ސޯލަރ ޕީވީ ބެޓަރީ ހައިބްރިޑް ނިޒާމާ ގުޅޭގޮތުން ޢާއްމުންގެ ޚިޔާލު ހޯދަން ހުޅުވާލައިފި
25 ފެބުރުއަރީ 2021 | ބުރާސްފަތި 08:29ސާވޭ ކުރިއަށްގެންދަނީ ލ. އަތޮޅުގެ ރަށްތަކުގައި
ލ.ގަން
މިނިސްޓްރީ އޮފް އެންވަޔަރަންމަންޓް އިން ހިންގާ އެކްސެލަރޭޓިންގ ރިނިއުވަބަލް އެނަރޖީ އިންޓަގްރޭޝަން އެންޑް ސަސްޓެއިނަބަލް އެނަރޖީ "އެރައިސް" މަޝްރޫޢުގެ ދަށުން ލ. އަތޮޅުގެ ރަށްތަކުގައި ގާއިމްކުރާ ސޯލަރ ޕީވީ ބެޓަރީ ހައިބްރިޑް ނިޒާމާ ގުޅޭގޮތުން ޢާއްމުންގެ ޚިޔާލުހޯދުމަށް ހުޅުވާލައިފިއެވެ.
އެންވާރަމަންޓް މިނިސްޓްރީން ނެރުނު ބަޔާނެއްގައި ބުނީ މި ސާރވޭ ކުރިއަށް ދާނީ 25 ފެބްރުއަރީ 2021 އިން ފެށިގެން 07 މާރޗް 2021 ގެ ނިޔަލަށް، ލ. އަތޮޅުގެ 8 ރަށުގައި ކަމަށެވެ. އެގޮތުން ސާވޭ ކުރިއަށް ގެންދަން ހަމަޖައްސާފައި ވަނީ ގަން، އިސްދޫ، ކަލައިދޫ، ހިތަދޫ، ކުނަހަންދޫ، މާބައިދޫ، އަދި މާމެންދޫގެ އިތުރަށް މާވަށުގައެވެ. އަދި އޭގެ އިތުރަށް އެ އަތޮޅު ފޮނަދުއާއި ދަނބިދޫގައި ސޯލަރ ހަކަތައިގެ ނިޒާމު ޤާއިމުކުރަން ހަމަޖެހިފައިވާ ސަރަހައްދުތައް ޔަގީން ވުމުން މި ދެރަށުގައި ވެސް ސާރވޭ ކުރިއަށްގެންދާނެ ކަމަށް މިނިސްޓްރީން ބުނެފައިވެއެވެ.
މިނިސްޓްރީން ބުނީ ވޯލްޑް ބޭންކުގެ އެހީގައި ކުރިއަށް ގެންދާ އެރައިސް މަޝްރޫއުގެ ސާރވޭގެ މައިގަނޑު އެއް ބޭނުމަކީ ލ. އަތޮޅުގެ ރަށްތަކުގައި ގާއިމްކުރާ ސޯލަރ ޕީވީ ބެޓަރީ ހައިބްރިޑް ނިޒާމާއި އަދި އެނިޒާމު ގާއިމުކުރުމަށް ކަނޑައަޅާފައިވާ ސަރަހައްދުތަކާ ބެހޭގޮތުން އެރަށްތަކުގެ ރަށްވެހިން ދެކޭގޮތާއި އަދި އެރައްޔިތުންގެ ޚިޔާލާ އެއްގޮތަށް މަޝްރޫއު ރާވައި ހިންގުން ކަމަށެވެ.
ސާރވޭގެ ފޯމުގައި މަޝްރޫޢު ކުރިއަށްދާ ރަށްރަށުގައި މަޝްރޫޢު ކުރިއަށްދާނެ ގޮތާއި ސޯލަރ ހަކަތައިގެ ނިޒާމު ހުންނާނެ ގޮތާއި މަސައްކަތުގައި ހޭދަވާނެ ކަމަށް އަންދާޒާ ކުރެވޭ މުއްދަތު ބަޔާންކޮށްފައިވާނެ ކަމަށާއި، އޮންލައިންކޮށް ކުރިއަށްގެންދާ މި ސާރވޭގައި އެއްކުރެވޭ މައުލޫމާތުތަށް ބޭނުންކުރާނީ ހަމައެކަނި ދިރާސާގެ ބޭނުމުގައި ކަމަށް ވެސް ބުނެފައިވެއެވެ.
އެކްސަލރޭޓިންގ ރިނިއުވަބަލް އެނަރޖީ އިންޓެގްރޭޝަން އެންޑް ސަސްޓެއިނަބަލް އެނަރޖީ (އެރައިސް) މަޝްރޫޢު މައިގަނޑު ބޭނުމަކީ ރާއްޖޭގައި ބޭނުން ކުރެވޭ އިއާދަކުރަނިވި ހަކަތައިގެ ނިސްބަތް އިތުރުކޮށް، ރަށްތަކުގެ ކަރަންޓު ވިއުގަތައް ޒަމާނީ ފެންވަރަށް ތަރައްޤީކުރުން ކަމަށް އެންވަރރަމަންޓް މިނިސްޓްރީން ބުނެފައިވެއެވެ.
މަޝްރޫއަށް ވޯލްޑްބޭންކުގެ އިންޓަރނޭޝަނަލް ޑިވެލޮޕްމަންޓް އޭޖެންސީ (އައިޑާ) އިން 12.4 މިލިއަން ޑޮލަރުގެ ހިލޭ އެހީ ވަނީ ހަމަޖެހިފައެވެ. އަދި ކްލީން ޓެކްނޮލޮޖީ ފަންޑް (ސީޓީއެފް) އިން 23 މިލިއަން ޑޮލަރުގެ ލޯނު ވެސް ވަނީ ހަމަޖެހިފައެވެ. ހަމަ މި މަޝްރޫއަށް ސީ.ޓީ.އެފުން ވަނީ 7 މިލިއަން ޑޮލަރުގެ ހިލޭ އެހީ ވެސް ހަމަޖައްސާފައެވެ. އެރައިޒް މަޝްރޫއަށް އޭޝިއަން އިންފްރާސްޓްރަކްޗަރ އިންވެސްޓްމަންޓް ބޭންކް (އޭއައިއައިބީ) އިން 20 މިލިއަން ޑޮލަރުގެ ވަނީ ހަމަޖެހިފައެވެ. އަދި މަޝްރޫޢުގެ 45 މިލިއަން ޑޮލަރުގެ ހަމަޖެހެނީ ހަކަތައިގެ ދާއިރާގެ ޕްރައިވެޓް އިންވެސްޓްމަންޓް ތަކުންނެވެ.
