ގަނާއެއް ނުކުރޭ، ހަގީގަތް އޮޅޭނެހެން ދޮގު ހަބަރު ފަތުރާތީ އެކަމާ ހިތާމަ ކުރަން – އެމްއެންޔޫއެސްޔޫ
ސޯޝަލް މީޑިއާގައި އާންމުވި ފޮޓޯއަކީ 2019 ވަނަ އަހަރު ދަރިވަރެއްގެ އުފަން ދުވަސް ފާހަގަކުރުމުގެ ތެރޭގައި ދަރިވަރުންތަކެއްގެ މެދުގައި މަޖާ ކުރުމުގެ ގޮތުން ކޮށްފައިވާ ކަމެއް
އެމްއެންޔޫއިން އިންޓަރ ކޮލެޖް/ ޔުނިވަރސިޓީ ވޮލީ މުބާރާތް މިލްކު ކުރުމަށްފަހު އެކަމުގެ އުފާ ފާޅުކުރަނީ
ދިވެހިރާއްޖޭގެ ގައުމީ ޔުނިވަރސިޓީގެ ދަރިވަރުންގެ ޔޫނިއަން (އެމްއެންޔޫއެސްޔޫ) ގެ އޮފީހުގައި ގަނާ ކުރާ ކަމަށް ބުނެ ސޯޝަލް މީޑިއާގައި އާންމު ކުރި ފޮޓޯއަކީ ދަރިވަރުންތަކެއްގެ މެދުގައި މަޖާކުރުމުން ގޮސް ކޮށްފައިވާ ކަމެއް ކަމަށާއި، އެކަމާއި ގުޅިގެން ފިޔަވަޅު އަޅާފައިވާނެ ކަމަށް އެމްއެންޔޫއެސްޔޫއިން ބުނެފިއެވެ.
އެމްއެންޔޫއެސްޔޫއިން ނެރުނު ނޫސްބަޔާނެއްގައި ބުނީ އަންގާރަ ދުވަހު ސޯޝަލް މީޑިއާގައި އާންމުވި ފޮޓޯއަކީ 2019 ވަނަ އަހަރު ދަރިވަރުންތަކެއްގެ މެދުގައި މަޖާ ކުރުމުން ގޮސް ކޮށްފައިވާ ކަމެއް ކަމަށެވެ. އަދި އެކަން ފާހަގަ ކުރެވުމާއިއެކު ޔޫނިއަނުން ވަނީ އެކަން ސީރިއަސް މައްސަލައެއްގެ ގޮތުގައި ބަލާފައި ކަމަށާއި، އެކަމުގައި ހަނގާ ކުރުމުގެ އެއްވެސް އަމަލެއް ހިނގާފައިނުވާ ކަމަށެވެ. އަދި ދަރިވަރުން ބޭނުން ކުރަމުން އައި ނުރަސްމީ ވައިބަރ ގްރޫޕަކަށް އެ ފޮޓޯލުމާއިއެކު އެފަދަ ކަމެއް ތަކުރާރު ނުކުރުމަށް ދަރިވަރުންނަށް ނަސޭހަތްތެރި ވެފައިވާ ކަމަށް އެމްއެންޔޫއެސްޔޫއިން ބުނެއެވެ.
އެމްއެންޔޫ ދަރިވަރުންގެ ޔޫނިއަން އަކީ ހަނގާކުރުމާއި އަދި އިޖްތިމާޢީ ގޮތުން ދަށުދަރަޖައިގެ ޢަމަލުތައް ހިންގުމަށް ހިތްވަރުދޭނެ ޔޫނިއަން އެއް ނޫން ކަމަށް އެމްއެންޔޫއެސްޔޫއިން ބުނެއެވެ. އަދި މިފަދަ ޢަމަލުތައް ހަރުކަށި ޢިބާރާތުން ކުށްވެރިކުރާ ކަމަށާއި، ޔޫނިއަންއަކީ ރިވެތި އަޚްލާޤުގެ ސިފަތަކުން ޒީނަތްތެރިވެފައިވާ ޒިންމާދާރު، ހަރުދަނާ ޒުވާނުން އުފެއްދުމަށް އަބަދުވެސް ގަދައަޅާ މަސައްކަތްކުރާ، އަދި ކުރިއަށް އޮތްތަނުގައިވެސް ހަމަ މިއުސޫލުން މަސައްކަތް ކުރުމުގައި ދެމިތިބޭނެ ޔޫނިއަންއެއްކަމުގެ ޔަޤީންކަން ދިވެހި ހުރިހާ ރައްޔިތުންނަށް އަރުވާ ކަމަށް އެމްއެންޔޫއެސްޔޫއިން ބުނެއެވެ.
މީގެ އިތުރުން މަޢުލޫމާތު ޢާންމުކުރުމުގައި ކަން ހިނގާފައިވާ ގޮތުގެ މަޢުލޫމާތު ސާފުކޮށް، ކަމުގެ ހަޤީގަތް ޢާންމު ފަރާތްތަކަށް އޮޅުން ނާރާނެ ގޮތަށް ޢަމަލު ކުރުމަކީ ޔޫނިއަންގެ ވަރަށް ބޮޑު އެދުމެއް ކަމަށާއި އަދި ދިވެހިރާއްޖޭގެ ޤައުމީ ޔުނިވަރސިޓީއާ، އެމްއެންޔޫ ދަރިވަރުންގެ ޔޫނިއަންގެ އަގު ވަށްޓާލުމުގެ ބޭނުމުގައި މިފަދަ ދޮގު ހަބަރު ފެތުރުމަކީ ހިތާމަ ކުރާ ކަމެއް ކަމަށް އެމްއެންޔޫއެސްޔޫއިން ވަނީ ބުނެފައެވެ.
އެމްއެންޔޫއެސްޔޫ އަކީ ދިވެހިރާއްޖޭގައި މިވަގުތު އޮތް އެންމެ ހަރަކާތްތެރި އަދި އެންމެ މެމްބަރުން ގިނަ މަދަނީ ޖަމިއްޔާއެވެ. އެމްއެންޔޫއެސްޔޫއިން އަންނަނީ ދަރިވަރުން ބާރުވެރި ކުރުމަށާއި، އިސްވާރުން އުފެއްދުމަށް ކެނޑިނޭޅި މަސައްކަތް ކުރަމުންނެވެ. އަދި ޔޫނިއަންގެ މަސައްކަތްތަކަށް ޔޫތް މިނިސްޓަރ އަހްމަދު މަޙްލޫފް ވަނީ ތައުރީފް ކުރައްވާފައެވެ.
