ކ.ވިލިނގިލި ސޯޝަލް ސަރވިސް ސެންޓަރުގައި މަސައްކަތް ކުރާ މުވައްޒަފުންނަށް ރައްކާތެރިކަން ނެތް ކަމުގެ މައްސަލައެއް ފެންމަތިވެއްޖެއެވެ.

ރާއްޖެއެމްވީއަށް އިތުބާރުހުރި ފަރާތަކުން ވިދާޅުވީ، ވިލިނގިލި ސޯޝަލް ސަރވިސް ސެންޓަރުގައި މުވައްޒަފުން މަސައްކަތް ކުރަމުންދަނީ ބިރުވެރިކަމެއްގެ ތެރޭގައި ކަމަށާއި، ރައްކާތެރި މާހައުލެއް ނެތް ކަމަށެވެ.

އެބޭފުޅާ ވިދާޅުވީ ވިލިނގިލީގައި ހުންނަ ކުރީގެ ކުޑަ ކުދިންގެ ހިޔާ، މިހާރުގެ ސޯޝަލް ސަރވިސް ސެންޓަރުގައި މިވަގުތު 4 ކުއްޖަކު ބަލަހައްޓަމުންދާ ކަމަށެވެ. އެއީ 16 އަހަރުން ދަށުގެ ފިރިހެން ކުއްޖެއް، 18 އަހަރުން މަތީގެ އެއް އަންހެން ކުއްޖެއް، އަދި 18 އަހަރުގެ ދެކުދިން ކަމަށެވެ.

އެބޭފުޅާ ވިދާޅުވީ އެސެންޓަރުގައި 3 ސޯޝަލް ވޯކަރުން މަސައްކަތް ކުރާ ކަމަށާއި، ސުޕަވައިޒަރ ލެވަލްގެ 3 މުވައްޒަފުން މަސައްކަތް ކުރާ ކަމަށެވެ. އަދި މަސައްކަތު މީހުން ވެސް އުޅޭކަން ފާހަގަކުރެއްވިއެވެ.

ނަމަވެސް 18 އަހަރު ފުރިފައިހުރި އަންހެން ކުއްޖެއްގެ ސަބަބުން އެ ސެންޓަރުގައި މަސައްކަތް ކުރާ މުވައްޒަފުންގެ އިތުރުން އެހެން ކުދިންނަށް ވެސް ބިރުވެރިކަން އުފެދިފައިވާ ކަމަށް އެބޭފުޅާ ވިދާޅުވިއެވެ. އެބޭފުޅާ ވިދާޅުވީ އެ ކުއްޖާ ވަޅިން މުވައްޒަފުންނަށް ބިރު ދައްކާ ކަމަށާއި، ބޭނުންވާ ކަންކަން ކުރުމަށް އަމިއްލަ ހަށިގަނޑަށް ވެސް ގެއްލުންދީ، އިމާރާތުގެ ތެރޭގައި އަލިފާން ރޯކޮށް ބިރުވެރި ކަންކަން ކުރަމުންދާ ކަމަށެވެ.

މީގެ އިތުރުން އެބޭފުޅާ ވިދާޅުވީ އެ ކުއްޖާގެ މައްސަލަ ވަރަށް ގިނަ ފަހަރުގެ މަތިން އިޖުތިމާއީ އަދި އާއިލީ ތަރައްގީއާއި ބެހޭ ވަޒީރު ޑރ.އާއިޝަތު ޝިހާމްގެ ސަމާލުކަމަށް ގެނެސްފައިވާ ކަމަށާއި، ހައްލު ހޯދައިދިނުމުގެ ބަދަލުގައި އެކުއްޖާގެ މައްސަލަތައް ސިއްރު ކުރުމަށް މަސައްކަތް ކުރަމުންދާ ކަމަށެވެ. އެއީ ނަފްސާނީ ބަލި ކުއްޖެއް ކަމަށާއި، އެކަށީގެންވާ ފަރުވާ ދިނުމުގައި އިހުމާލުވެފައިވާ ކަމަށް އެބޭފުޅާ ވިދާޅުވިއެވެ.

އެ ކުއްޖާގެ ސަބަބުން އެހެން ކުދިންނަށް ވެސް އެކަމުގެ ނޭދެވޭ އަސަރުކުރާކަން ފާހަގަކުރައްވައި އެބޭފުޅާ ވިދާޅުވީ އެ ކުއްޖާގެ ފަރާތުން ވަރަށް ގިނަ މުވައްޒަފުންނަށް އަނިޔާ ލިބިފައިވާ ކަމަށާއި، އެ ކުއްޖާ ކޮންޓްރޯލް ކުރުމަށް ދަތިވެފައިވާ ކަމަށެވެ.

މި މައްސަލައާ ގުޅޭގޮތުން އިޖުތިމާއީ އަދި އާއިލީ ތަރައްގީއާ ބެހޭ ވުޒާރާއިން ބުނީ ތަފާތު އެކިއެކި ސަބަބުތަކާއި ހުރެ ދައުލަތުގެ ބެލެހެއްޓުމުގެ ދަށަށް ގެނެވޭ ފަރާތްތަކާއި ކުޑަކުދިންނަކީ ނާޒުކު ހާލަތްތަކުގައި ތިބޭ ފަރާތްތައް ކަމަށެވެ. އަދި ދައުލަތުގެ ބެލުމުގެ ދަށުން އެފަދަ ފަރާތްތަކާއި ކުދިން ބަލަހައްޓަމުންދާ މަރުކަޒުތަކަކީ، އެ ފަރާތްތަކުގެ އާއިލީ ވެއްޓަށްވުމާއެކު، އެ މަރުކަޒުގައި އެ ފަރާތްތަކާއި ކުދިން އުޅޭއިރު، އެ މާހައުލުގައި ހިނގާ ކަންކަމާއި، އެފަދަ ފަރާތްތަކާއި ކުދިންގެ ދިރިއުޅުމުގެ ކަންކަމަކީ އާންމުކުރާ މައުލޫމާތެއް ނޫން ކަމަށެވެ.

މީގެ އިތުރުން އެ ވުޒާރާއިން ބުނީ، ދައުލަތުގެ ބެލުމުގެ ދަށުން މީހުންނާއި ކުދިން ބަލަހައްޓަމުންދާ މަރުކަޒުތަކުގައި އުޅޭ ހުރިހާ ފަރާތްތަކެއް ސަލާމަތާއި ރައްކާތެރިކަން ކަށަވަރުކުރުމާއެކު، އެ ތަންތަނުގައި މަސައްކަތްކުރާ މުވައްޒަފުންނަށް ރައްކާތެރި މަސައްކަތުގެ މާހައުލެއް ގާއިމްކުރުމަށް ޚާއްސަ ސަމާލުކަމެއްދީގެން މަސައްކަތް ކުރަމުންދާ ކަމަށެވެ.