އައްޑޫ އާންމު ހާލަތާ ދިމާލަށް: އައު ކޭސްއެއް ނުފެންނަތާ ދެ ދުވަސް!
އައްޑޫއިން ކޮވިޑްގެ ކޭސްއެއް އެންމެ ފަހުން ފެނިފައިވަނީ ފެބްރުއަރީ 28ގައި
އައްޑޫ ސިޓީ
އައްޑޫ ސިޓީގައި ކޮވިޑްގެ ކޭސްތައް ކޮންޓްރޯލްކޮށް އައު ކޭސްއެއް ނުފެންނަތާ ދެ ދުވަސް ވެފައިވާކަމަށް އައްޑޫ އިމަޖެންސީ އޮޕަރޭޝަން ސެންޓަރުން ހާމަކޮށްފިއެވެ.
އައްޑޫގައި ކޮވިޑްގެ އައު ކޭސްއެއް އެންމެ ފަހުން ފެނިފައިވަނީ ފެބްރުއަރީ 28 ވަނަ ދުވަހު އައްޑޫ ސިޓީ މަރަދޫއިންނެވެ. އޭރު ޕޮޒިޓިވް ވެފައިވަނީ އައްޑޫ ސިޓީ މަރަދޫއިން ބަލީގެ އަލާމާތްތައް ހުރެގެން ފްލޫ ކްލިނިކަށް ދެއްކި ދެ މީހެއްކަމަށް އައްޑޫ އިމަޖެންސީ އޮޕަރޭޝަން ސެންޓަރުން މަޢުލޫމާތު ދެއެވެ. މިއާއެކު އައްޑޫއިން ޕޮޒިޓިވްވެފައިވާ މީހުންގެ ޖުމުލަ ވަނީ 91 އަރާފައެވެ. ފެބްރުއަރީ 28ށް ފަހު މާރޗް 1ވަނަ ދުވަހު ނެގި 63 ސާމްޕަލްއާއި މާރޗް 2 ވަނަ ދުވަހު ނެގި 355 ސާމްޕަލްއިން ވެސް އިތުރު އެއްވެސް މީހަކު ބަޔަށް ޕޮޒިޓިވްވެފައިނުވާކަމަށް އޭއީއޯސީއިން މަޢުލޫމާތުދެއެވެ.
ތަފާސްހިސާބުތަކަށް ބަލާއިރު ޕޮޒިޓިވް ވެފައިވާ 91 މީހުންގެ ތެރޭގައި ހިމެނެނީ، ހިތަދޫއިން 22 މީހުން، މީދޫއިން 13 މީހުން، މަރަދޫ-ފޭދޫއިން 4 މީހުން، ފޭދޫއިން 17 މީހުން އަދި އެމްޓީސީސީން މަސައްކަތް ކުރާ ސައިޓުން 35 މީހުންނެވެ.
އައްޑޫ އެމެޖެންސީ އޮޕަރޭޝަން ސެންޓަރުން ބުނީ 4 މީހަކަށް ހޮސްޕިޓަލުގައި އެޑްމިޓްކޮށްގެން ފަރުވާ ދެމުންދާ ކަމަށާއި، 58 މީހުން ބަލިން ރަނގަޅުވެފައިވާ ކަމަށެވެ.
33 އެކްޓިވް ކޭސް ހިމެނޭއިރު، މިހާތަނަށް 3629 ރެމްޑަމް ސާމްޕަލް ނަގާފައިވެއެވެ. އަދި 206 ގެއެއްވަނީ ކަރަންޓީންއަށް ލާފައެވެ.
އައްޑޫ ސިޓީން ކޮވިޑް-19ގެ ކޭސްތައް ފެނުމާ ގުޅިގެން ޚާއްސަ ފިޔަވަޅުތަކެއް ވަނީ އަޅާފައިވެއެވެ. ބަލިން ރައްކާތެރިވުމަށް އަޅާފައިވާ ފިޔަވަޅުތަކަށް ގިނަ ރައްޔިތުން ސަމާލުކަން ދޭ ކަމަށް ވެސް އައްޑޫ ސިޓީ ކައުންސިލުން މައުލޫމާތުދެއެވެ.
އައްޑޫ ސިޓީން ދެ ކްލަސްޓަރއެއް ފެނިފައިވެއެވެ. އެއީ ޕްރޮޖެކްޓް ސައިޓަކުން ފެނުނު ކްލަސްޓަރއަކާއި، އޭވިއޭޝަން ކްލަސްޓަރއެކެވެ. ޕްރޮޖެކްޓް ސައިޓް ކްލަސްޓަރއާ ގުޅިގެން ހުޅުދޫމީދޫން ނެގި ހުރިހާ ސާމްޕަލެއް ވަނީ ނެގެޓިވްވެފައެވެ. އެކްލަސްޓަރ ކޮންޓެއިންވެފައިވީ ނަމަވެސް އޭވިއޭޝަން ކްލަސްޓަރ އޮތީ އެކްޓިވްކޮށެވެ.
