ތިން ރަށެއްގެ ނަރުދަމާގެ ނިޒާމްގެ މަސައްކަތް ބަޔަކާ ހަވާލު ކުރުމަށް ކުރަމުންދާ މަސައްކަތުގައި ކޮރޮޕްޝަންގެ އަމަލުތަކެއް ހިންގަމުންދާ ކަމަށް ބުނެ އެންޓިކޮރޮޕްޝަން ކޮމިޝަން (އޭސީސީ) އަށް އަމިއްލަ ފަރާތަކުން މައްސަލައެއް ހުށަހަޅައިފިއެވެ.

ހދ. ނޮޅިވަރަންފަރު، ކ. ހިންމަފުށި އަދި ކ. ތުލުސްދޫގެ ނަރުދަމާ ނިޒާމްގެ މަސައްކަތް ހަވާލުކުރުމުގައި ކޮރަޕްޝަނަށް މަގުފަހިވާނެ ފަދަ ކަންކަން ހިނގަމުންދާ ކަމަށް ބުނެ އޭސީސީ އަށް މައްސަލަ ހުށަހަޅާފައި ވަނީ މި މަހުގެ 18 ވަނަ ދުވަހުއެވެ. އަދި މި މައްސަލައިގެ ކޮޕީއެއް ރާއްޖެއެމްވީ އަށް ވެސް ވަނީ ލިބިފައެވެ.

އެންވާރަމެންޓް މިނިސްޓްރީއާ ދެކޮޅަށް އޭސީސީ އަށް ހުށަހެޅި މި މައްސަލާގައި ބުނެފައިވާ ގޮތުގައި މިމަސައްކަތް ވަކިބަޔަކަށް ދިނުމުގެ މަސައްކަތް ވަރަށް އަވަސްއަރުވާލައިގެން އެންވައަރަންމެންޓް މިނިސްޓްރީން ދަނީ ކުރަމުންނެނެވެ.

އެގޮތުން މި މަސައްކަތް ހަވާލު ކުރުމަށް އެންވައަރަންމެންޓް މިނިސްޓްރީން މަސައްކަތް ކުރަމުން ދަނީ ސްރީލަންކާގެ ސިއެރާ ކޮންސްޓްރަކްޝަނަށް އަށް ކަމަށް އޭސީސީ އަށް ހުށަހަޅާފައިވާ އެ މައްސަލާގައި ބުނެފައި ވެއެވެ.

މައްސަލާގައި ބުނެފައި ވަނީ މި މަސައްކަތް ސިއެރާ ކޮންސްޓްރަކްޝަން ކިޔާ ކުންފުންޏަކާ ހަވާލު ކުރުން އަވަސްކުރުމަށް ބައެއް މަރުހަލާތައް ދޫކޮށްލުމަށް ފަހު ބިޑިން ޕްރޮސެސްގެ ބައެއް ކަންކަން އެންވާރަމެންޓް މިނިސްޓްރީން ކުރިޔަށް ގެންގޮސްފައިވާ ކަމަށެވެ.

މި މަސައްކަތް ސިއެރާ ކޮންސްޓްރަކްޝަނާ ހަވާލު ކުރުމަށް އެންވައަރަންމަންޓް މިނސްޓްރީ ބިޑް އިވެލުއޭޝަން ކޮމިޓީ ދެ ފަހަރެއްގެ މަތިން ބަދަލުކޮށްފައިވާ ކަމަށް އޭސީސީ އަށް ހުށަހެޅި މައްސަލައިގަ ފާހަގަކޮށްފައިވެއެވެ.

އެގޮތުން އިވެލުއޭޝަން ކޮމިޓީގައި ހިމެނޭ މެމްބަރުންގެ ޖުމްލަ އަދަދު މަދުކޮށްފައިވާ ކަމަށާއި މިކަން މިގޮތަށް ހިނގާފައިވާ ކަމުގެ ހެކި މިނިސްޓްރީ އޮފް އެންވައަރަންމަންޓާއި މިނިސްޓްރީ އޮފް ފިނޭންސްއާ ދެމެދު ބަދަލުކުރެވިފައިވާ އީމެއިލްތަކުން އެނގޭނެ ކަމަށް މައްސަލާގައި ބުނެފައި ވެއެވެ.

މީގެ އިތުރުން ބިޑް ހުށަހަޅަން ޖެހޭ މުއްދަތު ހަމަވި ފަހުން ސިއެރާ ކުންފުނީގެ ބައެއް ލިޔެކިޔުންތައް ބިޑް ކޮމެޓީން ބަލައިގަނެފައިވާ ކަމަށާއި އަދި ހުށަހެޅި ލިޔެކިޔުންތަކުގައި ފުރިހަމަ ވާން ޖެހޭ މައުލޫމާތުތައް ފުރިހަމަ ވެފައި ނުވާ ކަމަށް އޭސީސީ އަށް ހުށަހަޅާފައިވާ މި މައްސަލާގައި ބުނެފައި ވެއެވެ. އަދި މިކަން މިހެން ކުރުމަށް ސިއެރާ ކުންފުނިން ބިޑް ކޮމެޓީގެ ބައެއް މެންބަރުން ނުފޫޒް ފޯރުވަމުންދާ ކަމުގެ ތުހުމަތު މައްސަލަ ހުށަހެޅި ފަރާތުން ވަނީ ފާހަގަކޮށްފައެވެ.

މި މައްސަލައާ ގުޅިގެން އެންވައަރަންމެންޓް މިނިސްޓްރީގެ ބަހެއް ހޯދުމަށް ރާއްޖެއެމްވީން ގުޅި ނަމަވެސް މިނިސްޓްރީގެ އިސްބޭފުޅުން ފޯނަށް ޖަވާބު ނުދެއްވާތީ މިނިސްޓްރީގެ ބަހެއް ވަނީ ލިބޭ ގޮތް ނުވެފައެވެ.

ލަންކާގެ ސިއެރާ ކުންފުންޏަކީ ރާއްޖޭގެ ވަރަށް ގިނަ ރަށްރަށުގައި ފެނާއި ނަރުދަމާ ގާއިމް ކުރުމުގެ މަސައްކަތް ކުރާ ކުންފުންޏެކެވެ. މައުލޫމާތު ލިބިފައިވާ ގޮތުގައި ލަންކާގެ ސިއެރާ ކުންފުންޏާ ރައީސް އަބްދުﷲ ޔާމީންގެ ޅިޔަނު އެއްލައިދޫ މަނިކް ނުވަތަ މުހައްމަދު މަނިކުއާ ގާތް ގުޅުމެއް އޮވެއެވެ.