ހުކުރު ދުވަހު ރާއްޖެއިން ކޮވިޑް-19އަށް ޕޮޒިޓިވްވި މީހުންގެ އަދަދު 118ށް އަރައިފިއެވެ.

އެޗްޕީއޭއިން އާންމުކުރި ތަފާސްހިސާބުތައް ދައްކާގޮތުން ހުކުރު ދުވަހު ޕޮޒިޓިވްވި 118 މީހުންގެ ތެރެއިން 95 މީހުންނަކީ މާލެ ސަރަހައްދުން ޕޮޒިޓިވްވި މީހުންނެވެ. އަދި ރިސޯޓުތަކުން 19 ކޭސްފެނިފައިވާއިރު އަތޮޅުތެރެއިން ރިޕޯޓްކޮށްފައި ވަނީ ހަތަރު ކޭސްއެވެ.

ހުކުރު ދުވަހު ޕޮޒިޓިވްވި 118 މީހުން ޕޮޒިޓިވްވީ ބުރާސްފަތި ދުވަހުގެ އިރުއޮއްސި ހަޔަކުން ފެށިގެން ހުކުރު ދުވަހުގެ އިރުއޮއްސި ހަޔަކާ ދެމެދު ނެގި 2،964 ސާމްޕަލްގެ ތެރެއިންނެވެ. މިއާއެކު މުޅި ރާއްޖެއިން ޕޮޒިޓިވްވި ކޭސްތަކުގެ އަދަދު މި ވަނީ 20،565ށް އަރާފައެވެ. އަދި މިހާރު ފަރުވާދެމުން އަންނަނީ ޖުމްލަ 2،658 މީހުންނަށެވެ. އޭގެ ތެރެއިން 167 މީހުންނަށް ފަރުވާދެމުން އަންނަނީ ހޮސްޕިޓަލުގައި އެޑްމިޓްކޮށްގެންނެވެ. އަދި 17،836 މީހުން ވަނީ ރަނގަޅުވެފައެވެ.

މި ބަލީގައި ރާއްޖެއިން މިހާތަނަށް 64 މީހުން ވަނީ މަރުވެފައެވެ.

ރާއްޖެއިން ފެންނަ ކޮވިޑް-19ގެ ކޭސްތައް އިތުރުވަމުންދާއިރު، ބަލިން ސަލާމަތްވުމަށް އަޅަމުން އަންނަ ފިޔަވަޅުތައް ވެސް އަންނަނީ ވަރުގަދަ ކުރަމުންނެވެ. އެގޮތުން ފަސް މީހުންނަށް ވުރެ ގިނަ މީހުން އެއް ސަރަހައްދަކަށް އެއްވުން މަނާކޮށްފައިވާއިރު ހާއްސަ ހުއްދައިގައި އަތޮޅުތެރެއަށް ދިއުމަށްވެސް ނެގެޓިވް ޕީސީއާރް ޓެސްޓު ހުށަހަޅަން ޖެހޭ ގޮތަށް ވަނީ ނިންމާފައެވެ.

މީގެ އިތުރަށް އިރުއޮއްސި ހަޔަކުން ފެށިގެން އެއްގަމު އުޅަނދު ފަހަރު ދުއްވުން މަނާކޮށްފައިވާއިރު، ރޭގަނޑު 11ން ފެށިގެން ބޭރުގައި މީހުން އުޅުން ވަނީ މަނާކޮށްފައެވެ.