މިހާރު މި ފެންނަނީ ރިޔާސީ ނިޒާމާއި ބަރުލަމާނީ ނިޒާމު މަސްހުނިވެފައިވާތަން: ރައީސް މައުމޫނު
ބައެއް ކަންކަން ހިނގަމުންދާގޮތުން ބަރުލަމާނީ ސިފަ ފެންނަ ކަމަށް ވިދާޅުވި
ކުރީގެ ރައީސް މައުމޫނު އަބްދުލް ޤައްޔޫމު
ރާއްޖޭގައި ރިޔާސީ ނިޒާމެއް އޮތް ނަމަވެސް މިހާރު މި ފެންނަނީ ރިޔާސީ ނިޒާމާއި ބަރުލަމާނީ ނިޒާމު މަސްހުނިވެފައިވާތަން ކަމަށް ކުރީގެ ރައީސް މައުމޫނު ޢަބްދުލް ޤައްޔޫމު ވިދާޅުވެއްޖެއެވެ.
ރާއްޖެޓީވީގެ "ފަށާއިރު" ޕްރޮގްރާމަށް ދެއްވި ޚާއްޞަ އިންޓަރވިއުއެއްގައި ރާއްޖޭގެ މިހާރުގެ ވެރިކަމުގެ ނިޒާމުން ބަރުލަމާނީ ސިފަ ފެންނަ ކަމަށް ޤަބޫލުފުޅުކުރައްވަންތޯ ކުރި ސުވާލަކަށް ޖަވާބުދެއްވަމުން ރައީސް މައުމޫނު ވިދާޅުވީ، ބައެއް ކަންކަން ހިނގަމުންދާގޮތުން ބަރުލަމާނީ ސިފަ ފެންނަ ކަމަށާއި، ނަމަވެސް އެއީ އެންމެ އެކަށީގެންވާ ގޮތް ނޫން ކަމަށެވެ. އަދި ރިޔާސީ ނިޒާމު އޮންނަންޖެހޭނީ ތިންބާރު ވަކިވެ، ވަކި ޙުދޫދުތަކެއް ކަނޑައެޅިފައި ކަމަށާއި، ނަމަވެސް މިހާރު ފެންނަމުންދަނީ ދެ ނިޒާމު މަސްހުނިވެގެން ހިނގަމުންދާތަން ކަމަށެވެ.
އެމަނިކުފާނު އިތުރަށް ވިދާޅުވީ، ރާއްޖެއަށް އެންމެ އެކަށީގެންވަނީ ރިޔާސީ ނިޒާމެއް ކަމަށާއި، ބަރުލަމާނީ ނިޒާމެއްގައި ސަރުކާރު ބަދަލުވުމުގެ ފުރުޞަތު ބޮޑު ކަމަށެވެ. އަދި އެއީ ރައްޔިތުންނަށް އެހައި ފައިދާހުރި ގޮތަކަށް ނުވާނެ ކަމަށް އެމަނިކުފާނު ވިދާޅުވިއެވެ.
ރައީސް މައުމޫން ރިޔާސީ ނިޒާމަކަށް ތާޢީދުކޮށް ވާހަކަފުޅު ދައްކަވާފައިވާއިރު، މިދިޔަ 15 އަހަރު ދުވަހުގެތެރޭގައި ރައްޔިތުން ވޯޓު ދީފައިވާ ގޮތުން ރައްޔިތުންގެ ޠަބިއްޔަތުގައި ހުރީ ބަރުލަމާނީ އުޞޫލަކަށް ކަން އެނގިފައިވާކަމަށް ކުރީގެ ރައީސް އަދި މަޖިލީހުގެ ރައީސް މުޙައްމަދު ނަޝީދު ވަނީ ވިދާޅުވެފައެވެ. އެގޮތުން ވެރިކަން ހަރުކަށި ގޮތުގައި ބަދަލުވުމުގެ ބަދަލުގައި އޮމާންކަމާއެކު ބަދަލުވުމުގެ ފުރުޞަތު ބަރުލަމާނީ ނިޒާމެއްގައި މާ ބޮޑު ކަމަށް ދެކިލައްވާ ކަމަށާއި، ބަރުލަމާނީ ނިޒާމެއްގެ ޚަރަދު ވެސް ކުޑަވާނެ ކަމަށް ރައީސް ނަޝީދު ވިދާޅުވެފައިވެއެވެ.
