އޮފިޝަލް ސަސްޕެންޑްކުރި ނަމަވެސް، ނަސްލީ ތަފާތުކުރި މައްސަލަ ސާބިތެއް ނުވި

ޔުއެފާ ޗެމްޕިއަންސް ލީގުގައި މިދިޔަ އަހަރުގެ ޑިސެމްބަރު މަހު ޕީއެސްޖީ އާއި އިސްތަންބޫލް ބަޝަކްޝެހީރް ބައްދަލުކުރި މެޗުގެ ހަތަރުވަނަ އޮފިޝަލް ސަބެސްޓިއަން ކޮލްޓެސްކޫ މި ސީޒަނަށް ސަސްޕެންޑްކުރަން ޔުއެފާއިން ނިންމައިފިއެވެ.

ޑިސެމްބަރު މަހުގެ ނުވަވަނަ ދުވަހު ޕީއެސްޖީ އާއި އިސްތަންބޫލް ބަޝަކްޝެހީރް ބައްދަލުކުރި މެޗު ހުއްޓާލަން ޖެހުނީ ހަތަރުވަނަ އޮފިޝަލް ކޮލްޓެސްކޫ، ބަޝަކްޝެހީރުގެ އެސިސްޓަންޓް ކޯޗު ޕިއޭރޭ ވެބޯއާ ނަސްލީ ގޮތުން ދިމާކުރިކަމަށް ތުހުމަތުކުރެވުމުންނެވެ. އެގޮތުން ކޮލްޓެސްކޫ ދިން ލަފައަކަށް ބަލައި މެޗުގެ ރެފުރީ ވަނީ ވެބޯއަށް ރަތް ކާޑު ދައްކާފައެވެ. ރިޕޯޓުތައް ބުނާ ގޮތުން ކޮލްޓެސްކޫ ބަޝަކްޝެހީރުގެ އެސިސްޓަންޓް ކޯޗަށް އިޝާރާތްކޮށް "ކަޅު މީހާ" މި ބަސް ވަނީ ބޭނުންކޮށްފައެވެ. އެއާއެކު ކޮލްޓެސްކޫ ދެއްކި ވާހަކަތައް ބަޝަކްޝެހީރުގެ ބެންޗުގައިއިން ފޯވާޑް ޑެމްބަ ބާ އާއި ޕީއެސްޖީގެ އޮފިޝަލުން ވަނީ ރެފުރީގެ ސަމާލުކަމަށް ގެނެސްފައެވެ.

އަދި ކޮލްޓެސްކޫ ލައިގެން މެޗު ކުރިއަށްގެންދަން ބޭނުންނުވާތީ މެޗުގެ 14 މިނެޓު ކުޅެފައި ވަނިކޮށް، ބަޝަކްޝެހީރުގެ ކުޅުންތެރިން ވަނީ ދަނޑުން ފާބާފައެވެ. އެއާއެކު ޕީއެސްޖީގެ ކުޅުންތެރިންވެސް ވަނީ ދަނޑުން ފާބާފައެވެ. އެހެންކަމުން އެ މެޗު ސަސްޕެންޑްކުރިއިރު، އޭގެ އަނެއް ހަފުތާގައި، 14 ވަނަ މިނެޓުން ފަށައިގެން އެ މެޗު އަލުން ވަނީ ކުޅެފައެވެ.

މި މައްސަލައިގައި ރޮމޭނިއާގެ ކޮލްޓެސްކޫ މުޅި އުމުރަށް ސަސްޕެންޑްކުރަން ބަޝަކްޝެހީރުން އެދުނު ނަމަވެސް، މައްސަލަ ތަޙުޤީޤުކުރުމަށްފަހު ޔުއެފާއިން ނިންމާފައިވަނީ ކޮލްޓެސްކޫ ނަސްލީ ތަފާތުކޮށްފައި ނުވާ ކަމަށެވެ. އެކަމަކު އަޚުލާޤީ މައްސަލަތަކެއް އޭނާގެ ފަރާތުން ފެނުނު ކަމަށް ނިންމައި، މި ސީޒަނުގެ ނިޔަލަށް ކޮލްޓެސްކޫ ސަސްޕެންޑްކުރަން ޔުއެފާއިން ވަނީ ނިންމާފައެވެ.

ކޮލްޓެސްކޫ ސަސްޕެންޑްކުރަން ނިންމުމުގެ އިތުރުން، ޔުއެފާއިން ވަނީ އެ މެޗުގެ އެސިސްޓަންޓް ރެފުރީ އޮކްޓަވިއަން ސޮވްރޭއަށް ނަސޭހަތްތެރިވެފައެވެ. އެގޮތުން މެޗުތައް ކުރިއަށްދާއިރު، ވާހަކަދެއްކުމުގައި އަޚުލާޤީ މިންގަނޑާ އޮފިޝަލުން ޚިލާފުނުވުމަށްވެސް ޔުއެފާއިން ވަނީ އެދިފައެވެ.