އުތެމަ ޖަމިއްޔާގެ މައްސަލައިގައި މޯލްޑިވްސް ބްރޯޑްކާސްޓިންގ ކޮމިޝަން (ބްރޯޑްކޮމް)ގެ އެންގުމަށް ތަބާވެ ރާއްޖެ ޓީވީން މާފަށް އެދިއްޖެއެވެ.

ބްރޮޑްކޮމްއިން ވަނީ، މިމައްސަލަ އެ ކޮމިޝަނުން ބެލުމަށްފަހު ރާއްޖެ ޓީވީ ބްރޯޑްކާސްޓްކުރުމުގެ ޤާނޫނާ ޚިލާފްވެފައިވާކަމަށް ކަނޑައަޅާ މާއާފަށް އެދި ބަޔާނެއް ނެރުމަށް އަންގާފައެވެ. އަދި އެއްވެސް ޝަރުތެއްނެތި އެ ބަޔާން ރޭގަނޑު 8:00 އާއި 9:00 ދެމެދު ވަގުތެއްގައި އާންމުކުރުމަށް ވަނީ އަންގާފައެވެ. މި މައްސަލައިގައި 8 މާރޗް 2021ގައި ނެރުނު ނޫސްބަޔާނެއްގައި ރާއްޖެ ޓީވީން ވަނީ ބްރޯޑްކޮމްއިން އަންގާފައިވާތީ މާފަށް އެދި ބަޔާނެއް އާންމުކޮށްފައެވެ. މި ބަޔާނުގައި މިކަން ހިނގާދިޔަގޮތްކަމަށް ސްޓޭޝަންގެ މެނޭޖްމެންޓުން ކަން ހިނގާފައިވާގޮތް ބެލިބެލުމުން ހާމަވިކަންކަމުގެ ތަފްސީލުވެސް ވަނީ ހިއްސާކޮށްފައެވެ.

2020 ސެޕްޓެމްބަރު 02 ވަނަ ދުވަހުގެ ހެނދުނު 10:00 ގެ ޚަބަރުގެ ތެރެއިން "އުތެމައަކީ އިސްލާމްދީން ޤަބޫލުނުކުރާ ދިވެހިން ދިފާއުކޮށް ވާހަކަދައްކާ ޖަމިއްޔާއެއްކަމަށް.." ބުނެ، ގެނެސްދީފައިވާ ޚަބަރަކީ ހަޤީގަތާ ހިލާފް އަދި ބްރޯޑްކާސްޓްކުރުމުގެ ޤާނޫނާ ހިލާފަށް ބްރޯޑްކާސްޓްކޮށްފައިވާ ޚަބަރެއްކަމަށް ބުނެ އުތެމަ ޖަމިއްޔާގެ ފަރާތުން މޯލްޑިވްސް ބްރޯޑްކާސްޓިންގ ކޮމިޝަނަށް ހުށަހެޅި ޝަކުވާއަކާ ގުޅިގެން އެކޮމިޝަނުން އެމައްސަލަ ބެލުމަށްފަހު އެކަމާ ގުޅިގެން މާފަށް އެދި ބަޔާނެއް ނެރުމަށް 2021 ފެބްރުއަރީ 25 ވަނަ ދުވަހު އަންގާފައިވާކަމަށް ރާއްޖެޓީވީން ވަނީ ބުނެފައެވެ. ރާއްޖެޓީވީން ގެނެސްދިން ޚަބަރުގެ ތެރޭގައި "އުތެމައަކީ އިސްލާމްދީން ޤަބޫލުނުކުރާ ދިވެހިން ދިފާއުކޮށް ވާހަކަދައްކާ ޖަމިއްޔާއެއްކަމަށް.." ބުނެފައިވާތީ އެކަމާ ގުޅިގެން ސްޓޭޝަންގެ މެނޭޖްމެންޓުން ކަން ހިނގާފައިވާގޮތް ބެލިބެލުމުގައި، ޝަކުވާގައި ފާހަގަ ކޮށްފައިވާ ޚަބަރުގެ އިބާރާތް އެގޮތަށް ގެނެވިފައި އެވަނީ އެ ޚަބަރު ލިޔުނު ނޫސްވެރިޔާ ޚަބަރުގެ ބެކްގްރައުންޑް ލިޔެފައިވާ ގޮތުންނާއި، އެދުވަސްވަރު މުޖްތަމައު ތެރޭގައި އަދި ސޯޝަލް މީޑިއާގެ އެކި ޕްލެޓް ފޯމްތަކުގައިވެސް ގިނަ ބަޔަކު އުތެމަ ޖަމިއްޔާއާއި ބެހޭ ގޮތުން އެފަދަ ޝުއޫރުތަކެއް ފާޅުކުރަމުން ދިޔުމާއި ގުޅިގެން އެޚަބަރު ލިޔުނު ނޫސްވެރިޔާއަށްވެސް އެފަދަ ގޮތަކަށް ވިސްނިފައި އޮތުމުން ކަމަށް ފާހަގަކުރެވިފައިވާތީ އެކަމާ ގުޅޭގޮތުން އިދާރީގޮތުން އަޅަންޖެހޭ ފިޔަވަޅުތައް އަޅާފައިވާކަމަށް ވަނީ ބުނެފައެވެ. ފިޔަވަޅު އެޅުމަށްފަހު ރާއްޖެޓީވީން އެކަން މޯލްޑިވްސް ބްރޯޑްކާސްޓިންގ ކޮމިޝަނަށް އަންގާފައިވާކަމަށް ވަނީ ނޫސްބަޔާނުގައި ބުނެފައެވެ. ނަމަވެސް މިމައްސަލަ ބްރޮޑްކޮމްއިން ބެލުމަށްފަހު ރާއްޖެޓީވީ ބްރޯޑްކާސްޓްކުރުމުގެ ޤާނޫނާ ޚިލާފްވެފައިވާކަމަށް ކަނޑައަޅާ މާއާފަށް އެދި ބަޔާނެއް ނެރުމަށާއި އެއްވެސް ޝަރުތެއްނެތި އެ ބަޔާން ރޭގަނޑު 8:00 އާއި 9:00 ދެމެދު ވަގުތެއްގައި އާންމުކުރުމަށް އަންގާފައިވާކަމަށް ވަނީ ބުނެފައެވެ.