ދިވެހިން ކޮވިޑާއެކު 1 އަހަރު، މި ބަލީގައި އެޑްމިޓް ކުރަން ޖެހުނު މީހުންގެ އަދަދު 2500ން މަތި
ރާއްޖެއިން ކޮވިޑް ކޭސްއެއް ރިޕޯޓް ކުރިތާ އަހަރެއް ވަނީ ވެފައި
ކްލިނިކަލް އެޑްވައިޒަރީ ޓީމުން ޑރ މޫސާ ހުސައިން ވާހަކަ ދައްކަވަނީ- ޑރ ވަނީ ވެކްސިން ޖެހުމަށް އިލްތިމާސް ކުރައްވާފައި
ރާއްޖެއިން ކޮވިޑް-19 ގެ ކޭސްއެއް ރިޕޯޓް ކުރިތާ އަހަރެއް ވެފައިވާއިރު، އެޑްމިޓް ކުރަން ޖެހުނު މީހުންގެ އަދަދު 2500ން ގިނަކަމަށް ހެލްތް އިމަރޖެންސީ އޮޕަރޭޝަންސް ސެންޓަރ (އެޗްއީއޯސީ)ން ބުނެފިއެވެ.
އާދިއްތަ ދުވަހުގެރޭ އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި ކްލިނިކަލް އެޑްވައިޒަރީ ޓީމުން ބައިވެރިވެވަޑައިގެން ޑރ މޫސާ ހުސައިން ވިދާޅުވީ، ރާއްޖެއިން ކޮވިޑް ކޭސްއެއް ރިޕޯޓް ކުރިތާ އަހަރެއް ފުރިފައިވާއިރު، ގާތްގަނޑަކަށް 2500ށް ވުރެ ގިނަ މީހުން މި ބަލީގައި އެޑްމިޓް ކުރަން ޖެހުނު ކަމަށެވެ. އޭގެ ތެރެއިން އެންމެ ގިނަ މީހުންނަށް ފަރުވާ ދީފައިވަނީ ދަރުމަވަންތަ ހޮސްޕިޓަލުގައިކަން ޑރ މޫސާ ހުސައިން ފާހަގަ ކުރެއްވިއެވެ.
ޑރ ވިދާޅުވީ، ދަރުމަވަންތަ ހޮސްޕިޓަލުގެ 11 ވަނަ ފަންގިފިލާގައި 92 މީހަކަށް އެޑްމިޓް ކޮށްގެން ފަރުވާ ދީފައިވާ ކަމަށެވެ. އަދި 21 މީހަކަށް ވެންޓިލޭޓަރުގައި ފަރުވާ ދީފައިވާއިރު، 5 މީހުންނަށް ފަރުވާދީ ރަނގަޅު ކުރެވިފައިވެއެވެ. އަދި އޭގެ ތެރެއިން 16 މީހުން ވަނީ ނިޔާވެފައެވެ.
އޭގެ އިތުރުން، މިހާރުވެސް ދަރުމަވަންތަ ހޮސްޕިޓަލުގައި ޑީއެޗް 11 ގައި އެކަކަށް ފަރުވާދެމުންދާއިރު، ޑީއެޗް 16 ގައި 3 މީހަކަށް ދަނީ ފަރުވާދެމުންނެވެ. ޑރ މޫސާ ވިދާޅުވީ، އޭގެ ތެރޭގައި ހިމެނެނީ 60 އަހަރުން މަތީގެ މީހުން ކަމަށެވެ.
މިދިޔަ އެއް އަހަރުގެ ތަޖުރިބާ ހިއްސާ ކުރައްވައި ޑރ ވިދާޅުވީ 3 ވަނަ ޕީކް ތެރޭގައި ގިނަ ކޭސްތަކެއް ފެންނަމުންދާ ކަމަށެވެ. ނަމަވެސް އާދައިގެ ކަންކަމުން ކޭސްތަކުގެ އަދަދުތައް މަދު ކުރެވޭނެކަންވެސް ޑރ ފާހަގަ ކުރެއްވިއެވެ. އަދި ވެކްސިން ޖެހުމުން ބަލީގައި ޙާލަތު ބޮޑުވުން ކުޑަކޮށްދޭކަން ފާހަގަ ކުރައްވައި ޑރ އިތުރަށް ވިދާޅުވީ، ހުރިހާ ރައްޔިތުންވެސް ވެކްސިން ޖެހުމަށް އިލްތިމާސް ކުރައްވާ ކަމަށެވެ.
އައު ވޭރިއަންޓާ ގުޅޭގޮތުން ވާހަކަ ދައްކަވަމުން ޑރ މޫސާ އިތުރަށް ވިދާޅުވީ، ކޮވިޑް ޖެހުމުގައި ވަކި އުމުރުފުރާއެއް ނެތް ކަމަށެވެ. ނަމަވެސް ފަހަކަށް އައިސް އުމުރުން ޅަ މީހުން ނިއުމޯނިއާ ޖެހިގެން އެޑްމިޓް ކުރަންޖެހޭކަން ފާހަގަ ކުރެވިފައިވާ ކަމަށް ޑރ ވިދާޅުވިއެވެ. ޑރ ވިދާޅުވީ އެކަންކަމުގެ އަސަރު އުމުރުގައި ދިގު މުއްދަތަކަށް ހުންނާނެ ކަމަށް ބެލެވޭ ކަމަށެވެ.
އޭގެ އިތުރުން، ރާއްޖޭގެ ސާމްޕަލްތައް ބޭރަށް ފޮނުވައިގެން ޓެސްޓުކޮށް، ރާއްޖޭގައި އުޅެމުންދަނީ ސީދާ ކޮން ވޭރިއަންޓެއްކަން ދެނެގަތުމަށް މަސައްކަތް ކުރަމުންދާކަން ފާހަގަ ކުރައްވައި ޑރ ވިދާޅުވީ، މިހާރު ބާރު އަޅުއްވަނީ ވަކި ވެކްސިނަކަށް މަޑުނުކޮށް، ކޮންމެ ވެކްސިނެއް ވިޔަސް ޖެހުމަށް ކަމަށެވެ.
ރާއްޖެއިން ކޮވިޑް ކޭސްއެއް ފެނުނުތާ އަހަރެއް ފުރިފައިވާއިރު، މިހާރު ދިވެހިން ދަނީ ކޮވިޑުގެ 3 ވަނަ ރާޅާ ކުރިމަތިލަމުންނެވެ. އަދި މިއީ މީގެ ކުރިން ފެނިފައިވާ ވަރަށްވުރެ ނުރައްކާތެރި ކޮވިޑް ރާޅެއްކަން ސިއްޙީ އޮފިޝަލުންވެސް ފާހަގަ ކުރެއެވެ.
