އުމަރު ނަސީރަކީ ޕާޓީ ނިޒާމާ ބީރައްޓެހި ބޭފުޅެއް: މާރިޔާ
19 ޑިސެމްބަރު 2017 | އަންގާރަ 03:29އުމަރު ޖޭޕީއާ ގުޅިވަޑައިގަތުމުން ގިނަ ބަޔަކު އަންނަނީ ފާޑުކިޔަމުން
އުމަރު ނަސީރު ޖޭޕީއަށް ސޮއިކުރައްވަނީ
ދާދި ފަހުން ޖުމްހޫރީ ޕާޓީއަށް ސޮއިކުރެއްވި ކުރީގެ ހޯމް މިނިސްޓަރު އުމަރު ނަސީރަކީ ޕާޓީ ނިޒާމާ ބީރައްޓެހި ބޭފުޅެއް ކަމަށް ރައްޔަތުންގެ މަޖިލީހުގެ މައްޗަންގޯޅި އުތުރު ދާއިރާގެ މެންބަރު މާރިޔާ އަހުމަދު ދީދީ ވިދާޅުވެއްޖެއެވެ.
ހޯމަ ދުވަހު މާރިޔާ ކުރެއްވި ޓުވީޓެއްގައި ވިދާޅުވީ، ޖުމްހޫރީ ޕާޓީ އާއި އެމްޑީޕީ އަކީ ގުޅިފައިވާ އިއްތިހާދެއްގައި މަސައްކަތްކުރާ ބައެއްކަން އެނގިހުންނަވާ އުމަރު ޖޭޕީ އަށް ސޮއިކުރައްވައި، އެމްޑީޕީއާ އެކު މަސައްކަތްނުކުރައްވާނެ ކަމަށް ވިދާޅުވުމަކީ ޕާޓީ ނިޒާމާ ބީރައްޓެހި މީހުންކުރާ ބާވަތުގެ ކަމެއް ކަމަށެވެ.
މާރިޔާގެ މި ޓުވީޓަށް ރައްދު ދެއްވަމުން ރައްޔަތުންގެ މަޖިލީހުގެ އައްޑޫ މަރަދޫ ދާއިރާގެ މެމްބަރު އިބްރާހިމް ޝަރީފް ވިދާޅުވީ އެމްޑީޕީ ބޭނުންވެއްޖެ ނަމަ އުމަރަށް އެމްޑީޕީއާ އެކު މަސައްކަތްކުރެއްވުން ނޫން ގޮތެއް ނޯންނާނެ ކަމަށެވެ. އެހެން ނަމަވެސް އެމްޑީޕީއާ ވައިވެސް އުމަރު އަށް އެޅިޔަ ނުދޭނެ ކަމަށް އެމްޑީޕީގެ ޗެއާޕާސަން ހަސަން ލަތީފް ވަނީ ވިދާޅުވެފައި ކަމަށެވެ.
ޖޭޕީގެ ޓިކެޓް ޤާސިމް އިބްރާހިމަށް ލިބިވަޑައިނުގަންނަވާނަމަ، އެޕާޓީގެ ޓިކެޓްގައި ރިޔާސީ އިންތިޚާބުގައި ވާދަކުރައްވަން ނިންމަވައި، އުމަރު ނަސީރު ޖޭޕީއަށް ގުޅިވަޑައިގަންނަވަން ނިންމެވުމުން، އެޕާޓީގެ އަސާސީ ޤަވާޢީދު ބެއްލެވިންތޯ ވިދާޅުވެ ހަސަން ލަތީފުވަނީ އުމަރު ނަސީރަށް ފާޑުވިދާޅުވެފަ އެވެ. އަދި ޖޭޕީގެ ރިޔާސީ ޓިކެޓަކީ އެޕާޓީގެ އަސާސީ ޤަވާޢިދުން، އެޕާޓީގެ ލީޑަރަށް ލިބޭ އެއްޗެއްކަން ފާހަގަކުރެއްވިއެވެ.
އުމަރު ނަސީރު ޖޭޕީއާ ގުޅިވަޑައިގަތުމުން ގިނަ ބަޔަކު އަންނަނީ ފާޑުކިޔަމުންނެވެ.
