ކ. މާލެ
|
28 ފެބްރުއަރީ 2021 | އާދީއްތަ 15:27
އާދީއްތަ ދުވަހުގެ ހެނދުނު ޓީސީ ސްޕޯޓްސް ކުލަބުން ކުރިއަށްގެންދިޔަ ފަރިތަކުރުންތަކުގެ ތެރެއިން
އާދީއްތަ ދުވަހުގެ ހެނދުނު ޓީސީ ސްޕޯޓްސް ކުލަބުން ކުރިއަށްގެންދިޔަ ފަރިތަކުރުންތަކުގެ ތެރެއިން
އެފްއޭއެމް
ކުލަބުތަކުން ފަރިތަކުރުންތައް ފެށުން
އައު އުސޫލުތަކުގެ ދަށުން ކުލަބުތަކުން ފަރިތަކުރުންތައް ފަށައިފި
 
ފަރިތަކުރުންތައް ފެށުމުގެ ހުއްދަ އެޗްޕީއޭއިން ވަނީ ދީފައި
 
އާދީއްތަ ދުވަހުގެ ހެނދުނު ކުލަބުތަކުން ވަނީ ފަރިތަކޮށްފައި
 
ފަރިތަކުރާއިރު ހާފަކު ތިބެވޭނީ 10 ކުޅުންތެރިންނަށް

ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އާއި ހެލްތު ޕްރޮޓެކްޝަން އޭޖެންސީ (އެޗްޕީއޭ) ގުޅިގެން ދާދި ފަހުން އެކުލަވާލި އައު އުސޫލުތަކުގެ ދަށުން ފުރަތަމަ ޑިވިޝަނުގެ ކުލަބުތަކުން ފަރިތަކުރުންތައް ފަށައިފިއެވެ.

އާދީއްތަ ދުވަހު ކުލަބުތަކުން ފަރިތަކުރުންތައް ފެށީ، މިދިޔަ ބުރާސްފަތި ދުވަހު ފަރިތަކުރުންތައް ކުރިއަށްގެންދިޔުމުގެ ހުއްދަ އެޗްޕީއޭއިން ދިނުމުންނެވެ. އެ ދުވަހު އެފްއޭއެމުގެ ރައީސް ބައްސާމް އަދީލް ޖަލީލަށް އެޑްރެސްކޮށް، ޑިރެކްޓަރު ޖެނެރަލް އޮފް ޕަބްލިކް ހެލްތު މައިމޫނާ އަބޫބަކުރު ސޮއިކުރައްވައި ފޮނުއްވި ސިޓީގައިވާ ގޮތުން ފަރިތަކުރުންތައް ފެށުމުގެ ހުއްދަދިން ނަމަވެސް، ކޮވިޑް-19 ގެ ކޭސްތައް މާލެ ސަރަހައްދުގައި އިތުރުވަމުން އަންނާތީ، ކުޅުންތެރިންނާއި އޮފިޝަލުން ކޮވިޑް ކޮންޓްރޯލް ކުރުމަށް އަޅާފައިވާ ފިޔަވަޅުތަކާ އެއްގޮތަށް އަމަލުތައް ބެހެއްޓުމަށް ވަނީ އަންގާފައެވެ. އަދި މި ދަނޑިވަޅުގައި ފަރިތަކުރުންތައް ފެށުން އިތުރު ދެ ހަފުތާއަށް ފަސްކުރުމަށްވެސް ވަނީ އެދިފައެވެ.

އެކަމަކު ކުލަބުތަކާ މަޝްވަރާކުރުމަށްފަހު އެފްއޭއެމުން ވަނީ އާދީއްތަ ދުވަހުން ފެށިގެން ފަރިތަކުރުންތައް ކުރިއަށްގެންދެވޭނެ ކަމަށް ނިންމާފައެވެ. އެއާއެކު އާދީއްތަ ދުވަހުގެ ހެނދުނު ޓާފް ދަނޑުގައި ފުރަތަމަ ޑިވިޝަނުގެ ކުލަބުތަކުން ވަނީ ފަރިތަކުރުންތައް ފަށާފައެވެ.

