ޔޫއެފާއިން، އިޒްރޭލުގައި ކުޅޭ ހުރިހާ މެޗެއް ފަސްކޮށްފި

އިޒްރޭލުގައި މިވަގުތު އެއްވެސް މެޗެއް ނުކުޅުމަށް، ޔޫރަޕުގެ ފުޓުބޯޅައިގެ މައި އިދާރާ (ޔުއެފާ) އިން ނިންމައިފި އެވެ.

ޔުއެފާ އިން ނިންމާފައި ވަނީ ކުރިއަށް އޮތް ދެ ހަފްތާގެ ތެރޭގައި އިޒްރޭލުގައި ކުޅުމަށް ހަމަޖެހިފައިވާ ހުރިހާ މެޗެއް ފަސް ކުރުމަށެވެ. އަދި އެ މެޗުތައް ކުޅޭނެ އައު ތާރީޚެއް ފަހުން ކަނޑައެޅުމަށް ވެސް އެ އިދާރާ އިން ވަނީ ނިންމައިފި އެވެ. ޔުއެފާ އިން މިގޮތަށް ނިންމާފައި ވަނީ މިވަގުތު އިޒްރާއީލުގައި ހަނގުރާމަ އިއުލާން ކޮށްފައިވާތީ އެވެ، އިޒްރޭލުން އާދީއްތަ ދުވަހު ހަނގުރާމަ އިއުލާނުކުރީ، އޭގެ ކުރީ ދުވަހު ފަލަސްތީނުގެ އިސްލާމީ ޖަމާއަތެއް ކަމަށްވާ ހަމާސް ޖަމާއަތުން ދިން ހަމަލާއެއްގައި 20 އަށް ވުރެ ގިނަ މީހުން ޝަހީދުވުމާ ގުޅިގެންނެވެ.

ޔުއެފާ އިން ފަސްކުރަން ނިންމި މެޗުތަކުގެ ތެރޭގައި 2024 ވަނަ އަހަރުގެ ޔޫރޯ ކޮލިފައިންގައި ސްވިޒަލޭންޑާ ދެކޮޅަށް އިޒްރޭލުން ކުޅޭ މެޗު ހިމެނެ އެވެ. ހަމައެއާއެކު ޔޫރޯ 2025 ގެ 21 އަހަރުން ދަށުގައި އެސްޓޯނިއާ އާއި ޖަރުމަނާ ދެކޮޅަށް ކުޅޭ މެޗުތަކުގެ އިތުރުން، 17 އަހަރުން ދަށުގައި ބެލްޖިއަމް، ޖިބްރޯލްޓާ އަދި ވޭލްސްއާ ދެކޮޅަށް ކުޅޭ މެޗުތައް ހިމެނެ އެވެ.

ޔުއެފާއިން ބުނީ ޔޫރަޕިއަން ޗެމްޕިއަންޝިޕް ކޮލިފައިންގައި ކޮސޯވޯ އާއި އިޒްރޭލް ބައްދަލުކުރާ މެޗު އޮކްޓޫބަރު މަހުގެ 15 ވަނަ ދުވަހު ކުޅުމަށް ހަމަޖެހިފައިވާ ތާރީހުގައި ކުޅެވިދާނެ ކަމަށާއި، ނުވަތަ އެ މެޗު ވެސް ފަސްކުރަން ޖެހިދާނެތޯ ބެލުމަށް ކުޑަ ދުވަސްކޮޅަކަށް އިންތިޒާރު ކުރާނެ ކަމަށެވެ.

ޔުއެފާ އިން މިހެން ނިންމާފައިވާއިރު، ދުނިޔޭގެ ފުޓުބޯޅައިގެ މައި އިދާރާ (ފީފާ) އިން ވެސް ވަނީ އިޒްރޭލުގައި އެއްވެސް މެޗެއް ނުކުޅުމަށް ނިންމައިފަ އެވެ.