ދެވަނަފަހަރަށް ވެސް ތަބަކަކަށް ލާފަ ދީފިނަމަ ވެރިކަން ކުރުމަށް ތައްޔާރު : ކުރީގެ ރައީސް ވަޙީދު
28 ފެބުރުއަރީ 2021 | އާދީއްތަ 07:46ކުރީގެ ރައީސް ވަހީދު ވަނީ 2013 ވަނަ އަހަރުގެ ރިޔާސީ އިންތިޚާބުން އެންމެ ފަސް އިންސައްތަ ވޯޓު ލިބިވަޑައިގަތުމަކީ ސިޔާސީ ޙަޔާތުގެ އެންމެ ބޮޑު ނާކާމިޔާބީކަމަށް އިއުތިރާފުވެވަޑައިގެންފައި
ކުރީގެ ރައީސް ވަހީދު 1000 ރުފިޔާއިން ޖޫރިމަނާ ކުރުން
ވެރިކަން ތަބަކަކަށް ލާފަ ދީފިނަމަ އަނެއްކާވެސް އެކަން ކުރެއްވުމަށް ތައްޔާރަށް ހުންނެވިކަމަށް ކުރީގެ ރައީސް ޑރ. މުހައްމަދު ވަހީދު ވިދާޅުވެއްޖެއެވެ.
ދިވެހި ރާއްޖޭގެ އަޑުން ގެނެސްދޭ އަހާށޭ ބުނާނަން ޕްރޮގްރާމްގައި ވާހަކަފުޅުދައްކަވަމުން، ރާއްޖޭގައި އެންމެ ކުރުމުއްދަކަށް ވެރިކަން ކުރެއްވި އަދި އިންތިޚާބެއްގައި އެންމެ މަދުން ވޯޓު ލިބިވަޑައިގެންނެވި ރައީސް ކަމުގައިވާ ކުރީގެ ރައީސް ޑރ. މުހައްމަދު ވަހީދު ވަނީ މިހާރު އިދިކޮޅުގައި އޮތް ޕީޕީއެމް/ ޕީއެންސީގައި ސަރުކާރު ހިންގުމުގެ އެއްވެސް ސިޔާސަތެއް ނެތްކަމަށް ވިދާޅުވެފައެވެ. 2013 ވަނަ އަހަރުގެ ރިޔާސީ އިންތިޚާބުން އެންމެ ފަސް އިންސައްތަ ވޯޓު ލިބިވަޑައިގަތުމަކީ ސިޔާސީ ޙަޔާތުގެ އެންމެ ބޮޑު ނާކާމިޔާބީކަމަށް އިއުތިރާފުވެވަޑައިގަންނަވަމުން ކުރީގެ ރައީސް މުހައްމަދު ވަހީދު ވަނީ އެ އިންތިޚާބުގައި ކުރިމަތިލައްވަން ޖެހުނު ނާކާމިޔާބީއަށްފަހު ސިޔާސީ ކަންކަމުން ދުރަށް ޖެހިވަޑައިގެންނެވުމަށް ނިންމެވިކަމަށެވެ. އެހެންނަމަވެސް، މި ނިންމުން ބަދަލުކުރައްވަން ޖެހުނީ ގިނަ ދުވަސްތަކެއް ވަންދެން ޤައުމުން ބޭރުގައި އުޅުއްވުމަށްފަހު ކޮވިޑްގައި ރާއްޖެ ލޮކްޑައުންވެ، އެ މަނިކުފާނު އެ ޕާޓީއަކަށް ވޭތުވެ ދިޔަ 7 އަހަރު ދުވަހު ނިސްބަތްވެވަޑައިގަންނަވާ ޕްރޮގްރެސިވް ޕާޓީ އިފް މޯލްޑިވްސް، ޕީޕީއެމުން މިވަގުތު އޮތް ހާލަތުން އަރައިގަތުމަށް އައިސް އެހީއަށް އެދުމުން ކަމަށް ކުރީގެ ރައީސް ޑރ. މުހައްމަދު ވަހީދު ވިދާޅުވިއެވެ.