"ރާއްޖެ.އެމްވީ" އަށް މައުލޫމާތުދެއްވަމުން އެފްއޭއެމުގެ ޖެނެރަލް ސެކްރެޓަރީ ހުސެއިން ޖަވާޒް (ޖަވާ) ވިދާޅުވީ އަންނަ އޭޕްރީލް މަހު އޭއެފްސީ ކަޕުގެ ކޮލިފިކޭޝަން ފެށުމަށް ތާވަލުކޮށްފައި އޮތުމުން، ފަރިތަކުރުންތައް ކުރިއަށްގެން ހުއްދަދިނުމަށް އެންމެ ފުރަތަމަ މަޝްވަރާކުރީ އެ މުބާރާތުގައި ވާދަކުރާ ކުލަބުތަކަށް އެކަނި ކަމަށާއި، އެކަމަކު އެއީ އެންމެ އިންސާފުވެރި ގޮތް ނޫން ކަމަށެވެ. އަދި ފުރަތަމަ ޑިވިޝަނުގެ ހުރިހާ ކުލަބުތަކަށް ފަރިތަކުރުންތައް ކުރިއަށްގެންދިޔުމުގެ ހުއްދަދިނީ، ކުރެވުނު މަޝްވަރާތަކަށްފަހު ކިތަންމެ ހަރުކަށި އުސޫލުތަކެއް ދަށުން ވިޔަސް އަވަހަށް ފަރިތަކުރުންތައް ފެށުމަށް ކުލަބުތަކުން ބޭނުންވުން ކަމަށްވެސް ވިދާޅުވިއެވެ.

އައު އުސޫލުތަކުގެ ދަށުން ކުލަބުތަކުން ފަރިތަކުރުންތައް ފެށިއިރު، އެ އުސޫލުތަކުގައިވާ ގޮތުން ފަހަރަކު ދަނޑެއްގައި ފަރިތަކުރެވޭނީ ޓީމަކަށެވެ. އަދި އައު އުސޫލުގެ ދަށުން ޖުމްލަ 20 ކުޅުންތެރިންނާއެކު ފަރިތަކުރުންތައް ކުރިއަށްގެންދަން ފުރުސަތު ދިނީ ހާފެއްގައި 10 ކުޅުންތެރިން ތިބެވޭ ގޮތަށެވެ.

މެދުކެނޑުމަކަށްފަހު ފުރަތަމަ ޑިވިޝަނުގެ ކުލަބުތަކުން ފަރިތަކުރުންތައް ފެށި ނަމަވެސް، ދިރާގު ދިވެހި ޕްރިމިއާ ލީގު އަލުން ފެށުމުގެ ހުއްދަ މިހާތަނަށް ދީފައެއް ނުވެއެވެ. މީގެ ކުރިން ލީގު މެދުކަނޑާލަން ނިންމީ ކޮވިޑުގެ ކޭސްތައް މާލެ ސިޓީގައި އިތުރުވުމާއެކު އެޗްޕީއޭއިން ނެރުނު އައު އުސޫލުތަކާ ގުޅިގެން މި މަހުގެ ތިންވަނަ ދުވަހުއެވެ. އަދި އޭގެ ފަހުން ލީގުގައި ކުޅެމުން އަންނަ ހުރިހާ ކުޅުންތެރިންނާއި އޮފިޝަލުން މިހާރު ވަނީ ވެކްސިންގެ ފުރަތަމަ ޑޯޒް ޖަހާފައެވެ.

ދެވަނަ ބުރުގެ މެދުތެރެއިން ދިވެހި ޕްރިމިއާ ލީގުގެ ކުޅުން ވަގުތީ ގޮތުން މެދުކަނޑާލިއިރު، މި ސީޒަން ފެށުމަށް އެންމެ ފުރަތަމަ ކުލަބުތަކުން އޮކްޓޯބަރު މަހު ފަރިތަކުރުންތައް ފެށީވެސް އެފްއޭއެމާއި އެޗްޕީއޭ ގުޅިގެން އެކުލަވާލި ހާއްސަ އުސޫލުތަކެއްގެ ދަށުންނެވެ. އަދި އޭގެ ފަހުން އެޗްޕީއޭގެ ހާއްސަ ހުއްދައެއްގެ ދަށުން މި ސީޒަން ފަށާފައިވަނީ މިދިޔަ އަހަރުގެ ޑިސެމްބަރު މަހުގެ އަށްވަނަ ދުވަހުއެވެ. އެގޮތުން ޗެރިޓީ ޝީލްޑް މެޗުން ސީޒަން ފެށިއިރު، ދިވެހި ޕްރިމިއާ ލީގުގެ ކުޅުން ފަށާފައިވަނީ އެ މަހުގެ 13 ވަނަ ދުވަހުއެވެ. އަދި ދެވަނަ ބުރުގެ މެދުތެރެއިން ލީގު މެދުކަނޑާލިއިރު، މިހާތަނަށް ލީގުގައި ވަނީ ޖުމްލަ 34 މެޗު ކުޅެފައެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: ހުސައިން ފަރިޔާޒް
0%
0%
0%
0%
0%
0%
ކޮމެންޓް