ވެލާނާ ބައިނަލްއަގުވާމީ އެއާޕޯޓުގެ އެތެރޭގެ އުދުހުމުގެ ގިމަތަ ނުވަތަ ޑޮމެސްޓިކް ޓާމިނަލާ ހަމައަށް ޓެކްސީގައި ދެވޭ ގޮތަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ހަދައިފިއެވެ.

އެމްއޭސީއެލް އިން އެފަދައިން އަމަލުކުރަން ފަށާފައިވަނީ އާދިއްތަ ދުވަހުއެވެ. އެގޮތުން އެ ފަދައިން އަމަލުކުރަން ފެށުމާ ގުޅިގެން އެމްއޭސީއެލްގެ މެނޭޖިން ޑިރެކްޓަރު އިބްރާހީމް ޝަރީފް މުހައްމަދު ނޫސްވެރިންނާ ބައްދަލުކުރައްވައި ވިދާޅުވީ އާދިއްތަ ދުވަހު އަލަށް އަމަލު ކުރަން ފެށުނު ކަމީ ވެލާނާ އެއާޕޯޓުން ޚިދުމަތް ހޯދާ މީހުންނަށް ލުއި ފަސޭހަ ގޮތްތަކެއް ހޯދައި ދިނުމުގެ މަސައްކަތް ފެށުމުގެ މަގްސަދުގައި ފެށި މަސައްކަތެއް ކަމަށެވެ.

އެގޮތުން ޝަރީފް ވިދާޅުވީ އެތެރޭގެ އުދުހުމުގެ ގިމަތައިގެ ކައިރިއަށް ފުރަން އަންނަ މީހުންގެ ކާރުތަކަށް މަޑުކުރެވޭ ގޮތް ހެދުމަކީ ގޮންޖެހުން ބޮޑު ކަމަކަށްވީ ނަމަވެސް، އެ މަސައްކަތް ކުރަނީ އެމްއޭސީއެލްގެ ހުރިހާ ސެކްޝަނަކާއި، އެއާޕޯޓް ސެކިއުރިޓީގެ އިތުރުން ފުލުހުންގެ އެހީތެރިކަމާ އެކުގައި ކަމަށެވެ.

އެއާއެކު، ޝަރީފް ވިދާޅުވީ އެންމެ ބޮޑު އަމާޒަކީ އެ ގިމަތައިގެ ބޭނުންކޮށްގެން އެއާޕޯޓަށް އަންނަ މީހުންނަށް ނުވަތަ އެރައިވަލްސް ވެސް ލުއި ފަސޭހަ ކުރުމަށް ޓެކްސީ އަދި ކާރުތައް އެތަނުން ނެގޭނެ ގޮތެއް ހެދުން ކަމަށެވެ. އެހެން ނަމަވެސް އެކަން ކުރެވޭނީ އެއާޕޯޓަށް ބޭނުންވާ އިތުރު ގިނަ މަސައްކަތްތަކެއް ކުރެވިގެން ކަމުގައި ޝަރީފު ވިދާޅުވިއެވެ.

ޝަރީފް އެފަދައިން ވިދާޅުވި އިރު، މިހާރު ގެނައި ބަދަލާއެކު ވެސް، އެރައިވަލް ފަސެންޖަރުންނަށް ޓެކްސީ އަދި ލިބޭނީ ބައިނަލްއަގުވާމީ ގިމަތައިގެ ކުރިމަތިންނެވެ. އެހެން ނަމަވެސް، އެތެރޭގެ އުދުހުމުގެ ގިމަތައިން ފުރަން އަންނަ މީހުންގެ ކާރުތައް މީގެ ފަހުން މަޑުކުރާނީ އެތެރޭގެ އުދުހުމުގެ ގިމަތައިގެ ކައިރީގައެވެ.

އެފަދަ ކާރުތައް އެތެރޭގެ އުދުހުމުގެ ގިމަތައިގެ އުތުރަށް ގޮސް، އެނބުރި އައިސް މަޑުކުރާނީ އެ ގިމަތައިގެ އިރުމަތީ ފަރާތުގައެވެ. އެ ފަރާތުގައި އެއްފަހަރާ ޖުމްލަ ތިން ކާރެއް އެއްފަހަރާ މަޑު ކުރެވޭއިރު މަޑުކުރަން ވަކި ވަގުތެއް ލިބޭނެއެވެ.

އެ ސަރަހައްދުގެ ޓްރެފިކް އަދި ކާރުތަކުގެ މޫވްމެންޓް މޮނިޓާ ކުރުމަށް އެމްއޭސީއެލްގެ މުވައްޒަފުން އަދި ފުލުހުން އަބަދުވެސް ތިބޭއިރު، އެ ސަރައްހައްދަށް އާންމުން ބޭލުމަށް ފަހު ކާރަކަށް މަޑެއް ނުކުރެވޭނެއެވެ. އެހެން ކަމުން އެ ސަރަހައްދުގެ ޓްރެފިކް ކޮންޓްރޯލް ކުރެވޭނެ ކަމުގެ ޔަގީންކަން އެމްއޭސީއެލް އިން ދެއެވެ.