ފިލިޕީންސް ލީގުގައި ކުޅެފައިވާ ޖަޕާނުގެ މިޑްފީލްޑަރެއް މާޒިޔާއަށް

މިދިޔަ ސީޒަނުގެ ދިރާގު ދިވެހި ޕްރިމިއާ ލީގުގެ ޗެމްޕިއަންކަން ހޯދި މާޒިޔާ ސްޕޯޓްސް އެންޑް ރެކްރިއޭޝަނަށް ފިލިޕީންސް ލީގުގައި ކުޅެފައިވާ ޖަޕާނުގެ މިޑްފީލްޑަރެއް ކަމަށްވާ ޓަކާޝީ އޮޑަވާރާ ސޮއިކޮށްފިއެވެ.

މާޒިޔާއިން ބިދޭސީ މިޑްފީލްޑަރެއް ގެނައީ ކުރިއަށް އޮތް އޭއެފްސީ ކަޕަށް ޓީމު އިތުރަށް ވަރުގަދަކުރުމުގެ ގޮތުންނެވެ. އެގޮތުން އެ ޓީމަށް ގެނައި އުމުރުން 28 އަހަރުގެ ޓަކާޝީ މީގެ ކުރިން ވަނީ މާޒިޔާގެ މިހާރުގެ ކޯޗު ސާބިއާގެ ރިސްޓޯ ވިޑަކޮވިޗުގެ އިރުޝާދުގެ ދަށުން ފިލިޕީންސް ލީގުގެ ޔުނައިޓެޑް ސިޓީ އެފްސީއަށް ކުޅެފައެވެ. އަދި ޔުނައިޓެޑް ސިޓީން މިދިޔަ އަހަރުގެ ފިލިޕީންސް ލީގާއި ކަޕް ކާމިޔާބުކުރި ޓީމުގައި އޭނާ ވަނީ މުހިންމު ދައުރެއް އަދާކޮށްފައެވެ. 2019 ވަނަ އަހަރު ޔުނައިޓެޑް ސިޓީއާ ގުޅުނު ޓަކާޝީ އޭއެފްސީ ޗެމްޕިއަންސް ލީގުގެ ޕްލޭއޮފްގައިވެސް ކުޅެފައިވާއިރު، އޭނާ ވަނީ ޔުނައިޓެޑް ސިޓީއަށް ޖުމްލަ އަށް ލަނޑު ޖަހައިދީފައެވެ.

މާޒިޔާއަށް ބަދަލުވުމުގެ ކުރިން ޓަކާޝީ އެންމެ ފަހުން ކުޅެފައިވަނީ އިންޑޮނީޝިއާގެ ޕާސިބް ބަންޑުންނަށެވެ. އަދި އޭގެ ކުރިން އޭނާ ވަނީ ފިލިޕީންސް ލީގުގެ ޖޭޕީވީ މަރިކީނާ އާއި ޑަވާއޯ އަގީއަސްއަށްވެސް ކުޅެފައެވެ.

ޓަކާޝީގެ ސޮއި މާޒިޔާއިން ހޯދުމާއެކު، އެ ޓީމުގައި މިހާރު ބިދޭސީ ހަތަރު ކުޅުންތެރިން ހިމެނެއެވެ. އެއީ ޓަކާޝީގެ އިތުރުން ސެއިންޓް ވިންސެންޓުގެ ފޯވާޑް ކޮނޭލިއަސް ސްޓެވާޓާއި، ސާބިއާގެ ގޯލްކީޕަރު ނިކޮލަ ވުޔަނަކް އަދި އެ ގައުމުގެ ޑިފެންޑަރު ޕީޓަ ޕްލަނިޗެވެ. އެކަމަކު އޭއެފްސީ ކަޕަށް މާޒިޔާއިން ބައެއް ބިދޭސީ ކުޅުންތެރިން ބަދަލުކުރާނެ ކަމަށް ވަނީ މައުލޫމާތުލިބިފައެވެ.

މާޒިޔާއިން ކުރިއަށް އޮތް އޭއެފްސީ ކަޕަށް ޓީމު ވަރުގަދަކުރުމުގެ މަސައްކަތް ކުރަމުން އަންނައިރު، އޭއެފްސީ ކަޕުގެ ދެކުނު އޭޝިއާގެ ޓީމުތަކުގެ ގްރޫޕް ސްޓޭޖުގެ ސީދާ ޖާގައެއް ލިބިފައިވަނީ މާޒިޔާއަށެވެ. މާޒިޔާގެ އިތުރުން ދެން ގްރޫޕް ސްޓޭޖުގެ ޖާގައެއް ކަށަވަރުކޮށްފައިވަނީ އިންޑިއާގެ މޯހަން ބަގާން އަދި ބަންގްލަދޭޝްގެ ޗެމްޕިއަން ބަޝުންދަރާ ކިންގްސްއެވެ.

މި އަހަރުގެ އޭއެފްސީ ކަޕް ގްރޫޕް ސްޓޭޖް މެޗުތައް ސެންޓްރަލައިޒްކޮށްގެން ރާއްޖޭގައި ބާއްވާއިރު، ޕްރިލިމިނަރީ ބުރާއި ޕްލޭ-އޮފް ބުރަށްފަހު ގްރޫޕް ސްޓޭޖުގެ މެޗުތައް ކުޅޭނީ މެއި މަހުގެ 14 ވަނަ ދުވަހުން ފެށިގެން 20 ވަނަ ދުވަހުގެ ނިޔަލަށެވެ.