި އެހެން ނޫންނަމަ އަބްދުއްރަހީމްގެ މަޤާމު ގެއްލިގެން ދިއުން ގާތްކަމަށެވެ. އަދި ޚުދު އަބްރުއްރަހީމަށް ވެސް މިހާރު މަޤާމާއި މެދު ޝައްކުވާނޭ ކަމަށް އޭނާ ވިދާޅުވިއެވެ.
ފައިސަލް ވަކިކުރި ކުރުން ވަރަށް ހަޑި ގޮތަކަށް މި ދިޔައީ.. ބައްލަވާ ފަޒުލްގެ މައްސަލާގަ. ވަކިކުރުމުގެ ކުރިން އިސްތިއުފާ ދޭންވެސް ފުރުސަތު ދެއްވި، ނިއުސްކޮންފަރެންސެއް ބާއްވަން ވެސް ފުރުސަތު ދެއްވި. އެހެން ނަމަވެސް ފައިސަލް އިއްޔެގަ މިނިސްޓަރީއަށް ވަޑައިގެންނެވި ފަހުން، އަތްޕުޅަށް ސިޓީ އެއައީ. މިހާރު ވަޒީރެއް ނޫނޭ. އެލެވެލްއަށް އެކަން ދިޔައީމަ އޭގެ މާނައަކީ އެއޮތީ ވަރަށް ގޯސްކޮށް އެކަންތައް ވެފައޭ. ކަނޑައެޅިގެން އަބްދުއްރަހީމް ހަމަ ނިކަމެތިކޮށްލުމުގެ މަގުސަދުގައި، އެގޮތަށް ވަޒީރުކަން އެ ނިގުޅައިގަތީ.ބިލެތްދޫ ދާއިރާގެ ކުރީގެ މެމްބަރު އަހުމަދު ހަލީމް
އަޙުމަދު ހަލީމް އިތުރަށް ވިދާޅުވީ މި ސަރުކާރުން ކަންކަން ކުރަމުން އަންނަ ގޮތުން އަބްދުއްރަހީމް ނިކަމެތިވެގެން އަންނަ މިންވަރު އެބަފެންނަ ކަމަށާއި އެގޮތުން ޕީއެންސީގެ 80 މެމްބަރުންގެ ތެރެއިން އެންމެ ތިން މެމްބަރުންވެސް މިހާރު އަބްދުއްރަހީމްއާއި އެކު ނުތިއްބަވާނޭ ކަމަށެވެ. އެހެން ކަމުން އަބްދުއްރަހީމަށް މިއަދު އޮންނާނޭ ގޮތަކީ މަޑުން ހިމޭނުން ހުރުންކަމަށާއި އެނޫން ގޮތެއް އެބޭފުޅާއަށް ނެތް ކަމަށް ވެސް އޭނާ ވިދާޅުވިއެވެ.
