އަލީ ވަޙީދުގެ ޕާސްޕޯޓް ދޫކުރުމާ ގުޅިގެން ހައިކޯޓަށް ހުށައެޅި މައްސަލަ ބޭރުކޮށްލައިފި، ދައުލަތުގެ މިސްރާބު ސުޕްރީމް ކޯޓަށް!
28 ފެބުރުއަރީ 2021 | އާދީއްތަ 11:54ހައިކޯޓުން މި މައްސަލަ ބޭރު ކޮށްލާފައިވަނީ އާދިއްތަ ދުވަހު
ޕްރޮސެކިއުޓަރ ޖެނެރަލް ހުސައިން ޝަމީމް - ޕީޖީ ވަނީ މި މައްސަލައިގެ ކަން ހިނގާ ދިޔަ ގޮތުގެ ތަފްސީލު މަޖިލީހާވެސް ހިއްސާ ކުރައްވާފައި
ކުރީގެ ޓޫރިޒަމް މިނިސްޓަރ ޢަލީ ވަޙީދުގެ ޕާސްޕޯޓް ދޫކުރުމަށް ކްރިމިނަލް ކޯޓުން އަމުރު ނެރުމާއި ގުޅިގެން ހައިކޯޓުގައި އިސްތިއުނާފު ކުރަން ހުށައެޅި މައްސަލަ ބޭރުކޮށްލައިފިއެވެ.
މި މައްސަލަ ޕްރޮސެކިއުޓަރ ޖެނެރަލް (ޕީޖީ) އޮފީހުން ހައިކޯޓުގައި އިސްތިއުނާފް ކޮށްފައިވަނީ ފެބްރުއަރީ މަހުގެ 14 ވަނަ ދުވަހުއެވެ. ނަމަވެސް މި މައްސަލަ ހައިކޯޓުން ބޭރު ކޮށްލާފައިވަނީ އަމުރު ދޫކުރި ކަމަށް މައުލޫމާތު ލިބުނު ވަގުތަށްވުރެ 48 ގަޑިއިރު ފަހުން ހުށައަޅާފައިވާތީ ކަމަށް ހައިކޯޓުން މައުލޫމާތު ދެއެވެ. އެގޮތުން ރަޖިސްޓްރާ ނިންމުން ނިންމާތާ 7 ދުވަސް ތެރޭގައި އިސްތިއުނާފް ކުރުމުގެ ފުރުސަތު އޮންނާނެކަންވެސް ހައިކޯޓުން ފާހަގަ ކޮށްފައިވެއެވެ. ހައިކޯޓުން މި މައްސަލަ ބޭރު ކޮށްލާފައިވަނީ އާދިއްތަ ދުވަހުއެވެ.
އަލީ ވަޙީދު ފުރާފައިވާއިރު، ޕާސްޕޯޓު ދޫކޮށްލުމަށް އަމުރު ނެރުނު އަޑުއެހުން ބާއްވާފައިވަނީ 9 ފެބްރުއަރީގައެވެ. އެހެންނަމަވެސް، އަމުރު ނެރުނު ތާރިޚެއްކަމަށް ޕީޖީ އޮފީހަށް ލިބުނު ލިއެކިއުންތަކުގައި އޮތީ 10 ފެބްރުއަރީއެވެ. އަދި އަލީ ވަޙީދުގެ ޕާސްޕޯޓު ދޫކޮށްލުމުގެ އަމުރު ޕީޖީ އޮފީހަށް ލިބިފައިވަނީ 11 ފެބްރުއަރީގައިކަމަށް ޕްރޮސެކިއުޓަރ ޖެނެރަލް ހުސައިން ޝަމީމް ވިދާޅުވެފައިވެއެވެ.
