ހުޅުމާލެ ޑިޓެންޝަން ސެންޓަރުން ފިލި ބިދޭސީ މީހާ ފެނިއްޖެ
28 ފެބުރުއަރީ 2021 | އާދީއްތަ 01:47އެމީހާ ފިލީ މި މަހު 10ގައި
އަސަނަރ، 32އ
ހުޅުމާލޭ ޑިޓެންޝަން ސެންޓަރުން ފިލި ބިދޭސީ މީހާ ފެނިއްޖެއެވެ.
ހުޅުމާލޭ ޑިޓެންޝަން ސެންޓަރުން ފިލި ބިދޭސީ މީހަކީ އިމިގްރޭޝަން ޤާނޫނާ ޚލާފުވެގެން ރާއްޖެއިން ފުރުވާލެވެންދެން ހުޅުމާލޭ ޑިޓެންޝަން ސެންޓަރުގައި ބަހައްޓާފައި ހުރި 32 އަހަރުގެ އަސަނަރ ކިޔާ ބަނގްލަދޭޝް ރައްޔިތެއް ކަމަށެވެ. އެމީހާ ފިލީ މި މަހުގެ 10 ވަނަ ދުވަހުގެ ރޭ 7:30 ހާއިރު ކަމަށް ކަރެކްޝަންސް އިން ބުނެފައިވެއެވެ. ކަރެކްޝަނުން އޭރު ވަނީ އެމީހާގެ އެއްވެސް މައުލޫމާތެއް އެނގޭ ނަމަ އަންގަން ވެސް އެދިފައެވެ.
ކޮމިޝަނާ އޮފް ޕްރިޒަންސް އަހުމަދު މުހައްމަދު ހޮނިހިރު ދުވަހުގެ ރޭ ކުރި ޓުވީޓެއްގައި ބުނީ އެމީހާ ފެނިފައިވާ ކަމަށާއި، އޭނާ ފެނުނީ އާންމު މީހަކު ކުރި ރިޕޯޓަކާ ގުޅިގެން ފުލުހުންގެ އެހީތެރިކަމާއެކު ކުރި މަސައްކަތުން ކަމަށެވެ. އަދި އޭނާ މިހާރު ކަރެކްޝަންސްގެ ބެލުމުގެ ދަށަށް ގެންގޮސްފައިވާ ކަމަށް ވެސް ބުނެފައިވެއެވެ.
ރާއްޖޭގައި ގަވާއިދާ ޚިލާފަށް އުޅޭ ބިދޭސީންނަށް ރަޖިސްޓްރީވުމުގެ ފުރުސަތު 2019 ވަނަ އަހަރު ތެރޭގައި އިކޮނޮމިކް މިނިސްޓްރީން ހުޅުވާލައި، އެ މަސައްކަތް ކުރިއަށް ގެންގޮސްފައިވާއިރު، 2020 ވަނަ އަހަރުން ފެށިގެން ކޮވިޑް-19ގެ ސަބަބުން ގިނަ ބިދޭސީންތަކެއް ވަނީ އަނބުރާ ގައުމަށް ފޮނުވާލާފައެވެ. އެގޮތުން ގަވާއިދާ ޚިލާފަށް އުޅޭ ގިނަ ބަޔަކު އެ ގައުމެއްގެ ސަރުކާރާ ވެސް ގުޅިގެން އެ ގައުމަކަށް އަނބުރާ ފޮނުވާލާފައިވާއިރު މާލޭގައި ތޮއްޖެހިގެން އުޅޭ އެފަދަ ބިދޭސީން ވެސް ވަނީ ހުޅުމާލެ ދެވަނަ ފިޔަވަހީގައި ހުންނަ އެކި ސެންޓަރުތަކަށް ބަދަލުކޮށްފައެވެ.
