ނުފޫޒުތަކަށް ދޫނުދިނުމަށް ރައީސް ނަޝީދު ނޫސްވެރިންނަށް ގޮވާލައްވައިފި

ނޫސްވެރިކަމަކީ ބިރު ބޮޑު ނުރައްކާތެރި މަސައްކަތްތެއް ކަމަށާއި ކުރިމަތިވާ ނުފޫޒުތަކަށް ދޫނުދިނުމަށް ކުރީގެ ރައީސް މުހައްމަދު ނަޝީދު ނޫސްވެރިންނަށް ގޮވާލައްވައިފިއެވެ.

ބައިނަލްއަގުވާމީ ގޮތުން ފާހަގަކުރާ ނޫސްވެރިކަމުގެ ދުވަހުގެ މުނާސަބަތުގައި ރައީސް ނަޝީދު ކުރެއްވި ޓްވީޓްގައި ރާއްޖޭގެ ނޫސްވެރިންނަށް ހިތްވަރު ދެއްވާފައި ވެއެވެ. ސިޔާސީ ދާއިރާ އަށް ނުކުންނެވުމުގެ ކުރިން އަމަލީ ގޮތުން ނޫސްވެރިއެއްގެ ގޮތުގައި ވެސް މަސައްކަތްކުރެއްވި ރައީސް ނަޝީދު ވަނީ މި ދުވަހުގެ މުނާސަބަތުގައި ރާއްޖޭގެ ހުރިހާ ނޫސްވެރިންނަށް މަރްހަބާ ދަންނަވާފައެވެ.

ޓެރަރިޒަމްގެ ދައުވާކޮށް 13 އަހަރުގެ ޖަލު ހުކުމެއް އިއްވާފައި ވަނިކޮށް ބޭސްފަރުވާ އަށް އިނގިރޭސި ވިލާތަށް ވަޑައިގެން އެ ގައުމުގެ ހިމާޔަތުގައި ހުންނެވި ނަމަވެސް މި ވަގުތު ލަންކާގައި ހުންނެވި ނަޝީދު ވިދާޅުވީ ނޫސްވެރިކަމަކީ އިންސާނިއްޔަތަށްޓަކައި ކުރެވޭ ޚިދުމަތެއް ކަމަށާއި އެއީ އަގުނުކުރެވޭނެ ޚިދުމަތެއް ކަމަށެވެ.

ބައިނަލްއަގުވާމީ ނޫސްވެރިކަމުގެ ދުވަސް ފާހަގަކުރަމުންދާއިރު ރާއްޖޭގައި ނޫސްވެރިކަމަށާއި ހިޔާލުފާޅުކުރުމަށް ވަނީ ބޮޑެތި ގޮންޖެހުންތަކެއް ކުރިމަތިވެފައެވެ. ނޫސްވެރިއަކު ވަގަށް ނަގާފައިވާ ބްލޮގާއެއް އަނިޔާވެރި ގޮތަށް ވަނީ މަރާލެވިފައެވެ. މީގެ އިތުރުން އަބުރުގެ ގާނޫނުގެ ސަބަބުން ނޫސްވެރިކަމުގެ މިނިވަންކަން އެތައް ތަނަކުން ހަނިވެފައިވާއިރު ނޫސްވެރިކަމުގެ މިނިވަންކަން ނެތް ގައުމުތަކުގެ ލިސްޓަށް ރާއްޖެ ވަނީ އަރާފައެވެ.