ޢަލީ ވަޙީދުގެ ޕާސްޕޯޓު ދޫކުރުމަށް ކްރިމިނަލް ކޯޓުން ނިންމި ލިޔުމާއި، ޖާމިނުކުރުވި ލިޔުން ހޯދުމަށް ތަކުރާރުކޮށް ކުރި މަސައްކަތުން ކޯޓުން ދައުލަތާ އެލިޔުންތައް ހަވާލުކޮށްފައި ނުވާކަން ޕީޖީ އޮފީހުން މީގެ ކުރިން ނެރުނު ބަޔާނެއްގައި ފާހަގަކޮށްފައިވެއެވެ. މި މައްސަލައިގައި ކްރިމިނަލް ކޯޓުން ކަންކޮށްފައިވާ ގޮތާއި ގުޅޭގޮތުން ގިނަ ބަޔަކު ދަނީ ސުވާލުވެސް އުފައްދަމުންނެވެ. އެގޮތުން ފުރަތަމަ އަމުރު ނެރުނުއިރު، ދައުލަތުން އެދިގެން ނެރުނު އަމުރެއްކަން ބަޔާން ކޮށްފައިވީ ނަމަވެސް، ފަހުން އެއީ "އިދާރީ އޮޅުމެއްގެ ތެރެއިން" ވީ ކަމެއްކަން ބަޔާން ކޮށްފައިވުމާއެކު، އެކަމަށްވެސް ގިނަ ބަޔަކު ފާޑުކިޔާފައިވެއެވެ.
އެކަމާ ގުޅޭގޮތުން ރާއްޖެއެމްވީން ސުވާލު ކޮށްލުމުން ޕީޖީ އޮފީހުގެ އޮފިޝަލަކު ވިދާޅުވީ، ހައިކޯޓުގެ މި ނިންމުން ސުޕްރީމް ކޯޓުގައި އިސްތިއުނާފް ކުރައްވާނެ ކަމަށެވެ.
އަލީ ވަޙީދު ރާއްޖެއިން ބޭރަށް ފުރާފައިވާއިރު، ޢަލީ ވަޙީދު ޖާމިނުކުރުވީ، އޭނާގެ ގާތް އެކުވެރިއެއް ކަމަށްވާ، ޔޫތު އެންޑް ސްޕޯޓްސް މިނިސްޓްރީގެ ސްޓޭޓް މިނިސްޓަރު އަސްއަދު އަލީ (އަޑުބަރޭ) އެވެ. އެކަމާ ގުޅޭގޮތުން މަޖިލީހުގެ ޖުޑީޝަރީ ކޮމިޓީއަށް ވަޑައިގެން މީގެ ކުރިން ހިއްސާ ކުރެއްވި މައުލޫމާތު ތަކުގެ ތެރޭގައި ޕީޖީ ވަނީ ބޭސްފަރުވާއަށް ބަންދުން ދޫކޮށްލާފައި ހުންނަ މީހަކަށް ޖާމިނުވުމަކީ ޤާނޫނު ދަންނަ އުސޫލެއް ނޫން ކަމަށް ވިދާޅުވެފައެވެ. އެފަދަ ޙާލަތްތަކުގައި ޖާމިނުވެގެން މީހުން ފޮނުވުމަކީ ޤާނޫނުގައި ލިޔެފައި އޮތް އުސޫލެއްވެސް ނޫންކަމަށް ޝަމީމް ވިދާޅުވިއެވެ.
ޝަމީމް ވިދާޅުވީ، މި މައްސަލައިގެ ލިއެކިއުންތަަކަށް ބެލިއިރު، މައްސަލައިގެ ޖާމިނުވި މީހާ އެކަމަށް އެދި ހުށައަޅާފައިވަނީ ޖިނާއީ އިޖުރާއަތުގެ ޤާނޫނުގެ 64 ވަނަ މާއްދާއާ ޙަވާލާދީ ކަމަށެވެ. އަދި ކްރިމިނަލް ކޯޓުން އޭނާ ޖާމިނު ކުރުވާފައިވަނީ އެ މާއްދާގެ ޝަރުތުތައް ހަމަވާތީ ކަމަށް ވީނަމަވެސް، އެ މާއްދާއަކީ ބަންދުގައި ހުރި މީހަކު ޖާމިނު ކުރުވުމާ ގުޅޭ މާއްދާއެއްކަން ޝަމީމް ފާހަގަ ކުރެއްވިއެވެ.
