މާލޭގައި ސަރުދާރުން ލައިގެން ހިންގި 100 އަހަރު ތެރޭގައިވެސް ނުވާ ގެއްލުން މުއިއްޒު މާލެއަށް ދިން: ނަޝީދު
ޑރ. މުއިއްޒު ވަނީ މީގެ ކުރިން ހަތް އަހަރު ވަންދެން ހައުސިން މިނިސްޓަރކަން ކުރައްވާފައި
ޑރ. މުހައްމަދު މުއިއްޒު
ލޯކަލް ކައުންސިލް އިންތިހާބުގައި މާލޭގެ މޭޔަރުކަމަށް އެމްޑީޕީއާ ވާދަކުރައްވަން ނިކުމެވަޑައިގެން ހުންނެވި ޑރ. މުހައްމަދު މުއިއްޒަކީ ފާއިތުވެދިޔަ ތަނުގައި ސަރުދާރުންގެ 100 އަހަރު ތެރޭގައިވެސް މާލެ ސަރަހައްދަށް ވެފައި ނުވާވަރުގެ ބޮޑެތި ގެއްލުންތައް މާލެއަށް ދީފައިވާ ބޭފުޅެއްކަމަށް ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެމްޑީޕީން ކުރިއަށް އޮތް ލޯކަލް ކައުންސިލް އިންތިހާބަށް ތައްޔަރުވުމަށް ބާއްވަމުންދާ ރަށްވެހި ފަތިސް ކެމްޕޭން ބައްދަލުވުމުގައި އާދިއްތަދުވަހުގެ ރޭ ވާހަކަދައްކަވަމުން ރައީސް ނަޝީދު ވިދާޅުވީ، ލޯކަލް ކައުންސިލް އިންތިހާބުގައި އެމްޑީޕީއާ ވާދަކުރަން ނިކުމެ ތިބި އިދިކޮޅު ކޯލިޝަންއަކީ އެމްޑީޕީން ރާއްޖެއަށް ގެންނަން އުޅޭ އަދި ރައްޔިތުން އެންމެ ބޭނުންވާ ލާމަރުކަޒީ ނިޒާމު "ވަޅުލަން ބޮކަރު ކާފޫރު ހިއްޕަވައިގެން" ތިބި ބައެއް ކަމަށެވެ.
ވަކިން ހާއްސަކޮށް މާލޭގެ މޭޔަރުކަމަށް ވާދަކުރައްވާ ކުރީގެ ހައުސިން މިނިސްޓަރ ޑރ. މުހައްމަދު މުއިޒަށް އިޝާރާތްކުރައްވާ ރައީސް ނަޝީދު ވިދާޅުވީ އެމަނިކުފާނަކީ މާލޭގެ ހަތަރު އަވަށަށް ސަރުދާރުން ލައިގެން ހިންގި 100 އަހަރުވެސް ރާއްޖެއަށް ނުވާ ގެއްލުން ގައުމަށް ދީފައިވާ ބޭފުޅެއް ކަމަށެވެ.
ޑރ. މުހައްމަދު މުއިއްޒަކީ ދެ ވެރިއެއްގެ ވެރިކަމުގައި ޖެހިޖެހިގެން އައި ދެ ސަރުކާރުގެ ހައުސިންގ މިނިސްޓަރުކަން ކުރެއްވި ވަޒީރެކެވެ. އެގޮތުން ރައީސް ނަޝީދުގެ ވެރިކަމަށް ފަހު ކުރީގެ ރައީސް ޑރ. ވަހީދާއި ރައީސް ޔާމީންގެ ވެރިކަމުގައިވެސް ހައުސިން މިނިސްޓަރކަން ކުރެއްވީ ޑރ. މުއިއްޒުއެވެ. އެ ހަތް އަހަރު ތެރޭގައި މުޅި މާލެ ސަރަހައްދުންވެސް އާންމުންނަށް ބޯހިޔަވާހިކަން ފޯރުކޮށްދިނުމަށް ލިޔުން ހަވާލުކުރެއްވީ ރައީސް ސޯލިހު ވެރިކަމުގެ ހުވާ ކުރެއްވި ދުވަހުއެވެ.
ރައީސް ޔާމީންގެ ވެރިކަމަށް ފަހު ޑރ. މުއިއްޒު ގެންދަވަނީ ތަކުރާރުކޮށް ބޯހިޔާވަހިކަމުގެ މައްސަލަތަކުގައި ސޯޝަލް މީޑިއާގައި އަޑުގަދަކުރައްވަމުންނެވެ. އެންމެ ފަހު ވަގުތު ދޫކުރެއްވި ފްލެޓު ލިޔުންތަކުގައި ވެސް ގިނަ މައްސަލަތަކެއް ހުރެ އެ މަސައްކަތް ވެސް މި ސަރުކާރަށް އަލުން ކުރަން ޖެހުނުއިރު، އެމަނިކުފާނު މޭޔަރުކަމަށް ކެމްޕޭން ކުރައްވަނީވެސް ބޯހިޔާވަހިކަމުގެ މައްސަލަ ހައްލުކޮށްދެއްވާނެ ކަމަށް ވިދާޅުވެއެވެ.
