އާރް.އެމް.އެލް.އެސް ލެބުން ކޮވިޑް-19 އަށް ޓެސްޓުކޮށްދޭ އަގުތަށް ކުޑަކޮށްފި
ޓެސްޓު ކުރާ އަގުތަކަށް ބަދަލުގެނަސްފައި ވަނީ ޚިދުމަތް ހޯދާ ފަރާތްތަކަށް ލުއިކޮށްދިނުމުގެ ގޮތުން
އާރް.އެމް.އެލް.އެސް ލެބް ސަރވިސް އިން ކޮވިޑް-19 ސާމްޕަލް ނަގަނީ
އާރް.އެމް.އެލް.އެސް ލެބް ސަރވިސަސް އިން ކޮވިޑް-19 އަށް ޓެސްޓުކޮށްދޭ އަގުތަކަށް ބަދަލުގެނަސްފިއެވެ.
ރާއްޖެއެމްވީ އަށް މައުލޫމާތު ދެއްވަމުން އާރް.އެމް.އެލް.އެސް ލެބްގެ މެނޭޖިންގ ޑިރެކްޓަރ އިބްރާހިމް ސައީދު ވިދާޅުވީ ލެބުން ޓެސްޓު ކުރާ އަގުތަކަށް ބަދަލުގެނަސްފައި މިވަނީ ޚިދުމަތް ހޯދާ ފަރާތްތަކަށް ލުއިކޮށްދިނުމުގެ ގޮތުން ކަމަށެވެ.
އެގޮތުން ދިވެހިން އަދި ބިދޭސީންގެ ކޮވިޑް-19 ޓެސްޓު އާރް.އެމް.އެލް.އެސް ލެބުން ހަދައިދޭއިރު، އެންމެ ފުރަތަމަ ދިވެހިންގެ ޓެސްޓު ހަދައިދެމުން އައީ 1045 ރުފިޔާ އަށެވެ. ނަމަވެސް މިހާރު މި އަގު ވަނީ 690 ރުފިޔާއަށް ކުޑަކޮށްފައެވެ. އަދި ބިދޭސީންގެ ޓެސްޓު 70 ޑޮލަރަށް ހަދައިދެމުން އައިއިރު، މިހާރު ބިދޭސީންގެ ޓެސްޓު ހަދައިދެނީ 45 ޑޮލަރަށެވެ.
އާރް.އެމް.އެލް.އެސް ލެބުން ދުވާލަކަށް 350 އެއްހާ ސާމްޕަލް ޓެސްޓުކުރާ ކަމަށާއި ސާމްޕަލްގެ ނަތީޖާ ހަ ގަޑިއިރުގެ ތެރޭގައި ލިބޭނެ ކަމަށް ސައީދު ވިދާޅުވިއެވެ.
މީގެ އިތުރުން އާރް.އެމް.އެލް.އެސްގެ އަމިއްލަ ލޯންޗުގައި މާލެ އަތޮޅުގެ ރަށްރަށަށް ގޮސް ސާމްޕަލް ނަގައިދޭ ކަމަށާއި ސަފާރީ ތަކާއި ރިސޯޓުތަކަށް އެ ޚިދުމަތް ފޯރުކޮށްދެމުން އަންނަ ކަމަށް ސައީދު ފާހަގަކުރެއްވިއެވެ. އަދި އާރް.އެމް.އެލް.އެސްގެ މި ޚިދުމަތަށް އާންމުންގެ ފަރާތުން ވަރަށް ބޮޑު ތަރުހީބެއް ލިބެމުން އަންނަ ކަމަށް ސައީދު ވިދާޅުވިއެވެ.
ހުޅުމާލޭގައި ގާއިމްކޮށްފައިވާ މި ލެބުން ކޮވިޑް-19 އަށް ޓެސްޓުކުރަން ބޭނުންވާ ފަރާތްތަކަށް ލެބްގެ ފޯކަލް ޕޮއިންޓްތައް މެދުވެރިކޮށް ބުކިން ހެއްދޭނެއެވެ.
