ވީއައިއޭއަށް ފުރަން ދާ މީހުން ތިން ގަޑިއިރު ކުރިއަށް ދިއުމަށް އިލްތިމާސްކޮށްފި
ޑޮމެސްޓިކް ފްލައިޓްތަކުން ދަތުރުކުރާ ފަސިންޖަރުން ވެސް 2 ގަޑިއިރު ކުރިން އައުމަށް އެދިފައިވޭ
ވެލާނާ އިންޓަނޭޝަނަލް އެއާޕޯޓު
މި ދުވަސްވަރު ވެލާނާ އިންޓަނޭޝަނަލް އެއާޕޯޓް (ވީއައިއޭ)ގެ ޑިޕާޗާ ބާރުބޮޑުވެފައިވާތީ ފުރަން ދާ މީހުން ތިން ގަޑިއިރު ކުރިއަށް ދިއުމަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިލްތިމާސްކޮށްފިއެވެ.
އެމްއޭސީއެލުން ބުނީ މިދުވަސްވަރު ޑިޕާޗާ ވަރަށް ބާރުބޮޑު ކަމަށާއި، ކިޔު ވަރަށް ދިގުވާ ކަމަށެވެ. އެހެންކަމުން ފުރަންދާ މީހުން އެކަމަށް ސަމާލުވެ އިންޓަނޭޝަނަލް ފްލައިޓުން ދަތުރުކުރާ ފަސިންޖަރުން ތިން ގަޑިއިރު ކުރިން އެއާޕޯޓަށް އައުމަށް އެދޭ ކަމަށެވެ. އަދި ޑޮމެސްޓިކް ފްލައިޓްތަކުން ދަތުރުކުރާ ފަސިންޖަރުން ވެސް 2 ގަޑިއިރު ކުރިން އައުމަށް އެމްއޭސީއެލުން ވަނީ އެދިފައެވެ.
އެއާޕޯޓްގައި އެހީތެރިކަން ބޭނުންވާ މީހުންނަށް އެމްއޭސީއެލްގެ މުވައްޒަފުން އެހީތެރިކަން ފޯރުކޮށްދޭނެ ކަމަށް ވެސް އެ ކުންފުނިން ބުނެއެވެ.
އެމްއޭސީއެލުން ބުނީ ފަސެންޖަރުންގެ ރައްކާތެރިކަން ކަށަވަރުކުރުމަށް އަބަދުވެސް މުވައްޒަފުން އެއާޕޯޓުގައި ހަރަކާތްތެރިވަމުންދާނެ ކަމަށެވެ. އެއްވެސް މައްސަލައެއް ނުޖެހި ރަނގަޅު ޚިދުމަތެއް އާއްމު ރައްޔިތުންނަށް ދޭން ބޭނުންވާތީ ހުރިހާ ފަރާތްތަކެއްގެ އެއްބާރުލުން ބޭނުންވާ ކަމަށް އެމްއޭސީއެލުން ބުނެއެވެ.
ކޮންމެ އަހަރެއްގެ ޑިސެންބަރު އަދި ޖެނުއަރީ މަހު ވީއައިއޭ ގައި ބާރުބޮޑުވެއެވެ. އެއީ ޑިސެންބަރު މަހު ސްކޫލުތައް ބަންދުވުމާއި، ރާއްޖޭގެ ޓޫރިޒަމްގެ އެންމެ ޕީކް ދުވަސްވަރަށްވާތީއެވެ. ގިނަ އަދަދެއްގެ ފަތުރުވެރިން ރާއްޖެއަށް އަންނައިރު، އުމްރާއަށް ދިއުމަށް ވެސްގިނަ އަދަދެއްގެ ބަޔަކު މިދުވަސްވަރު ފުރައެވެ.