މި ޕްރޮގްރާމްގައި ވާހަކަދައްކަވަމުން ކުރީގެ ރައީސް ޑރ. މުހައްމަދު ވަހީދު ވަނީ 2013 އިންތިޚާބު ލަސްވެ ދައުރު ހަމަވުމަށްފަހުވެސް ސުޕްރީމް ކޯޓުގެ ބާރުގައި ރައީސްކަމުގެ މަޤާމު ދިގުދައްމާލެއްވީ، އިންތިޚާބުގެ ކަންކަން އަވަސްކޮށް ރާއްޖޭގެ ސިޔާސީ މަސްރަޙުގެ މައްސަލަތައް ހައްލުކުރެއްވުމަކަމަށް ރައީސް ޑރ. ވަހީދު ވަކާލާތުކުރެއްވިއެވެ. ކިތަންމެ ކުޑަ ދުވަސްކޮޅަކަށް އެންމެ ދެ އަހަރު ދުވަހަށް ވެސް ރާއްޖޭގެ އެންމެ އިސްވެރިޔާގެ މަޤާމު އަދާކުރެއްވުމުގެ ޝަރަފު ލިބިފައިވުމުން، ދެން އެއްވެސް ރިޔާސީ އިންތިޚާބެއްގައި ވެސް، އަދި ރައްޔިތުންގެ މަޖިލީހުގެ އިންތިޚާބެއްގައި ވެސް އަމިއްލައިން ވާދަކުރެއްވުމަށް ޝަޢުޤުވެރިވެ ނުލައްވާކަމަށް ރައީސް ޑރ. މުހައްމަދު ވަހީދު ވިދާޅުވިއެވެ. މިވަގުތު ޕީޕީއެމްގެ އެޑްވައިޒަރެއްގެ ގޮތުގައި ހުންނެވި ޑރ. މުހައްމަދު ވަހީދު ވަނީ އިދިކޮޅުން އަދިވެސް އުންމީދުކުރަނީ ކުރީގެ ރައީސް އަބްދުﷲ ޔާމީން ޖަލުން މިނިވަންވެވަޑައިގެން 2023ގެ ރިޔާސީ އިންތިޚާބުގައި ވާދަކުރެއްވާނެކަމެއްކަމަށް ވިދާޅުވިއެވެ. އެހެންނަމަވެސް، މިހާރު ކަންކަން ފެންނަ ގޮތުން މިއީ ނުވުން ގާތްކަމެއްކަމަށް ދެކިވަޑައިގަންނަވާކަމަށް ވިދާޅުވެ، މި އިންތިޚާބުގައި އިދިކޮޅުން ކެންޑިޑޭޓަކު ނެރޭނީ ޕްރައިމަރީއަކުންކަމަށް ރައީސް ޑރ. ވަހީދު ވިދާޅުވިއެވެ. މި ޕްރައިމަރީގައި ވެސް އަމިއްލަފުޅަށް ބައިވެރިވެޑައިގަތުމަށް ޝައުޤުވެރިވެނުލައްވާކަމަށް ވިދާޅުވަމުން ކުރީގެ ރައީސް ޑރ. މުހައްމަދު ވަހީދު ވަނީ، ޤައުމުގެ ހައްޤުގެ ނަމުގައި ވެރިކަން ތަބަކަކަށް ލާފަ ދީފިނަމަ އަނެއްކާވެސް އެކަން ކުރެއްވުމަށް ތައްޔާރަށް ހުންނެވިކަމަށް ވިދާޅުވެފައެވެ.
އިދިކޮޅު ޕީޕީއެމް/ޕީއެންސީގައި ރަނގަޅުކުރަން ހުރިކަންކަމަކީ ކޮބާތޯ ސުވާލުކުރެއްވުމުން ކުރީގެ ރައީސް ޑރ. މުހައްމަދު ވަހީދު ވަނީ، ބޯމަތިވެފައިވާ ލޯކަލް ކައިންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގެ ކަންކަން ހިންގުމާއި އަދި ސަރުކާރު ހިންގުމަށް ސިޔާސީ ޕާޓީއެއްގައި ގެންގުޅެންޖެހޭ ވިސްނުންތައް އިދިކޮޅުގައި މިވަގުތު ނެތްކަމަށް ވިދާޅުވެފައެވެ. މި ވިސްނުންތަކުގެ މައްޗަށް އިތުރަށް ވިސްނާ ސަރުކާރު ހިންގުމުގެ ޕޮލިސީތަކެއް އިދިކޮޅުން އެކުލަވާލަން ޖެހިފައިވާކަމަށް ރައީސް ޑރ. ވަހީދު ވިދާޅުވިއެވެ. މިފަދަ ދޯހަޅި ސިޔާސަތުތަކެއް އޮތަސް ލޯކަލް ކައިންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގައި އިދިކޮޅަށް ބޮޑު ކާމިޔާބީއެއް ލިބޭނެކަމަށް އެމަނިކުފާނު ވިދާޅުވިއެވެ.
