ސީރިއާގެ ގޯލްކީޕަރު މަހުމޫދު އަނބުރާ މާޒިޔާއަށް

ސާބިއާގެ ގޯލްކީޕަރު ނިކޮލާ ވުޔަނަޗް ދޫކޮށްލުމަށްފަހު މާޒިޔާ ސްޕޯޓްސް އެންޑް ރެކްރިއޭޝަނުން ސީރިއާގެ ގޯލްކީޕަރު މަހުމޫދު އަލް-ޔޫސުފް އަލުން އަނބުރާ ގެނެސްފިއެވެ.

މާޒިޔާއިން އައު ގޯލްކީޕަރެއް ގެނައީ ކުރިއަށް އޮތް އޭއެފްސީ ކަޕަށް ޓީމު އިތުރަށް ވަރުގަދަކުރުމުގެ ގޮތުންނެވެ. އެގޮތުން މި ފަހަރު އެ ޓީމަށް ގެނައި މަހުމޫދު މީގެ ކުރިން ވަނީ 2017 ވަނަ އަހަރުވެސް މާޒިޔާއަށް ކުޅެފައެވެ. އަދި އޭގެ ކުރިން އޭނާ ވަނީ ރާއްޖޭގެ ޔުނައިޓެޑް ވިކްޓަރީ އާއި ވިކްޓަރީ ސްޕޯޓްސް ކުލަބަށްވެސް ކުޅެފައެވެ.

މިހާރު އުމުރުން 33 އަހަރުގެ މަހުމޫދު މާޒިޔާއާ ގުޅުނުއިރު، އޭނާ އެންމެ ފަހުން ކުޅެފައިވަނީ ސައުދީގެ ފުރަތަމަ ޑިވިޝަނުގެ ކުލަބެއް ކަމަށްވާ އަލް-މުޖައްޒަލް ފުޓްބޯޅަ ކުލަބަށެވެ. އަދި އޭގެ ކުރިން ސައުދީގެ އަލް-ހަބަލައިން އާއި ސީރިއާގެ އަލް-ޖައިޝަށްވެސް އޭނާ ވަނީ ކުޅެފައެވެ.

"ރާއްޖެ.އެމްވީ" އަށް މައުލޫމާތުދެއްވަމުން މާޒިޔާގެ ބޯޑު މެންބަރު އަދި މީޑިއާ އޮފިޝަލް ހަސަން ޝިފާން ވިދާޅުވީ އޭއެފްސީ ކަޕަށް ޓީމު ވަރުގަދަކުރުމަށް މަސައްކަތް ކުރަމުން އަންނައިރު، ސާބިއާގެ ގޯލްކީޕަރު ނިކޮލާ ވުޔަނަޗުގެ އިތުރުން އެ ގައުމުގެ ޑިފެންޑަރު ޕީޓަ ޕްލަނިޗުވެސް މިހާރު ދޫކޮށްލާފައިވާ ކަމަށެވެ.

އެ ދެ ކުޅުންތެރިން މާޒިޔާއިން ދޫކޮށްލާފައިވާއިރު، ދާދި ފަހުން އެ ޓީމުން ވަނީ ފިލިޕީންސް ލީގުގައި ކުޅެފައިވާ ޖަޕާނުގެ މިޑްފީލްޑަރެއް ކަމަށްވާ ޓަކާޝީ އޮޑަވާރާގެ ސޮއިހޯދާފައެވެ. ދެން އެ ޓީމުގައި ހިމެނޭ ބިދޭސީ ކުޅުންތެރިއަކީ ސެއިންޓް ވިންސެންޓުގެ ފޯވާޑް ކޮނޭލިއަސް ސްޓެވާޓެވެ.

މާޒިޔާއިން ކުރިއަށް އޮތް އޭއެފްސީ ކަޕަށް ޓީމު ވަރުގަދަކުރުމުގެ މަސައްކަތް ކުރަމުން އަންނައިރު، އޭއެފްސީ ކަޕުގެ ދެކުނު އޭޝިއާގެ ޓީމުތަކުގެ ގްރޫޕް ސްޓޭޖުގެ ސީދާ ޖާގައެއް ލިބިފައިވަނީ މާޒިޔާއަށެވެ. މާޒިޔާގެ އިތުރުން ދެން ގްރޫޕް ސްޓޭޖުގެ ޖާގައެއް ކަށަވަރުކޮށްފައިވަނީ އިންޑިއާގެ މޯހަން ބަގާން އަދި ބަންގްލަދޭޝްގެ ޗެމްޕިއަން ބަޝުންދަރާ ކިންގްސްއެވެ.

މި އަހަރުގެ އޭއެފްސީ ކަޕް ގްރޫޕް ސްޓޭޖް މެޗުތައް ސެންޓްރަލައިޒްކޮށްގެން ރާއްޖޭގައި ބާއްވާއިރު، ޕްރިލިމިނަރީ ބުރާއި ޕްލޭ-އޮފް ބުރަށްފަހު ގްރޫޕް ސްޓޭޖުގެ މެޗުތައް ކުޅޭނީ މެއި މަހުގެ 14 ވަނަ ދުވަހުން ފެށިގެން 20 ވަނަ ދުވަހުގެ ނިޔަލަށެވެ.