މަލީހު ޕީޕީއެމްގެ ކެމްޕޭނަށް ދިއުމަކީ ޖޭޕީން ތާއީދުކުރާ ކަމެއް ނޫން
9 މާރިޗު 2021 | އަންގާރަ 14:03ޖޭޕީގެ މެމްބަރުން ކުރިމަތިނުލާ ދާއިރާތަކުގައި އިދިކޮޅަށް ކެމްޕޭނު ކޮށްދޭނެ ކަމަށް
މިނިސްޓަރ މަލީހު އިދިކޮޅު ހަރަކާތްތަކުގައި ބައިވެރިވަނީ
އިދިކޮޅު ކޯލިޝަންގެ ކެމްޕޭން ހަރަކާތުގައި ބައިވެރިވެވަޑައިގެންނެވީ ރިޔާސީ ނިޒާމުގެ ދިފާއުގައި ވާހަކަދައްކަން ޖެހޭ ކަމަށް ގަބުލުކުރައްވާތީ ކަމަށާއި، މިވަގުތު އެކި ސަބަބުތަކައްޓަކައި ޖުމްހޫރީ ޕާޓީ "ސައިލެންޓު މޯޑު" ގައި އޮތުމުން ކަމަށް ކުރީގެ ކޮމިއުނިކޭޝަން މިނިސްޓަރ މުހައްމަދު މަލީހު ޖަމާލް ވިދާޅުވެއްޖެއެވެ.
އިދިކޮޅު ކޯލިޝަނުން ކުރިއަށް އޮތް ލޯކަލް ކައުންސިލް އިންތިހާބުގެ ކެމްޕޭން ހަރަކާތްތަކުގެ ތެރެއިން ފުވައްމުލަކު ކެމްޕޭން ފެށުމަށް ބޭއްވި ރަސްމިއްޔާތުގައި މަލީހު ބައިވެރިވެވަޑައިގެންނެވި ފޮޓޯ އެ ކޯލިޝަނުން އާންމުކޮށްފައިވާއިރު އެކަމާ ގުޅިގެން "ރާއްޖެއެމްވީ" އަށް ދެއްވި އިންޓަވިއުއެއްގައި މަލީހު ވިދާޅުވީ އެ ހަރަކާތުގައި ބައިވެރިވެވަޑައިގެންނެވީ ފުވައްމުލަކު ރައްޔިތެއްގެ ހައިސިއްޔަތުން ކަމަށެވެ. ފުވައްމުލަކުގެ ވަރަށް ގިނަ ޒުވާނުންގެ އެދުމުގެ މަތިން އެ ޖަލްސާގައި ބައިވެރިވެވަޑައިގެންނެވީ ކަމަށް ވިދާޅުވިއެވެ.
މަލީހު ވިދާޅުވީ އޭނާ މިހާރު ވެސް ހުންނެވީ ޖުމްހޫރީ ޕާޓީގެ މެމްބަރެއްގެ ގޮތުގައި ކަމަށެވެ. އަދި އިދިކޮޅު އެއްވެސް ޕާޓީއަކާ ގުޅުމުގެ ވިސްނުންފުޅެއް ނެތް ކަމަށް ވިދާޅުވިއެވެ. މަލީހު ވިދާޅުވީ ކޯލިޝަން ވަރުގަދަ ކަމަށް ސަރުކާރުން ބުނި ނަމަވެސް މިހާރު ކޯލިޝަނެއް އޮތް ކަމަށް ގަބޫލުނުކުރައްވާ ކަމަށެވެ.
އެމްޑީޕީން އަދި ވަކިން ހާއްސަކޮށް ރައީސް ނަޝީދު މަސައްކަތްކުރައްވަނީ ރިޔާސީ ނިޒާމު ބަރުލަމާނީ އަށް ބަދަލުކުރަން ކަމަށް ވިދާޅުވިއެވެ. އެހެން ޕާޓީތަކުގެ މިނިސްޓަރުން ކެބިނެޓުން ވަކިކުރުމަކީ ވެސް އެކަމަށްޓަކާ ސަރުކާރު ބަލިކަށި ކުރުމުގެ މަގްސަދުގައި ކުރަމުން އަންނަ ކަމެއް ކަމަށާއި، އެއީ ރިޔާސީ ނިޒާމުގެ ސިފައެއް ނޫން ކަމަށް ވިދާޅުވިއެވެ.
