އިބްރަހިމޮވިޗަށް ޔުނައިޓެޑާ ދެކޮޅަށް ނުކުޅެވޭނެ

އޭސީ މިލާނަށް ކުޅެމުން އަންނަ ތަޖުރިބާކާރު ފޯވާޑް ޒްލަޓާން އިބްރަހިމޮވިޗަށް ދާދި ފަހުން ލިބުނު އަނިޔާގެ ސަބަބުން، ޔުއެފާ ޔޫރޮޕާ ލީގުގެ ގަދަ 16 ގައި މެންޗެސްޓާ ޔުނައިޓެޑާ ދެކޮޅަށް ކުޅޭ މެޗުގައި އޭނާއަށް ނުކުޅެވޭނެ ކަމަށް ރިޕޯޓުތައް ބުނެފިއެވެ.

ޔޫރޮޕާ ލީގުގެ ގަދަ 16 ގެ ފުރަތަމަ ލެގުގައި ޔުނައިޓެޑާއި މިލާން ބައްދަލުކުރާ މެޗު ކުޅުމަށް ތާވަލުކޮށްފައިވަނީ މި މަހުގެ 11 ވަނަ ދުވަހު ޔުނައިޓެޑުގެ ދަނޑުގައެވެ. އަދި ދެވަނަ ލެގުގެ މެޗު ކުޅޭނީ މި މަހުގެ 18 ވަނަ ދުވަހު މިލާނުގެ ދަނޑުގައެވެ.

އެ މެޗުގެ ކުރިން އިޓާލިއަން ލީގުގައި އާދީއްތަ ދުވަހުގެރޭ ރޯމާ އަތުން 2-1 ގެ ނަތީޖާއަކުން މިލާން މޮޅުވި މެޗުގައި އިބްރަހިމޮވިޗަށް ވަނީ އަނިޔާވެފައެވެ. އެގޮތުން ފައިގެ ފަލަމަސްގަނޑަށް ލިބުނު އަނިޔާއަކާ ގުޅިގެން އެ މެޗުގެ 56 ވަނަ މިނެޓުގައި އިބްރަހިމޮވިޗް ވަނީ ބަދަލުކޮށްފައެވެ. ރިޕޯޓުތައް ބުނާ ގޮތުން އެ އަނިޔާއާ ގުޅިގެން މަދުވެގެން ތިން ހަފުތާ ވަންދެން އިބްރަހިމޮވިޗް ކުޅުމާ ދުރުގައި ހުންނަން ޖެހޭނެއެވެ. އެހެންކަމުން ޔޫރޮޕާ ލީގުގެ ގަދަ 16 ގެ ދެ ލެގުގައިވެސް އިބްރަހިމޮވިޗަށް ނުކުޅެވޭނެ ކަމަށް ރިޕޯޓުތައް ވަނީ ބުނެފައެވެ.

ޔުނައިޓެޑާ ދެކޮޅަށް އިބްރަހިމޮވިޗަށް ނުކުޅެވޭނެ ކަމަށް ރިޕޯޓުތައް ބުނިއިރު، ޔުނައިޓެޑާ ދެކޮޅަށް ކުޅޭ މެޗު ހާއްސަވާ އެއް ކުޅުންތެރިއަކީވެސް އިބްރަހިމޮވިޗެވެ. އެގޮތުން ޔުނައިޓެޑުން 2017 ވަނަ އަހަރު ޔޫރޮޕާ ލީގުގެ ޗެމްޕިއަންކަން ހޯދިއިރު، އިބްރަހިމޮވިޗް ވަނީ އެ ޓީމަށް ކުޅެފައެވެ.

މި ފަހަރުގެ މުބާރާތުގައި ޔުނައިޓެޑާއި މިލާން ބައްދަލުކުރާއިރު، މިއީ ޔޫރޮޕާ ލީގުގައި މި ދެ ޓީމު ބައްދަލުކުރާ ފުރަތަމަ ފަހަރެވެ. މީގެ ކުރިން މި ދެ ޓީމުގެ ދެމެދު ޔޫރަޕުގެ މުބާރާތްތަކުގައި ޖުމްލަ 10 މެޗު ކުޅެފައިވާއިރު، ޔޫރަޕިއަން ކަޕުގައި ޔުނައިޓެޑާއި މިލާން ވަނީ ހަތަރު ފަހަރު ބައްދަލުކޮށްފައެވެ. އަދި އޭގެ ފަހުން ޔުއެފާ ޗެމްޕިއަންސް ލީގުގައި ހަ ފަހަރެއްގެ މަތިން މި ދެ ޓީމު ބައްދަލުކޮށްފައިވެއެވެ.

ޔުނައިޓެޑާއި މިލާނުގެ ކުރިމަތިލުންތަކުގެ ނަތީޖާއަށް ބަލާއިރު، މިލާން ފަސް މެޗުން މޮޅުވެފައިވާއިރު، ޔުނައިޓެޑުވެސް ވަނީ ފަސް މެޗުން މޮޅުވެފައެވެ. އަދި އެންމެ ފަހުން ޔޫރަޕުގެ މުބާރާތެއްގައި މި ދެ ޓީމު ބައްދަލުކޮށްފައިވަނީ 2009-10 ވަނަ އަހަރުގެ ސީޒަނުގެ ޗެމްޕިއަންސް ލީގުގެ ގަދަ 16 ގައެވެ. އެ ފަހަރު ކުޅުނު ދެ މެޗުންވެސް ޔުނައިޓެޑް ވަނީ މޮޅުވެފައެވެ. އަދި އޭގެ ފަހުން 2019 ވަނަ އަހަރު އޮތް އިންޓަނޭޝަނަލް ޗެމްޕިއަންސް ކަޕުގައިވެސް ޔުނައިޓެޑާއި މިލާން ވަނީ ބައްދަލުކޮށްފައެވެ.