އިންޑިޔާގެ ވިސްތާރާ އެއަރލައިންގެ ދަތުރުތައް ރާއްޖެއަށް ފަށައިފިއެވެ.

ބުދަ ދުވަހު ވިސްތާރާ އެއަރލައިންގެ ފުރުތަމަ ފްލައިޓް ރާއްޖެއަށް އައިސްފައިވާއިރު އެ ފްލައިޓަށް ވެލާނާ އިންޓަރނޭޝަނަލް އެއަރޕޯޓުން ވަނީ ހޫނު މަރުޚަބާއެއް ކިޔާފައެވެ. ވިސްތާރާ އެއަރލައިނުން ދަތުރުތައް ކުރަނީ އިންޑިޔާގެ މުމްބާއީން ވެލާނާ އިންޓަނޭޝަނަލް އެއަރޕޯޓަށެވެ. މިއެއަރލައިންގެ ދަތުރުތައް ހަފްތާއަކު ތިން ދުވަހު ރާއްޖެއަށް ކުރާނެއެވެ.

އެގޮތުން ކޮންމެ ހަފްތާއެއްގެ ވެސް ބުދަ، ހޮނިހިރު އަދި އާދިއްތަ ދުވަހު މި އެއަރލައިންގެ ދަތުރުތައް ރާއްޖެއަށް ކުރާނެކަމަށް ވިސްތާރާއިން ބުނެއެވެ. ދަތުރުތަކުގެ އަގު އުޅެނީ 2 ކޮޅު ޓިކެޓް 227 ޑޮލަރަށެވެ.

ވިސްތާރާ އެއަރލައިނުން ރާއްޖެއަށް ދަތުރު ފަށާފައި މިވަނީ އިންޑިއާ އާއި ރާއްޖެއާ ދެމެދު ގާއިމުކޮށްފައިވާ އެއަރ ޓްރެވެލް ބަބުލްގެ ދަށުންނެވެ.

މިއަހަރުގެ މިހާތަނަށް ރާއްޖެއަށް އެންމެ ގިނަ އަދަދަކަށް ފަތުރުވެރިން އައިސްފައި ވަނީ ވެސް އިންޑިއާއިން ކަމަށްވާއިރު މިދިޔަ އަހަރުވެސް އެންމެ ގިނަ ފަތުރުވެރިން އައިސްފައިވަނީ އިންޑިޔާއިންނެވެ. މިއަހަރުގެ މިހާތަނަށް އިންޑިއާއިން ރާއްޖެއަށް ވަނީ 45636 ފަތުރުވެރިން އައިސްފައެވެ. މިދިޔަ އަހަރު ރާއްޖެއަށް އިންޑިޔާގެ 62،960 ފަތުރުވެރިން ވަނީ އައިސްފައެވެ. އެއީ މިދިޔަ އަހަރު ޒިޔާރަތްކުރި ފަތުރުވެރިންގެ 11.3 އިންސައްތައެވެ.