މަލީހު ވިދާޅުވީ ޖުމްހޫރީ ޕާޓީ މިހާރު އޮތީ "ސައިލެންޓް މޯޑު" ގައި ކަމަށެވެ. އެހެންވެ ޕާޓީގެ ނަމުުގައި އެމްޑީޕީން އެ ހިންގާ ކަންކަމާ ދެކޮޅަށް މިވަގުތު ނިކުމެވެން ނެތް ކަމަށާއި، އެކަމުގައި އިދިކޮޅު ކޯލިޝަނާ ގުޅިވަޑައިގެންނެވީ އެ ސަބަބައްޓަކާ ކަމަށް ވިދާޅުވިއެވެ. އޭނާ ވިދާޅުވީ ލޯކަލް ކައުންސިލް އިންތިހާބުގައި އެމްޑީޕީއަށް މެޖޯރިޓީ ލިބިއްޖެ ނަމަ އެ ބޭނުންވާ ގޮތަށް ބަރުލަމާނީ ނިޒާމަކަށް ބަދަލުކުރަން ވަރަށް ބޮޑު ބާރެއް އެ ޕާޓީއަށް ލިބޭނެ ކަމަށެވެ. އެ ފުރުސަތު ދެވެން ނެތް ކަމަށާއި، ސިޔާސީ މީހެއްގެ ހައިސިއްޔަތުން ހުއްޓިގެން ހުރެވެން ވެސް ނެތް ކަމަށެވެ. އެހެންވެ ޖުމްހޫރީ ޕާޓީގެ މެމްބަރުން ކުރިމަތިލާފައި ނުވާ ހުރިހާ ދާއިރާއަކަށް ވެސް އިދިކޮޅަށް ކެމްޕޭންކޮށްދެއްވާނެ ކަމަށް މަލީހު ވިދާޅުވިއެވެ.
މަލީހު ވިދާޅުވީ އެމްޑީޕީގެ މެމްބަރުން "ބިރު ދައްކައި ބަޑި ބަހައްޓައިގެން" މަގާމުން ވަކިކުރިޔަސް ބިރު ނުގަންނާނެ ކަމަށާއި، ފަހަތަށް ވެސް ޖެހިވަޑައިނުގަންނަވާނެ ކަމަށެވެ. ދެވަނަ ފުރުސަތެއް ދެއްވާނެ ކަމަށް ވިދާޅުވެ އެ ޕާޓީގެ ޕީޖީ ލީޑަރު ދެއްކެވި ވާހަކައަކީ ވެސް ކުރެވުނު ކަންކަން ގޯސްކަން އަމިއްލައަށް އެނގި ދެން ދައްކާނެ ވާހަކައެއް ނެތުމުން ދެއްކި ވާހަކައެއް ކަމަށެވެ. އެކަން ދިފާއު ކުރެވޭނެ އެއްވެސް ގޮތެއް އެމްޑީޕީއަށް ނޯންނާނެ ކަމަށާއި، "ރޯޔަލް ފެކްޝަން"ގެ ފައިބުޑަށް ވެއްޓި އާދޭސް ކުރަން ޖެހޭނެ ކަމަށް ވެސް ގަބޫލުނުކުރައްވާ ކަމަށެވެ.
އިދިކޮޅު ކޯލިޝަންގެ ކެމްޕޭން ހަރަކާތްތަކާ މަލީހު ގުޅިވަޑައިގެން މައްސަލައިގައި ޖުމްހޫރީ ޕާޓީން "ރާއްޖެ އެމްވީ" އަށް ބުނީ އެކަމަށް އެޕާޓީގެ ތާއީދު ނެތް ކަމަށެވެ. އެ ޕާޓީ އޮތީ ސަރުކާރު ހިންގާ ކޯލިޝަނާއެކު ކަމަށާއި އެއްވެސް ހާލެއްގައި އިދިކޮޅު ކޯލިޝަންއާ ނުގުޅޭނެ ކަމަށާއި، ކޯލިޝަން ދަމަހައްޓަން ކުރެވެން ހުރި ހުރިހާ މަސައްކަތެއް ކުރާނެ ކަމަށް ވެސް ބުންޏެވެ. އެ ޕާޓީން ބުނީ މަލީހު އިދިކޮޅުގެ ކެމްޕޭނުގައި ބައިވެރިވި މައްސަލަ ބަލަމުން އަންނަ ކަމަށާއި، އެކަން ކުށްވެރިކުރާ ކަމަށެވެ.
މިނިސްޓަރ މަލީހުގެ އިތުބާރު ނެތް ކަމަށް ރައްޔިތުންގެ މަޖިލީހުން ނިންމައި މަލީހު މަގާމުން ވަކިކުރިތާ އަދި ވީ އެންމެ ހަފްތާއެކެވެ. އިތުބާރުނެތްކަމުގެ މައްސަލައަށް ޖަވާބުދާރީވުމަށް ލިބިވަޑައިގެންނެވި ފުރުސަތުގައި ވާހަކަދައްކަވަމުން މިނިސްޓަރ މަލީހު ވަނީ ތަކުރާރުކޮށް މިއީ އަސާސެއް ނެތް ކަމެއްކަމަށް ވިދާޅުވެފައެވެ. މައްސަލާގައި ބުނެފައިވާ ގަވާއިދުތައް ހަދާފައިވާކަމަށް މަލީހު ވިދާޅުވިއެވެ.
